قررت أكون عانس

حواء

2011-04-24T06:33:00.003+02:00

السلام عليكم
يمكن ده من اكتر الموضوعات اللي فكرت كتير جدا قبل مااكتبها .. مش عارفة ربما لإنه بناتيتي زيادة عن اللزوم

وانا بحب جلسات البنات المغلقة

الاسبوع اللي فات يعتبر اكتر اسبوع في حياتي خضت فيه مناقشات بناتية حتى الموت .. حاسة مؤخرا ان كل البنات زعلانة ومتضايقة ومحتاجة اللي يفهمها
قبل ماادخل في تشعبات الموضوع تعالوا نتفق على قاعدة عامة هي أساس الموضوع :
خلق آدم في الجنة وسط كل أنواع النعيم ... استوحش .. فخلقت حواء من ضلع آدم - ضلعه المحيط بالقلب -( عليهما وعلى نبينا السلام )
القاعدة دي في رأيي بتفسر كل حاجة .. آدم رغم كل أصناف النعيم والملذات حواليه .. افتقد وجود روح تانية معاه تعطي للنعيم رونقه وقيمته .. استوحش وافتقد حواء قبل أن يعرفها .. تاقت لها نفسه قبل أن تخلق
حواء اتخلقت منه .. اتكونت من محيط قلبه .. ضلعه اللي بيحمي قلبه دايما خرجت هي منه
هل من الممكن بعد كده حد فيهم يرتاح من غير التاني ؟؟
احنا لو تعبنا شوية .. إصبع صغير جدا في ايدنا تعبنا .. كل شيء فينا بيتعب
( إذا اشتكى منه عضو .. تداعى له سائر الجسد بالحمى والسهر )
ما بالنا .. بلو اختفى منه ضلع .. عايش عمره اللي فات من غيره .. ياترى اد ايه قلبه واجعه ومشتاق للي يرجع يحميه تاني ؟
مابالنا .. بضلع ضايع منه بقية جسمه كله ؟؟ .. حاسة بايه وهي عايشة نفسها ترجعله ؟؟ نفسها ترجع لإنسان قلبه هو سر وجودها .. مش بتنتمي لغيره .. يوم ما ترجعله بس وتستقر تاني في مكانها الأصلي قدام قلبه .. هترتاح
عشان كده .. دايما هنقابل في حياتنا وقدامنا .. محاولات من الاتنين إنهم يرجعوا مكتملين مرة تانية
موقف سمعته وضايقني جدا .. بنت بتلبس لبس مش محترم اوي .. اتخطبت .. مامتها قالت لها : هتلبسي عبايات .. رفضت البنت وقالت : انا وخطيبي يا ماما مش شايفين مشكلة في اللبس ده .. هو موافق أفضل كده
قالت الأم : لا طبعا .. احنا كنا بنلبسك اللبس ده عشان تتخطبي .. اتخطبتي هتلبسي لبس محترم
الموقف ده بيلخص في رأيي مشاكل كتيرة جدا .. سببتها أزمة صعوبة الزواج المنتشرة حاليا
في بنات بقت مستعدة تعمل أي حاجة عشان تلاقي آدم .. ومش مهم هو ده آدم اللي هي بتنتمي له ولالا
عندها استعداد .. تلبس لبس مش كويس .. تضحك قدام شباب ضحكة مش صح حد يسمعها .. تتكلم بطريقة دلع زيادة .. تتحرك وتتصرف وتتعامل بطريقة غلط .. عشان حد يلمحها فترتبط
تصرفات غلط كتير جدا .. سببها رعب كبير من إنها ممكن تعيش عمرها وحيدة من غير آدم
بتنسى إنها مش بتتعامل مع شركة حكومية .. محتاجة مفاوضات وتنزيلات عشان تاخد طلبها
هي بتتعامل مع ربنا .. ملك الملوك .. أكرم الأكرمين .. وأجود الراحمين .. سبحانه خزائنه لا تنفد من العطاء .. عنده سبحانه كل أمنياتنا وأحلامنا وطلباتنا .. وقادر سبحانه على منحها لنا .. فقط لو طلبناها بصدق
تصرفاتها دي دليل على إنها مش بتحب آدم فعلا .. ومش حاسة بالانتماء ليه وإنها أكيد هترجعله تاني
اللي بيحب حد وعايز يجيبله هدية .. بيلف كتير جدا ويدور كتير جدا .. لحد ما يلاقي هدية تليق بمقام محبوبه
مش بيجيب له شيء مستعمل مستهلك تعبان كل الناس شافته قبل كده ورفضته ويقدمه
لان محبوبه عنده غالي وملوش مثيل .. يستحق أن يهبه العالم لإسعاده
قلبك في يوم هتقدميه لآدم خاصتك .. شوفي عايزة تقدميه ازاي ؟؟
عايزة تكوني البنت اللي كان حواليها فتن كتير .. كانت تعبانة ووحيدة وضعيفة .. وشايفة بنات حواليها ماشيين مع هيثم وتامر عايشين قصة حب وهمية .. شايفة ناس بتتبسط فالكلام وتضحك مع ده وتهزر مع ده وتصاحب ده .. بس لإنها حواء تقية بتخاف ربنا وبتحترم آدم .. تعالت فوق كل الفتن وفضلت نقية
بتمر بلحظات صعبة كتير .. بتحتاج آدم يكون جمبها .. بتحتاج تحس إنها محبوبة .. بتحتاج لايد تنتشلها من همومها ووحدتها .. بتجتاز كل ده وبتصبر وبتدعي وبتحافظ على قلبها نقي لم يخدش بعد
حواليها صاحباتها أمهات حنونات لأطفالهم .. وهي أم حنونة لأيتام كانوا مفتقدين لامومتها .. بنت بارة لمسنين كانوا محتاجين حنانها .. ايد بتمسح دمعة مرضى .. قلب بيساعد محتاج .. عطاء متواصل لمجتمعها
بالليل .. بعد ما الناس تنام .. بتقوم تصلي قيام .. لإنها عارفة إن آدم في مكان ما بيصلي هو كمان قيام .. بيدعوا ربنا إنه يرضى عنهم ويستخدمهم في نصرة دينه .. بيحكوا لربنا عن أحلامهم وآمالهم وآمانيهم .. وبيقولوا له يارب رجعنا لبعض عشان نعمر في الأرض
أحيانا بيحصل لها ابتلاءات كبيرة اوي .. بتحس إنها مش قادرة تجتازها لوحدها سليمة .. بتخبي سؤال جواها .. هو فين ؟ ليه بعدي ده لوحدي ؟ بس بتبقى عارفة إنها محتاجة تنجح في كل الاختبارات دي .. عشان يوم ما ترجع مكانها قدام قلبه تفضل ثابتة وعارفة تحميه
بيوحشها .. وبتشتاق له .. جواها ينبوع عاطفة لا ينضب .. قلب بيخفق بحب وإنتماء ليه لوحده .. روح تواقة لحياة مشتركة هيعيشوها .. بس لإنها حواء بتحبه .. هتخزن كل مشاعرها ليوم ما تقابله
لإنها حواء عارفة قيمة رسالتها كويس .. عارفة إن ربنا خلقها حواء .. وأي محاولة منها إنها متكنش حواء هتتعبها وهتضيع صفائها وسعادتها .. ولإنها مدينة لنفسها إنها تكون حواء بجد .. فضلت حواء نقية تقية طائعة للي خلقها وخلقه
ممكن متقابلش آدم هنا .. ممكن يكون موعد رجوعهم لبعض في الجنة .. ممكن يكون ابتلائها إنها تعيش من غيره في الدنيا .. لإن آدم اللي في الجنة يستحق كل التعب اللي تعبته
وعشان حواء عارفة إن آدم اللي هتختار تكون ضلعه .. هو اللي هتقف جمبه قدام النبي يوم القيامة بفخر وتقوله : يارسول الله ده اللي ارتضيت دينه وخلقه .. واللي حاولنا سوا نكون على سنتك .. ونحرر مسراك .. ونظهر للعالم عظمتك
هتقف معاه قدام ربنا ويقولوا له سبحانه : يارب حاولنا نخدم دينك وننصره .. نكون يارب أسرة قدوة منارة للناس عن روعة الحياة في ظل طاعتك
عشان عارفة ده .. وعشان نفسها تكون سعيدة : هتختاره بعناية فائقة .. مش هتستعجل لحد ما تتأكد إنه هو ده آدم
صاحبة قلبه .. وصاحب ضلعها

زواج

2010-12-14T01:54:00.003+02:00

ماذا يعني الزواج ؟

سؤال وجه إلي قريبا .. توقفت أمامه كثيرا أفكر .. فإجابتي اليوم تختلف كثيرا عما كانت عليه إجابتي في العام الماضي .. غريبون نحن كلما سرنا في طريق الحياة طويلا ... كلما اختلفت أفكارنا وتشعب تفكيرنا

لو سئلته منذ عام مضى .. لتذكرت كل تلك الأمور التي تقع على كاهل المرأة دونما مساعدة من أحد

طبخ وكي وغسل وأطفال وسهر وتعب وركض وراء راحة زوج لا يرتاح أبدا !!

زواج

أن تختار أحدهم ليكون شاهدا على حياتك .. مصورا مسجلا كل لحظة تحياها .. تختار شريكا تأتمنه على أيامك .. تترك بين يديه روحه يعتني بها ..

لن تتقلب يوميا في أحضان النعيم .. ستتجرع الحزن أحيانا .. ستذوق السعادة أحايين أخر .. ستأرق الليل مهموما خائفا .. سترقد قرير العين آمنا عاشقا ..

ستنجب أطفالا تكافح لتنشئتهم عمرا كاملا .. ستقتطع من سعادتك وراحتك لأجلهم ... ستتخلى عن الكثير لترى بسمتهم

تبني بيتا في أرض التوازنات .. توازن بين ما تريد وما يريد ..

هناك سعادة ما في منح من تحب ما يريد .. متعة في أن تصنع طعاما يتلذذون بتناوله .. عاطفة تشع من ملابس اعتني بها لتجعل مرتديها أجمل الحاضرين .. عطاء في بيت رُتِب ليمنح سكن .. شوق في ترقب عودته .. حب في أطفال مشاغبين صاخبين بالفرح

شغف يوم مُلِءَ بالعمل كدا لأجلهم .. روعة ساعات فنيت في خدمة أسرتك ... عظمة مشاركتها مع من تحب

شاركهم شغفهم

2010-11-09T14:04:00.002+02:00

في زمن أصبحت معادن الناس فيه كالحديد الصدئ

تألق عطاؤهم .. شع بذلهم .. تلألأت تضحياتهم

أصبحوا شمس الأمل في حياة الكثيرين

أن تلتقي بأناس يعملون جاهدين لإعالة أسرهم شيء مألوف معروف

أن تبصر بشرا يفنون أعمارهم في إعالة وكفالة غيرهم أمر نادر

أقف منبهرة حقا أمام من وهبوا أوقاتهم لله

من سخروا طاقاتهم للسعي في قضاء حوائج الناس

من اقتطعوا من راحتهم ورزقهم ومشاعرهم ليجعلوا حياة أناس لا يعرفونهم وقد لايلتقون بهم يوما

حياة كريمة لا يهددها شبح الفاقة والعوز

هناك نور ما يضفي على وجوههم لمحة سماوية

ترى في أعينهم حب الخالق فعلا لا قولا

يعملون بصمت لا ينتظرون ثناءاً أو أجراً من بشر

جل أمانيهم أن يطلع الله على قلوبهم الصادقة فيرزقهم رضاه

عجيب أمره

ذاك الذي يستقي سعادته من بسمة يرسمها على شفاه مريض

ذاك الذي يستمد حنانه من تربيتة على شعر يتيم

ذاك الذي يستعين على ملمات الحياة بدعوة صادقة تخرج من محتاج أعانه

ذاك الذي باع عمره لله

مبهرٌ فعله

ذاك الذي يمضي وقته في فرز الملابس والأوراق والأواني والزجاجات المستعملة ليخرج منها برزق يمنحه للمحتاج

ذاك الذي يقف بائعا مناديا في أفقر الأماكن ليدفئ أجسادا أعياها برد الأعوام

ذاك الذي يحمل أثاثا ليسهم في تشكيل عشٍ لزوجين عاشقين

ذاك الذي يجول باحثا متحريا طريق المستعففين

جميلة نفوسهم أولئك المتطوعون

بناتيت

2010-02-28T18:20:00.008+02:00

السلام عليكم ورحمة الله وبركاته

ازيكن ؟

بداية الموضوع ده للبناتيت من زوار وقراء المدونة الكريمات

حقيقي فعلا فكرت كتير اوي قبل مااكتب البوست ده

وترددت إني أكتبه

أكتر من مرة أقرر أكتبه

يمكن لأني مش بحب أتكلم في موضوع بناتيتي علنا

بحب نقعد في جلسة بنات وننعنع على راحتنا

فالاخر اعتبرت المدونة الازهر بارك واحنا متجمعين وهنرغي براحتنا :D
الحب الحب .. الشوق الشوق

عارفين بحب من شعر نزار المقطع ده جدا

تلومني الدنيا إذا أحببته

كأني أنا خلقت الحب واخترعته

كأنني على خدود الورد قد رسمته

.. كأنني أنا التي

للطير في السماء قد علمته

وفي حقول القمح قد زرعته

.. وفي مياه البحر قد ذوبته

.. كأنني أنا التي

كالقمر الجميل في السماء قد علقته

بحسه فعلا بيوصف مشاعر البنت لما قلبها يدق لأول مرة

ازاي كل حاجة حواليها بتبقى جميلة

كل مكان كانت بتمر عليه قبل كده من غير ماتاخد بالها منه

دلوقتي بتشوفه بعين تانية

عين محبة تستشعر الجمال في كل اللي حواليها

لأن الحب جواها شع نوره على الدنيا كلها

بتحس كأنها طايرة في الهوا
روحها بتحلق في عالم جميل

مبتبقاش عايشة خالص في عالم البشر المادي

هي ساكنة في أروع عالم خلقته مشاعرها

حاجات كتير جدا بتتغير جواها

بتبقى أكثر تسامح وصفاء ونقاء

لأن قلبها ببساطة أرق قلب في الوجود

وعشان كده يوم ما قلبها يتخدش ولو خدش بسيط

بيبقى صعب جدا يرجع زي الأول

خفقاته ودقاته بتبقى مليانة ألم

بيتعب جدا عشان يشفي نفسه

بيخسر كتير اوي من مخزون عواطفه لما يتكسر

وعشان كده ربنا أعلى قدره اوي

وخلاه غالي

مش أي حد يشتريه

ولا أي حد يملكه

لأنه قلب غالي جدا

و لأنه غالي عند ربنا

المفروض يكون غالي عند صاحبته

لا تمنحه إلا لمن يستحقه

ويكرمه ويحافظ عليه كجوهرة نادرة لف سنين عمره عشان يلاقيها

بزعل جدا لما ألاقي بنوتة لسه وردة نقية

منحت قلبها للي محافظش عليه

فقلبها ذوى وذبل

بسمع كتير اوي عن قصص حب عمرها ما كملت

لان اصحابها استعجلوا يقطفوا الثمرة قبل ما تنضج

ومفيش شجرة حب هتكبر وهتثمر الا بعد الزواج

عمر ما كان الارتباط والعلاقات والخطوبة

بينتجوا ثمرة حب يتلذذ بها أصحابها طول حياتهم

لان الحب عمره ما يكبر الا بالاحتكاك والتعامل والمعاشرة في حياة طويلة

عايشين كل تفاصيلها

الحب بيكبر في النور قدام عيون الكل

الظلمة عمرها ما بتزرع شجرة

ازاي واحدة تحب واحد

مشافتوش الا في أحسن صوره وهو رايح يقابلها

مسمعتش منه غير كلام حب بيغدقه عليها كل ما يكلمها

مشافتش تعامله معاها وهي تعبانة

وهي زعلانة

وهما بيتخانقوا

وهي غرقانة في المسئوليات وشغل البيت وتربية الاولاد

مشافتوش الا في الصورة اللي هو عايزاها تشوفه فيه

فازاي هتحبه ؟

هي بتحب صورة منه

مش بتحبه هو كاملا

الانسان لما يحب بيدفع عمره عشان يفضل جمب اللي حبها

عشان يشاركها بيته وحياته ومستقبله

مش بيعلقها بوعود واهية عمره ما هينفذها

ومش بيعكنن عليها حياته بشروط تعجيزيه

ولا بيخليها طول الوقت خايفة وحزينة ومرعوبة

الحب خلق ليسعد البشر

لا ليتعسهم

ومفيش سعادة هتتحقق أبدا

الا بطاعة اللي خلق الحب وخلق البشر

مش هيبقى حب مبارك ولا عمره طويل

لو أغضبنا الحبيب الأعظم وخالفنا أوامره

هو سبحانه اللي خلق الحب

وهو سبحانه اللي بيبارك فيه ويسعد أصحابه

فعشان نخلي حبنا يعيش ويكبر ويثمر

وعشان يفضل الشخص اللي بنحبه معانا طول العمر

نتفيأ ظلال جنة حبنا

لازم نحبه سبحانه أكتر

2010-02-07T05:11:00.004+02:00

فَإِنَّ مَعَ الْعُسْرِ يُسْرًا

إِنَّ مَعَ الْعُسْرِ يُسْرًا

يااارب

هو وهي

2010-02-01T01:30:00.008+02:00

من أول يوم عملت فيه مدونة قررت اكون عانس والناس كانت بتطلب مني أكتب قصص نجاح ناس حقيقية عشان أضفي المصداقية والواقعية للمدونة

بس انا كنت بفكر إن صعب أوي أكتب تجربة ناجحة لأن الحي لايؤمن عليه الفتنة

وممكن الاتنين الناجحين دلوقتي بكرة أوضاعهم تتشقلب

فعلى كده هكتب عن ناس عواجيز فضلوا حياة طويلة مع بعض

دي كانت أفكاري

لحد ما قابلتهم

يمكن عرفتها هي أكتر لأنها صديقتي المقربة

وهو عرفته من كلامها عنه واختلاطي القليل بيه

النهاردة أنا هكتب عنهم الاتنين هو وهي

بمناسبة عيد زواجهم

خاصة أن في عيد زواجهم ده بالذات عرفتهم الاتنين كويس اوي

هبدأ من البداية

هي .. كانت الشياكة والأناقة دائما وأبدا

عمري ماقابلت واحدة شيك كده أو بتهتم بالأناقة زيها

ومش بس أناقة المظهر .. كان جمال الجوهر بيشع

طيبة قلبها عرفها بيه كل اللي عرفوها واتعاملوا معاها

رقتها ميزتها .. وحرصها على مشاعر الناس .. حتى لو الناس دول أذوها وزعلوها عمرها ما تردلهم الأذية

و تزعلهم أبدا

ومهما اتضايقت منهم عمرها ما تظهر لهم أو تعاملهم وحش

كانت بترجع البيت متضايقة من كلام الناس

كنا نقولها ثقي ان ربنا هيبعتلك ملاك يتجوزك .. لانك متتعوضيش

انا مش هقول عنها إنها كانت جميلة لان دي مش الحقيقة

هي كانت فائقة الجمال

كانت في نظري مثال لجمال الفتاة العربية

بالسمرة الخفيفة والعيون الواسعه والملامح الرقيقة

كانت مدرستها في ثانوي تقولها انا بحب أتأمل جمالك

أنا كمان كنت بحب أتأمله

فضلت سنين كليتها البنت المؤدبة العفيفة المترفعة عن كل مايعيب .. واللي حواليها مكنوش بيرحموها من تعليقاتهم السخيفة

لحد ماجيه الموعد المقدر

في رابعة كلية

اتقدملها هو

مكنش يعرفها قبل كده .. شافها وهو مع صاحبه زوج أختها الكبيرة

هي من عيلة محترمة

والدها ووالدتها الكل يشهد لهم بالتدين العميق والخلق الرفيع - نحسبهم كذلك والله حسيبهم -

اتقدملها

كان جواز عادي مش مبني على قصة حب كبيرة قبله

بس كل اللي كان يشوفهم كان يعرف انهم فعلا بيكملوا بعض

كل واحد فيهم كان النصف الثاني للاخر

كأنهم كانوا عايشين بحاجة ناقصة جواهم لحد ماقابلوا بعض

اهتماماتهم الصغيرة كانت متشابهة

كانت مهتمة بالاتيكيت اوي والذوقيات .. لقيته دارس اتيكت فعلا وبيدي فيه دورات

بيحبوا اللون البيج والبني

حاجات كتير اوي كانوا متشابهين فيها

اتخبطوا لبعض في اول شهر ثمانية

في نص الشهر اتكتب كتابهم

يوم 1/2/2007

كان زفافهم

اتجوزوا بسرعة

وسافرت تعيش معاه في الغربة

كنت عارفة طبعا أنهم بيحبوا بعض .. كانت حياتهم في نظري حياة زوجية عادية

يغلفها الحب وتتخللها المشاكل أحيانا زي أي زواج

ربنا رزقهم طفل .. فأصبحوا أسرة .. كانوا في نظري أسرة لاتختلف عن الكثير من الأسر حواليا

اتنين ملتزمين بيحبوا بعض وعايشين حياة عادية .. اه عندهم اهتمامات مختلفة عن الأسر التانية

عايزين يغيروا في العالم للأفضل

كان نفسها بعد أحداث غزة تتبنى طفلة يتيمة .. تربيه في بيتها مع ابنها

كان اللي بيميزها في نظري قلبها الكبير ورهافة إحساسها

مكنتش تشوف أبدا حد محتاج ومش تساعده

لازم تمشي بفلوس فكة عشان لو قابلت أي حد محتاج تديله

بسيطة جدا بساطتها تفاجئ أي حد يتعامل معاها

عفوية وبسيطة ورقيقة

وبتحب الاطفال والمساكين جدا جدا

بس نجاح الانسان مش بيبان في الحاجات دي بس

لازم امتحان صعب عشان يوم ما ينجحوا فيه .. ينجحوا بامتياز

والامتحان جيه بعد سنتين بس من زواجهم

جيه بعد أحداث غزة .. بعد ماابنهم كمل سنة

جيه في عيد زواجهم التاني

اكتشفنا أنها عندها المرض الخبيث

شابة كان عندها 24 سنة

راحت هي وزوجها وابنها يحللوا ورم صغير كان طلع ورا ودنها اليمين

الدكاترة قالوا لهم انها عندها نوع نادر من المرض الخبيث .. سرعة انتشاره رهيبة

وعشان كده لازم يشيلوه

بس هيتشال معاه عصب الوجه

فنصف الوجه الأيمن سيصاب بالشلل

وجهها الجميل .. اللي كانوا الناس دايما يؤذوها فيه ويعلقوا عليه

هيصاب بالشلل .. نجحت أسماء في الامتحان الأول هي وكمال زوجها

لانها أول مافاقت من العملية وعرفت أن وجهها اتشل مقالتش غير الحمد لله الحمد لله

ونجح زوجها لان حبه ليه متغيرش أبدا بسبب تشوه بسيط في رمز جمالها

كانت بتخاف اوي ليكون شكلها يضايقه .. أو يكون ده تقصير في حقه أنها لا تستطيع التجمل ليه بالقدر الكافي

وعدى الامتحان وجيه الامتحان التاني

الورم رجع هنشيل الاذن اليمنى كاملة وجزء من الفك

لو كان شكلك اتغير في الاول شوية

دلوقتي هيتغير تماما

اخدت كيماوي وشعرها بدأ يتساقط

قالت له انه حر يتزوج مرة تانية .. كان دايما بياخد كلامها أنه مزحة تقيلة بتزعله

بعد العملية التانية رفضت تقابل الناس لحد ماترجع جميلة زي الاول

لما تخلص علاج وتعمل عملية تجميل تزرع ودن جديدة ساعتها هتقابلهم

لانها ببساطة مكنتش بتحب تزعل اللي بيحبوها

كانت بتخاف شكلها الجديد يضايقنا

في مرة قالت لي لو شكل ودني المتشالة بيضايقك هغطيها بشاش عشان مش تضايقك

مكنتش زعلانة على ودنها كانت خايفة بس ان ودنها متكنش في الجنة

ونجحت في الامتحان التاني

ونجح كمال لانه طول فترة علاجها أخد إجازة وفضل معاها عشان ميسبهاش لحظة تتألم فيها وهو مش جمبها

شفت كتير اوي مشهد اتنين ماسكين ايد بعض

بس اتحفر في ذهني مشهد ايد اسماء جوا ايد كمال

كانت لما تتعب او تتضايق تلاقيه جاي يمسك بايديها بصمت ومن غير ماتتطلب

كان مشهد حب بسيط وجميل مش محتاج كلام يعبر عنه

وجيه الامتحان التالت الورم رجع في الرئتين

عملية التجميل هتتأخر .. وشعرك هيستنى كمان شوية عشان يطول

أصله هيقع تاني

والمرة دي هيضاف لوجهك شيء جديد

أنبوبة أكسجين تتنفسي منها

وصوتك هيروح .. هتعجزي عن الكلام لفترات طويلة

هتفقدي وزنك كمان

40 كيلو هيروحوا منك

رغم كده ابتسامتك هتفضل تسعد اللي حواليكي

ابتسامة مش كاملة صحيح لإنها مائلة بحكم الشلل .. بس انتي بروحك الكبيرة مش هتمنعي الناس منها

قعدتي شهر في المستشفى وكمال معاكي في كل لحظة

تعبتي كتير وهو كمان

كانوا الدكاترة ياخدوه على جمب يقولوا له زوجتك مش هتعيش

كلها ايام وترحل ويرجعلك بابتسامة

يخطط معاكي هتعملي ايه بعد ماربنا يشفيكي

يرجعوا تاني يقولوا له كلها ساعات

يرجعلك بهدية جميلة في عيد ميلادك

6/1/2010

كان عيد ميلادك ال25

عملنا لك حفلة عيد ميلادك وسط الاجهزة الطبية الموصولة بكل جزء فيكي

كان بيشيلك يخرجك تشتري هدايا للناس اللي بتحبيهم وانتي مش قادرة بس بتنزلي تخرجي على كرسي متحرك عشان تسعدي الناس

شهر كامل قعد معاكي فيه لحظة بلحظة رفض يسيبك دقيقة عشان لو احتجتيه تلاقيه جمبك

لآخر لحظة بيقولك إنك أجمل واحدة في العالم

ولآخر لحظة بتقوليله أنه الملاك اللي استنتيه كتير

وودعتيه ونمتي

جيه يطمن عليكي في نومك .. يقبل جبينك بصمت ويقولك ربنا يشفيكي

مسك ايدك من غير ما تطلبي

بس انتي كنتي نجحتي خلاص فالامتحانات كلها

روحتي لربنا .. بس منستيش ان كمال بيحبك

ابتسمتي له ابتسامة جميلة .. بقاله سنة مشافهاش

ووشك نور بحبه

ورحلتي تستنيه في أجمل مكان في الدنيا

في الجنة

وان شاء الله هيجيلك .. لأنه أثبت للعالم كله اد ايه كان بيحبك

كلنا نشهد أنه أكرمك وعاملك كملكة متوجة في عرش قلبه

ومتقلقيش عليه هنشيله في عينينا لحد ما يجيلك هناك

ونحضر فرحكم من تاني

أسماء وكمال

حقيقي علمتونا يعني ايه حب .. يعني ايه تضحية

يعني ايه زواج حقيقي

شكرا ليكم

ملحوظة صغيرة

أسماء بطلة القصة هي أختي
توفت يوم 18/1/2010
متنسوهاش من الدعاء
:)

أنقى البشر .. شكرا

2010-01-24T21:25:00.003+02:00

النار

لا بد أن يمر بها الذهب ليخرج نقيا صافيا

تمر بها المعادن ليظل البقاء للأصفى والأنقى والأرقى

وهكذا هي الحياة

لابد أن تعصرنا المحن لنخرج منها بأشخاص هم الأنقى والأصفى والأفضل

يبقون معنا أبد الدهر .. حتى وإن رحلت الأجساد تبقى أرواحهم ساكنة داخل قلوبنا

يعبر طريقنا الكثير .. يتركون آثار أقدامهم ويرحلون .. تأتي رياح المحن لتمحي جميع الآثار

لا يظل إلا شخوص من نجوا من العاصفة يقفون مبتسمين مادين أياديهم لنا

مستقبلين إيانا في أحضانهم مطمئنين .. مضت العاصفة سنخرج منها سويا أقوى

الأصدقاء

لا نعرفهم حقا إلا في المحن

تتألق جواهرهم الكريمة

يفوح شذاهم العطر

لأنهم الأفضل

تعلمت من أختي الراحلة أن أحتفظ لكل محسن بإحسانه مهما صغر

فما بالنا بمن نعجز عن شكر إحسانه

في مرض أسماء .. تمايزت المعادن .. وجدنا اللؤلؤ .. ورأينا الحديد

وحين رحلت إلى ربها

شع تألقهم حتى بهتت بجواره جميع الأضواء والألوان

صديقاتي الغاليات :

ولاء رزق
دعاء عواد
بسمة
منة

حقيقة أعجز عن إيفائكم حقكم

صديقات أختي وصديقاتي

آية
منى
هاجر
إسراء
إيمان
نورهان

تقف الكلمات حائرة تدفع بعضها بعضا علها تخرج كلمة تعبر عن شكرنا العميق واعتزازنا بمعرفتكم

لم أذكر جميع الأسماء أعلم

تركت بعض الأسماء أدعو لها في صمت لعلمي أنها سترفض أن أكتبها

حفظكم الله ورعاكم .. ونقلكم من سرور إلى سرور

وجمعنا بكم في جنات عليين

وحفظكم من كل شر وعين وضرر

وداعا أسماء

2010-01-20T01:31:00.003+02:00

ليوم ألقيت عليها نظرتي الأخيرة
أراها ملفوفة بالبياض
لثمت جبينها مقبلة إياها القبلة
هسمت في أذنها : روحي لربنا يا أسماء .. مع السلامة يا حبيبتي
تأملتها طويلا وانزويت جانبا أدعو الله لها وهم يلفونها بالكفن
يخبئون وجهها الجميل عن أعيننا المتلهفة لضم صورة أخيرة لها
يخبئون وجهها معلنين لنا أننا لن نراها ثانية إلا في دار الحق
رحلتِ يا أسماء رحلت يا حبيبة القلب والروح والعين
خلفتينا وراءك في دنيا كئيبة
لا رائحة لها من غير أنفاسك الزكية تعطرها
اختفت جميع الألوان وتوحدت لونا واحد يعبر عن الحزن
أي حياة لي من بعدك أخيتي الغالية
اليوم مررت بذات الأماكن .. سمعتك هنا تضحكين .. رأيتك هناك تتبسمين
وهنا في هذه البقعة احتضتني مرحبة بي

اليوم احتضنك مودعة إياكي

بكيت كثيرا وسأبكي يا غاليتي
ليس حزنا عليك فقد ذهبتِ لرب رحيم عطوف كريم أحببتي لقاءه فاستضافك في ضيافته سبحانه
لكني سأبكي لأجل نفسي
لأجل أيام قادمة لن يطالعني فيها وجهك الباسم
إلى لقاء قريب يجمعنا في دار ليس فيها حزن ولا تعب

يعود إلي

2010-01-08T21:52:00.006+02:00

في خضم حياتنا اليومية أحيانا أهدافنا بتتأجل حتى إشعار آخر

بتيجي حاجات أهم من حياتنا نفسها تخلينا نعمل ستوب لطريقنا اللي راسمينه

بنوقف كل حاجة ونغير مسار الرحلة

بدل ما ننطلق نحو الهدف

بننطلق للأساس في وجودنا .. عيلتنا

ويمكن ده اللي حصل من يوم مااتخرجت

كل شيء تم تعطيله في حياتي

وأصبح رقم واحد عندي أختي المريضة وأسرتي

فترة كبيرة جدا قضيتها في التفكير وتجارب جديدة كتير مريت بيها

آمل فعلا أنها تصقل شخصيتي

خلال فترة التفكير دي تأملت كتير في أنا عايزة أحقق ايه في حياتي

أعدت دراسة الهدف مرات ومرات

هل فعلا الاعلام هو الوسيلة الوحيدة لتحقيق هدفي

ولا ممكن أبرع في وسيلة ووظيفة تانية طبيبة مثلا ولا مربية ولا اي حاجة

النهاردة ترسخ في قلبي تاني وبقوة

أن لا بديل مهما كان عن هدفي الاساسي

ووظيفتي اللي اخترتها

الصحافة والإعلام

واللي رجع رسخ لي الهدف ده .. برنامج على قناة المحور

شفت اد ايه فعلا بيغيروا ويشوهوا الحقايق

بيشتغلوا لمصلحة النظام الفاسد وفقط

بيخدروا الشعب وبيلعبوا بعواطفه

بيطلعوا بزي الحريص على مصلحته وعايش همومه
وحاسس فعلا بمعاناته في كل نواحي حياته

بدءا من رغيف الخبز .. وسرقة حقه في انتخاب من يمثله .. وانتهاء بقتله وتضييع دمه عبثا

قاعدين يتكلموا عن جدار العار اللي مصر بتبنيه

عن تجويع مليون ونصف شخصا لمصلحة العدو الحقيقي لمصر

قاعدين بيكدبوا ويفتروا على المقاومة في فلسطين وفي لبنان

بيشعلوا النار بكل ما ااستطاعوا من قوة

زي ما عملوا أيام ماتش الجزاير ... أيقظوا فتنة لا أول لها ولا آخر

خرج علينا كل الشتامين صباح مساء يسمعونا وصلة ردح في الجزاير واللي عملته مصر عشانهم

دلوقتي طلعوا تاني

بس مش عشان يتكلموا عن مصر المضطهدة المسروقة المنهوبة
أو عن قتل أشقاءنا في الوطن في نجع حمادي

أو عن الظلم اللي واقع على الكل مسلمين ومسيحين بسبب حكومة لا هم لها سوى افلاس المواطن وقتله

اما بالغرق في البحار او النيل .. او بالاوبئة والمزروعات الملوثة

طالعين بيشتموا في شعب تحمل ما لا يتحمله أحد

4 سنوات حصار خانق .. مات المئات بسببه في انتظار فتح معبر فقط ليتلقوا العلاج

عن مئات الأمهات اللي راقبوا أبنائهم بيموتوا قدام عينيهم

عن شعب تلقى أعتى و أقوى وأفظع الأسلحة بصدر عار وكل العالم يطالع موته صباح مساء كمسرحية مكررة

عن شعب أغلقت أمامه منافذ البر والبحر

فلم يجد سوى ممرات تحت الأرض ليؤمن لأطفاله غذاء ومقومات حياة يجعلهم يصمدون ليوم آخر في حياة ظالمة مجحفة

عن شعب يعيش في المخيمات داخل مدن وطنه رافضا أن يطلق عليه أي اسم إلا لاجئ

ليذكر نفسه أنه داخل حدود هذا الوطن له مدينة أخرج منها ولا بد يوما أن يعود إليها

لا أعلم حقا هل أصبحت ثقافة الهوان والاستسلام هي السائدة

فأصبحنا نخشى أن نرى آخرين ما يزالون يقاومون بكرامة

فنستنفر كل السبل لاخضاعهم وكسر الصمود فيهم عبر تجويعهم ومنع الدواء عنهم لسنين

وفوق هذا يخرج الاعلام المأجور للدفاع والشتم والسب

إعلام يتقاضى القائمين عليه الآلاف كل أسبوع

يطالعنا كاذبا ببرود قاتل ليتحدث

عن المواطن المصري

اين هو من المواطن المصري الحقيقي

الأصيل .. الكريم .. الشغوف .. الشهم .. النقي

الذي يكافح ليجعل مصر وطنا أفضل

من الذي يعطيه الحق أن يتحدث عن مصر الحقيقية

وهو يعيش في مصر حماية النظام والتبرير له

الشكر موصول لهذا الاعلام المأجور

فقد رسخ لي ايماني بهدفي

الحب في زماننا

2010-01-04T01:38:00.004+02:00

رآها واقفة هناك .. تتأمل البحر الممتد عبر الأفق ... تدفع النسمات شعرها برفق .. سامحة له بأن يداعب وجهها الجميل
خفق قلبه بشدة .. سار نحوها متمهلا .. متأملا جمالها

دي مش قصة رومانسية :D

دي مقدمة لغالبية قصص الحب اللي قرأتها أو شفتها

هي البطلة الجميلة

وهو الشاب الوسيم

ولازم يكون واحد فيهم غني

أغلب الأفلام المعروضة بتروج لنفس القصة .. بتحكي عن قصص حب .. كان بدايتها الاعجاب وتخللها شوية اكشن وانتهت أن البطل السوبرمان .. اتقدم للفاتنة

من شهرين كده شفت فيلم عربي لمصطفى شعبان كان البودي جارد للبطلة ومن هنا نشأت قصة الحب

ومش عارفة بصراحة نسبة الحراس الشخصيين في عالمنا العربي اد ايه عشان نقدمهم دراما للناس

بفتقد بجد الدراما المعبرة عننا .. عن واقعنا

زهقت من منظور قصص الحب المقدمة إلينا والمستوردة من ثقافة ليست بثقافتنا

فين قصص الكفاح ؟؟ القصص الرائعة الحقيقية اللي كانت بترسل للكاتب الكبير عبد الوهاب مطاوع

فين قصص الحب التي تجاوزت الفقر والمرض وصعوبات الحياة وظلت حية وبقوة

الحب مش مرتبط بالمادة

ليه مش بنشوف قصة حب بين موظف مصري عادي بيكافح في حياته عشان يبني نفسه

وزوجته اللي بتساعده وتدعمه عشان ينجح

او قصة حب بين واحدة عادية مش جميلة .. بالعكس ممكن تكون اقل من عادية .. بس روحها تشع جمالا على كل اللي عليها

وبطل فقير بيعيش يوم بيومه ... وهي اللي بتمده بالأمل والعزم عشان يفضل يكافح بحب في بلده

كنت مرة في زيارة للجرحى

وشفت هناك قصة أثرت فيا جدا

يوسف شاب فلسطيني طالب في هندسة .. الحرب أفقدته بصره

بعد ما فقد بصره خطب بنت فلسطينية .. اد ايه كانت بتدعمه معنويا وبتشجعه .. بثت في قلبه حب الحياة من التاني والأمل

كان بيقول لاحب بعد كفاح

وكفاح كان اسمها وفعلا اسم على مسمى

المشكلة في الحب الجديد .. أنه مستورد

يعني البنت حاليا بتنتظر الشاب الوسيم الغني وتعجب بيه الاول وتحبه وبعدين تتجوزه

والا ترفض اي حد تاني

او ببساطة تقرر .. مش هتجوز الا عن حب

وطبعا مش محتاجة أقول أني لا أؤمن بالحب قبل الزواج

أنا أؤمن بمقولة للعظيم : عبد الوهاب مطاوع

ان الحب بذرة ... بيزرعها الاعجاب

مبتكبرش الا بالاحتكاك والتعامل والمعايشة

مش هتتحول شجرة الا لما تسقى بسنين الحياة سويا

ومفيش شجرة هتكبر بسهولة وببساطة .. لازم كفاح وصبر وعواصف عشان تكبر وتفضل عايشة خضراء مورقة بالسعادة

بس للاسف الثقافة المعروضة علينا حاليا ان المال يصنع السعادة

وان الجمال بيصنع االسعادة

ونسيوا ان المال والجمال ايام وهينتهوا

واللي هيفضل عايش

القلوب المفعمة بالحب الصادق

ليه بتتجوز

2009-11-02T09:23:00.004+02:00

احنا ليه بنتجوز

سؤال وضعه أحد الفريند فالstatus.
عالفيس
والناس قعدت تجاوب عليه

بصراحة استغربت جدا جدا الاجابات

اللي من قبيل وليه لا

سؤال مهم جدا بيحدد أحد أهم القرارات اللي الإنسان بياخدها في حياته

وبيتعامل معاها عمر بحاله

وبتوضح فكره وهدفه في الحياة

وتصوره لمجتمعه وحياته المستقبلية

انت ليه بتتجوز ؟

بتتجوز عشان تستقر نفسيا وعاطفيا ؟؟

بتتجوز عشان تجيب أطفال تربيهم ويفضلوا معاك في حياتك ؟؟

بتتجوز لانها سنة الله في الكون فبتطبقها من دون التأمل في الهدف منها ؟؟

بتتجوز لان الناس كلها حواليك اتجوزت ؟؟

بتتجوز لإعمار الأرض ؟؟

بتتجوز لكل الأسباب دي

ليه بتتجوز ؟؟

قم للمعلم وفه التبجيلا

2009-10-28T17:31:00.002+02:00

معلمتي الغالية

اليوم علمت بأنها قد رحلت
ودعت دنيانا الكئيبة وفاضت روحها إلى بارئها

معلمتي مريم

تولت مهمة تعليمي مادة الأحياء لثلاث سنوات هي عمري في الثانوية

لم يكن يضاهيها أحد في علمها وأدبها الجم

كانت حقا مثالا للمربية الفاضلة صاحبة الرسالة

كانت الأحياء هي عشقي الثاني بعد اللغة العربية

وزاد حبي لها بسبب معلمتي

مازلت أذكر كيف آمنت بي

وجمعت لي صفوف ثالث ثانوي علمي جميعا

لأشرح لهم درس الأحياء

جلست مع الطالبات ووقفت أنا مكانها أشرح لهم ولها

قد لايفهم الجميع تلك العلاقة المميزة التي تجمع بين المدرسة والطالبة

قد ينسى البعض قدر المعلم ورسالته

قد تغيب صورة ذلك المربي العظيم عن الأذهان

لكن معلمتي

كانت حقا معلمة

رحمك الله معلمتي الغالية وجعل مقامك مع النبيين

أشهد ربي أنك قد أديتي رسالتك على أكمل وجه

وعلمتنا حقا كيف يكون المعلم وريثا للنبي

2009-10-25T11:07:00.001+02:00

شاب

2009-10-17T02:11:00.003+02:00

شاب نشأ في طاعة الله

الجملة دي سمعتها الاسبوع اللي فات وكأني أول مرة أسمعها

مع ان كلنا حافظين حديث السبعة الذين يظلهم تحت ظل عرشه يوم لا ظل إلا ظله

لاول مرة أسمعها الاسبوع اللي فات بمعنى جديد

يمكن لاول مرة أدرك اد ايه هي صعبة

فعشان كده استحقت الثواب العظيم من ربنا

ازاي واحد في ريعان الصبا

وحماسة الشباب وعنفوانه

الدنيا تفتح له ذراعيها مرحبة

لكنه يأبى

يهرب إلى عبادة ربه

كل الملذات والفتن أمامه .. حواليه ناس بتدعوه أنه يجرب

يغامر

يخاطر

يستثمر شبابه وصحته

قدامه عمر طويل يتوب فيه

لكنه ملتزم باب ربه لا يغادره

في الوقت اللي كل حواليه سلبيين عايشين لنفسهم

هو شايل هم الأمة وبيسعى عشان رفعتها

في الوقت اللي الناس بتضن بمالها على المحتاجين

هو يشاركهم أمواله لهم فيها حق معلوم

في الوقت اللي الناس لاتعرف فيه المسجد الا في الاعياد والجمع

مكانه في صلاة الفجر في الصف الأول يشهد له أنه لم ير أبدا أمامه غير ظهر الإمام

الأرض تشهد له بسعيه فيها

السماء تشهد على دموعه وابتهالاته

الاقصى رغم البعد .. يعرف يقينا أنه يحبه .. يعيش لأجله

شاب عف نفسه عن الحرام

عاش لدينه

ولربه

فكان مقامه

تحت ظل العرش

نحن وهو

2009-10-12T02:47:00.003+02:00

تأخرنا كثيرا لنكتب عنه ... عن الأهوال المحيطة به .. عن مشاعرنا تجاه ما يحدث .. لا لشيء إلا لأن الكلام يبقى دوما ضئيلا أمام

عظمة من نكتب عنه

لن يصنع كلامنا شيء له .. مادام حديثنا لم يقترن بعمل ..

تأملت كثيرا فيما يحدث .. في صمت الأموات الذي ظلل من يدعون أنهم أمة الإسلام وجيل النصر .. انتظرت عل غضبة تشتعل في

القلوب .. انتفاضة تثور خجلا لمقدس ينتهك أمام الأعين

قرأت تقريرا يخبر أن عدد المسلمين أصبح ربع سكان العالم .. أي أن كل أربعة منهم فرد مسلم

بحثت عن تأثير هذا العدد المهول لما يحدث في الأقصى ... لم أجد

نشاهد كل يوم عشرات القنوات الدينية الجديدة .. يطالعنا شيوخ كثر .. يتحدثون عن حب النبي وإتباع سنته .. ولا مانع من أن يتشاجروا

حول أمر فقهي اختلفوا فيه .. أهو واجب أم سنة عن النبي ؟؟

سمع صراخا أنقذوا الإسلام من هجمة تراد به .. بدأوها بمنع النقاب .. إنهم يستهدفون ديننا

أبتسم بحزن

هل اكتشفوا الآن أن الإسلام مستهدف ؟؟ هؤلاء الذين أذونا طويلا بشجار حول سنن الرسول

هل نسوا مسرى الرسول ؟؟

ما الذي سي

سعد الرسول – صلى الله عليه وسلم – أن تطبق سننه أم أن تطبق الفروض .. وتحمى المقدسات

يحمى المسجد .. الذي تشرف وحده من بين مساجد الأرض بأن اجتمع فيه الأنبياء والرسل جميعا من آدم عليه السلام حتى نبينا الكريم .. اجتمعوا ليؤدوا صلاة يأمهم فيها أشرف الخلق محمد - صلى الله عليه وعليهم جميعا – ليعلنوا للأمة هذا المسجد المقدس أمانة في أعناقكم حتى نلقاكم يوم القيامة

المسرى يدنس ونحن مازلنا في أوحالنا نتراشق همومنا الصغيرة

مازلنا نتشاجر .. ونصرخ ... لماذا لم يتحرك الإسلاميون ؟؟ لماذا صمتت الحكومات ؟؟ لماذا لم يخرج فلان أو علان

نبحث باجتهاد عمن نلقي عليه اللوم في صمتنا وعجزنا .. لابد أن هناك سببا خارجيا منعنا من النصرة والتحرك

نسينا أن السبب الرئيس هو نحن .. نحن

سبب العجز والصمت .. ننتظر دوما من يوجهنا .. يمنحنا الإذن لننصر مقدسنا .. ننتظر من يتحرك

لكن أن نتحرك نحن ؟ أن نأخذ زمام المبادرة ؟ أن نبدأ ولو بجمع التبرعات للقدس .. ليتمكن شعبها الصامد من شراء الأراضي ليزدادوا صمودا .. ليبنوا بيتا يقف صارخا ضد التهويد .. خاصة وأن رخصة بناء المنزل وحدها تتعدى ال40 ألف دولار

أن ننشر القضية .. أ

ن ندعم جرحى العدوان على غزة الذين مازالوا بين ظهرانينا .. أن نتحرك .. أن نعلن الغضب ضد تدنيس مقدساتنا

يبدو أن هذا صعب جد صعب .. على نفوسنا التي اعتادت الراحة .. اعتادت أن تسلم راية المبادرة لغيرها .. أن تكون مجرد بيدق في

لعبة شطرنج يحركها غيره

لن يعود الأقصى .. بشعارات نكتبها .. بتوحيد الحالة على الفيس بوك وأن نكتب لبيك يا أقصى .. لن يعود الأقصى بكلمات جوفاء تخرج في لحظة انفعال سرعان ما تخمد

لن يعود مادمنا مازلنا عاجزين بأن نصنع نصرا على أنفسنا ونجبرها أن تتحرك

تدع تفاهاتها وخلافاتها جانبا .. وتضع صوب عينيها أن الأقصى أولا

مستهلك

2009-10-04T00:34:00.007+02:00

تعبت كثيرا حتى حصلت عليه

زارت عشرات الأمكنة حتى تجده

لكن لذة الحصول عليه أنستها الآلام التي لاقتها حتى حازته

فستانها الأبيض

ذاك الذي ستختال به أمام آلاف الأعين

فستانها الأثير

ذاك الذي سيخلد في مئات الصور

سيظل مقترنا بأجمل الذكريات

ستريه لبناتها وحفيداتها

تحكي لهم عن قصة حب عظيمة توجها ذلكم الفستان

تتذكر كيف سارت متباهية به بين صويحباتها .. أنه لم ولن ترتديه سواها

هو لها وحدها ... ما شاركت به أحد

ذاك فستانها .. فماذا عن قلبها

مفيش بنت مبتحلمش بفستانها . وبيوم فرحها .. بتحلم بضحكتها وابتسامتها يومها

بتحلم بمشيتها وسط الناس وهي ماسكة في ايد عريسها .. وحاسه انها أسعد انسانة فالوجود .. مش بعيد كمان تكون رسماه ومصمماه من قبل ما تتجوز

متحبش أبدا تلبس فستان واحدة صاحبتها .. او فستان لبسته قبلها بنات كتير

لانها بطبيعتها البشرية بتحب كل جديد ومميز .. تحب ان فساتينها تكون بتاعتها لوحدها

متكنش مستعملة قبل كده ومستهلكة

ده الفستان

طيب قلبها ؟؟

بسأل نفسي دايما .. ازاي القلب المستهلك بيعيش سعيد

ازاي وهو محفور جواه .. الف كلمة حب من مئة شخص مختلفين

ازاي بنت ترتبط بفلان وعلان .. وتعيش مع كل واحد فيهم قصة حب طويلة ترسم فيها كل الاحلام والتخيلات عن حياتهم المستقبليه سوا وعن بيتهم واسامي عيالهم وكل صغيرة وكبيرة

بعدين تسيبهم وترتبط بواحد جديد تعيد نفس التجربة معاه وممكن فالاخر تتجوزه

وفرضا اتجوزته .. هتقدر تعيش سعيدة .. هتنسى كل اللي حصل ده ؟

مش هتيجي في مرة تقوله مثلا بحبك .. وتفتكر قالت الكلمة دي لكام واحد قبله ؟؟

ازاي هتشعر بسعادة انها لاول مرة في حياتها بتحب ؟؟

وهي حبت قبل كده بتاع 10 مرات

ازاي هتحس بسعادة اكتشاف مشاعر بتكبر جواها لاول مرة .. وهي قبل كده كررتها كتير

ازاي هتمسح من ذاكرتها كل الذكريات عن أحبتها السابقين

لو مرة راحت النيل .. مش هتفتكر ان قبل كده في المركب اللي واقف بعيد ده

ركبته مع فلان ؟؟

او المطعم الشيك ده دخلته مع علان

وفرضا زوجها مكنش غني .. وحبيبها اللي قبله كان غني

مش هتيجي لما يبقى نفسها في حاجة وزوجها مش قادر يجيبها .. هتقارن بينه وبين التاني ؟؟

زحمة الذكريات والمشاعر اللي ساكنة جوا قلبها .. كلمات الحب والغزل المطبوعة فنفسها .. ازاي هتمسحها

ازاي هتقدر تمنحه قلبها كله

وقلبها اصلا مش كامل

لان في اجزاء كتير منه أخدها التانيين

وازاي هو هيرضى .. يرتبط بقلب مستهلك ؟؟

جربه قبله ناس كتير ورفضوه ؟؟!

عاشوا لحلم باطل ... لكنهم عاشوه !!

2009-09-27T04:28:00.004+02:00

السلام عليكم ورحمة الله وبركاته

بداية الموضوع مش سياسي خالص .. عشان بس محدش يهرب اول ما يقرأ المقدمة :D

ندخل في الموضوع :

قرأت قريب خبر يعتبر قديم نسبيا

( افتتح يوم الأربعاء 18/4/2001متحف بجوار المسجد الاقصى في بدروم القصر الذي كان
يقطنه خلفاء المسلمين طوال القرن السابع الميلادي ، ويعرض المتحف بالكمبيوتر مشروع بناء معبد سليمان

على أنقاض الأقصى بتفاصيله الدقيقة

وكأن المشاهد يسير داخل المعبد فيرى فيه الزخرفة الذهبية للبوابات الرئيسية وأماكن دخول الحجاج اليهود)

نفس هذا المعبد أذيع عنه قبل افتتاحه بأربع سنوات فيلم وثائقي بيوصفه وصف دقيق

لدرجة حتى الأزياء اللي المفروض رجال الدين والمتعبدين فيه هيلبسوها

_________

مفيش إنسان مسلم أو مسيحي عربي مش عارف أن إسرائيل كاذبة وان الهيكل مش موجود تحت الاقصى
كما يزعمون .. أو إنها دولة احتلال

بس مش ده اللي بيتكلم عنه البوست

اللي بيتكلم عنه

هما عاشوا حلمهم لأي درجة

ازاي بيخططوا لكل خطوة في حلمهم

وازاي بينشروا للعالم كله الحلم ده عشان يعيشوه زيهم

يعني صمموا حتى الازياء اللي هيلبسوها

وطرق تعقيم الصالات اللي هيدبحوا فيها القرابين

هل احنا بنعيش أحلامنا بالشكل ده ؟؟

بنخطط لها كده ؟؟

بنتخيل لحظات نجاحنا بالصوت والصورة والألوان ؟؟

مش بس بنتخيل

هل عندنا خطط لحياتنا ؟؟

كل سنة فيها هنعمل ايه ؟؟

بعد مااتفرجت على حلقات خواطر للشقيري وشفت ازاي اليابان دولة عظيمة صاحبة اخلاق

الناس دي عايشة لحلم

كل واحد عايش لهدف وحلم

بس كلهم فالاخر عايشين لحلم كبير مشترك

الوطن

مصر

ازاي هنخليها أحلى بلد في العالم

ازاي هناخد بايدها ونخليها ترجع تقف مرة تانية

وترفع راسها بفخر وسط الامم

مفيش حاجة هتتغير في بلدنا

طول ما كل واحد فينا عايش عشان نفسه وبس

يوم ما نعيش عشان هدف كبير لخدمة بلدنا وديننا

ساعتها حياتنا هيبقى لها معنى

وموتنا هيبقى له معنى

وهنفضل سايبين بصمة ورانا مئات السنين

بس احنا نحلم

عيد سعيد

2009-09-20T19:18:00.001+02:00

كل عام وأنتم بخير

والأمة الإسلامية في نصر وعز وتمكين

22

2009-09-05T18:23:00.005+02:00

النهاردة قفلت صفحة سنة من عمري

وكتابها راح خلاص الخزانة ومش هيرجع تاني

ببص للي حصل السنة اللي فاتت
أحداث كتير جدا يمكن كانت أصعب سنة عشتها لحد دلوقتي
بكل المقاييس البشرية
بداية

بأحداث غزة

وبعدها اصابة أختي بسرطان نادر وخطير جدا

ورحلة صراع طويلة مع المرض

وبعدها زوجة خالي

ثم وفاة خالتي

وبعدها وفاة والدة صاحبتي

غير ابتلاء شديد منيت به في نفسي طول السنة اللي فاتت

حقيقي كانت سنة صعبة جدا

بس رحمة ربنا انه لما بيحطنا في مواقف صعبة
بيثبنا ويصبرنا من عنده

نفوسنا بتطلع بعدها مختلفة كتير عن الاول

حاجات بتروح مننا للأبد

وحاجات بنكتسبها معانا

بيبعت لنا الفرج من وسط المحنة

يخلينا نقابل ناس

فضلنا طول حياتنا نحلم اننا نقابلهم

بيدينا دفعة جديدة لقدام

ببص عالسنة اللي فاتت

وببص على سنة جديدة جاية

وبدايتها في رمضان

وبتمنى أنها يارب تكون أجمل وأحلى

وإني أكون فيها شخص استفاد من سنينه اللي فاتت

واني في سني ده ربنا يعتقني من النار

مفيش غير كده

2009-08-14T00:09:00.008+03:00

قريب كنت بتناقش مع أكتر من بنت في مواصفات شريك حياتهم

واحدة فيهم دكتورة بنت دكتور

والتانية متفوقة جدا في كليتها وبنت دكتور في الجامعه

استغربت حقيقي جدا طريقة تفكيرهم

واحدة كان متقدم لها عريس أقل منها اجتماعيا بكتير جدا

يعني والده مش متعلم وشغال شغلانه مش اد كده

وبتكلمني أنها هتوافق اصل مفيش غير كده

يعني ايه مفيش غير كده ؟؟

التانية بتقولي :

لازم نوسع آفاقنا

ونوسع المجال ومنضيقوش

مش لازم يكون متدين اهم حاجة يكون محترم

وعادي لو مشي مع بنات قبلي

اصل مبقاش في شباب محترمين عمرهم ما حبوا قبل كده

لازم البنت تقلل سقف مطالبها عشان تلاقي عريس

كلام غريب عجيب كده

والاغرب انه يصدر من بنات لسه صغيرين

أغلبهم في بدايات العشرينات

وعلى درجة عالية من التدين - أحسبهم كذلك ولا أزكي على الله أحد- وعمرهم ما كلموا ولاد ومحافظين على نفسهم

احتراما للقادم الذي مايزال في علم الغيب

ثقافة مفيش غير كده

او احنا هنلاقي منين

او لازم نرضى بقليلنا

بقت منتشرة في وسط البنات

وفي رأيي ده غلط كبير جدا

اولا : احنا بنعامل مين ؟؟

يعني انا لما بطلب زوج صالح بطلبه من مين ؟؟

بطلبه من أكرم الأكرمين الذي لا يعجزه شيء في الأرض ولا في السماء

يبقى ليه بتعامل كأني بشحت زوج او زوجة من هيئة حكومية فاسدة فهقلل مواصفاتي ؟؟

واول صفة ألغيها انه كان متدين .. عفيف

ايه المشكلة لما يمشي مع بنات الكرة الارضية

وفي الآخر يروح يتجوز واحدة كانت محافظة على نفسها عشان لا تخون ربها

ليه أرضى بالقليل وأنا أستحق الكثير ؟؟

ليه أرضى بالقليل خوفا اني أتأخر في الزواج مثلا

انا في الأول والآخر بتجوز لهدف

ليه ألغي الهدف وأنزل سقفه خوفا ان مفيش غير كده ؟؟

بحس كتير جدا ان مشكلة بنات كتير

ان محور حياتها واللي عايشة عشانه

هو

وبتعطل طاقاتها وقدراتها في انتظار قدومه
وهي مش عارفة هل هو جاي ولالا

بتوقف أعمال كتيرة جدا عشان حاجة في علم الغيب

وبتعيش في اكتئاب وحزن وعياط

مع انها كانت ممكن تعيش في تفاؤل وسعادة

وتجرب احلى متع الحياة

متعة العطاء

متعة العطاء لبلد وأرض وناس محتاجينا

محتاجين حد يساعدهم ويوقفهم على رجليهم ويحتويهم

محتاجين شعور حنان فقدوه لانهم أيتام

شعور حب محتاجينه لانه مرضى

بلدنا محتاجة كل فرد فينا

ايه المانع لو كل بنت مش متجوزة

وكل ولد مش متجوز

يشتغلوا اعمال تطوعية وتنموية

لحد ما ربنا يرزقهم

ايه المانع اننا حتى لو عنسنا

منحطش ايدنا على خدنا ونعيط على الزوج والاولاد اللي راحوا مننا

ننزل دور ايتام ونكون امهات لمئات الاطفال اللي محتاجينا

نشتغل في مجتمعنا ونوهب حياتنا عشان نغير فعلا

واهو رمضان جاي

وهو موسم لفعل الخيرات ومضاعفة الحسنات

نستغله السنة دي اننا نخلي لحياتنا معنى جديد

ومتعة جديدة

هي متعة العطاء

الاختيار

2009-06-23T00:53:00.003+03:00

nothing but the truth

فيلم بيتكلم عن حرية الصحافة

وأهمية حماية المصدر

بيحكي قصة صحفية اتحبست دفاعا عن حقها في حماية المصدر اللي أدلى لها بمعلومات

اتسجنت واتضربت لحد ما كانت هتموت .. وخسرت زوجها وحضانة ابنها

وفضلت مصرة على حقها في حماية مصدرها

الفيلم جميل جدا

بس اللي عجبني فيه - غير قصته طبعا المعبرة عن واقع الصحافة -

الواقع الانساني اللي فيه

انها اتحطت في موقف اختيار

يا تكشف مصدرها وتخون نزاهتها ومصداقيتها كصحفية

يا تبقى أم وزوجة وتختار حياتها الأسرية على حياتها العملية

ياترجع لابنها الصغير وبيتها

يا تقضي سنين في السجن حماية لحقها

هي اختارت طبعا حقها وشرفها ومهنتها

ووعدت ابنها ترجعله

السؤال بقى :

مع ام ضد موقفها ؟

2009-06-17T01:47:00.001+03:00

لابد من الألم

لكي نولد للحياة

وأصبح قريبا

2009-05-20T03:05:00.005+03:00

أيام قليلة وامتحانات كتيرة

بتفصلنا عن التخرج

بعد عدة أيام هنصبح إن شاء الله من عداد الخريجين

هنتخرج بشهادة إننا درسنا الاعلام

قضينا 4 سنين من عمرنا بندرسه

سنين طويلة بأيامها

صعبة بتجاربها

عشناها عشان حلم ملك شغاف قلوبنا

الاعلام

اد ايه بحب الكلمة دي

بتملآني بسعادة داخليا .. بحب حلمي اوي

بعد أيام قليلة .. الحلم هيصبح حقيقة

هنكون خلصنا أول خطوة من مشوار الألف ميل

قدامنا لسه خطوات كتير .. ده أكيد

بس سعادة إننا أنجزنا الخطوة الأولى لامثيل لها

بفتكر أيام ما كان دخول الكلية مجرد حلم

حلم بعيد مش عارفين هنقدر نمسكه ولالا

حلم الحمد لله حققناه

ودلوقتي بنحطله اللمسات الأخيرة

هنتخرج خلاص

أفكار كتير جدا جوانا

توقعات كتير وآمال ومخاوف

خطط كتير جدا بنرسمها للخطوة الجاية

يمكن السؤال الوحيد اللي أنا واثقة ثقة عمياء من إجابته

هقدر أصنع إعلام ؟ هقدر أقتحم المجال بجد ؟

آه هقدر

قريب كنت بسأل حد يعرفني كويس :

شايف مستقبلي ايه ؟

قالي جيفارا البديري

سعادتي كانت لا توصف

لان مش بس الحلم واضح عندي

لا ده واضح حتى عند الناس اللي حواليا واللي عرفوني

أوعدكم إن شاء الله

إن خلال عشر سنوات على الأكثر

هكون مراسلة في قناة الجزيرة

هختم التقرير بجملة :

آية الفقي .. الجزيرة .. فلسطين

تخليت عنهم

2009-04-21T04:29:00.005+02:00

يظنون أن التخلي عنهم كان أسهل أمر في حياتي

وبأني بضغطة زر قد أخرجتهم من حياتي إلى الأبد

تظن أني حين أرى اسمها على هاتفي

لا تمتد أصابعي سريعة لمعاوة الاتصال بها

تظن أني حين امتنعت عن الحديث معها فعلت ذلك برضا عن النفس عجيب

يظنون أني حين استمعت لمبرراتهم الواهية لم أتألم

لم يتمزق قلبي وجعا

لم أخبرهم يوما بأن صداقتنا قد انتهت

حزمت أمتعتي ورحلت

رحلت ببساطة من حياتهم

يظنون بأنني فجأة اختفيت

لا يعلمون أني كنت أحزم حقائبي من شهور عدة

وكل يوم جديد أؤجل المحتوم

آمل أن غدا قد يكون أفضل

ساعات اليوم لم تنتهي بعد

ربما في الليل يعودون

يتصلوا

يهتموا

مرت أيامي ولم يحدث

كان لابد لي أن أرحل

بلا كلمة وداع

حبي السابق لهم يمنعني أن أخبرهم

بأنهم تركوا في القلب جراحا لن تندمل

حبي لهم جعلني أسكت وأنا أسمعهم يرحلون عني رافعين شعار

بعد يورث الصفاء
خير من قرب يورث الجفاء

حبي لهم جعلني أؤمن به

وها أنذا أطبقه

ولكن

أنا راحلة للأبد

ولا أظن يوما أن البعد سيورث الصفاء

لأن القرب لم يخلق فقط الجفاء

بل قتل القلب بقسوته

حب .. حرية ..انطلاق

2009-04-13T00:15:00.004+02:00

أوشكت على الوصول

أناملك امتدت تلامسه

تشكلت ابتسامة على شفتيك

قلبك يخفق فرحا

يخفق حبا

تتسارع خطواتك إليه

تفتح ذراعيك على رحابتهما لتحتضنه

لقد وصلت إليه

حققت حلمك

مش عارفة

2009-03-28T01:31:00.003+02:00

مش عارفة ليه بقينا جافين في مشاعرنا

ليه بقينا أنانيين مش بيهمنا غير نفسنا

ليه لما نغلط مبنعتذرش لا بنفضل نكابر

ونرمي الغلط على جميع الأشخاص ماعدا نفسنا

ليه بنبيع في لحظة

وبننسى في لحظة

ليه مبنفتكرش غير حقوقنا
وبننسى حقوق الآخرين علينا

ليه لما بنحتاجهم .. مش بنلاقيهم

ليه مبنقولش شكرا للناس اللي بتتعب مش عشان هي منتظرة جزاء

بس لانها بتحب العطاء

ليه مش بنقدرهم ونشكرهم ونحترمهم الاحترام الكافي

ليه بقينا بناخد أشخاص كتير في حياتنا أنهم أمور مسلم فيها

مش يمكن نصحى في لحظة نلاقيهم سابونا لوحدنا

ليه بنعتمد على مخزون الحب عند الطرف التاني

ونفضل نجرحه ونقول أصله بيحبنا فهيسامحنا

ليه بقينا وحشين كده مع بعض

فين نقاء المشاعر

فين الاحترام

الصداقة الحقيقية

الحنان

الثقة

اني أكون شخص يعتمد عليه

الناس لما تحتاجني تلاقيني

من غير ما يقولوا : أحتاجك

فين الإنسان جوانا

يارب يرجع

تعالوا نزره

2009-03-16T19:52:00.004+02:00

محمود هاني

طفل في الرابعة عشر من العمر

من ساكني حي الشيخ رضوان

أو كما يحب الفلسطينيون أن يطلقوا عليه شارع الموت

أثناء الحرب على غزة قصف مسجد في الحي

فهرع إليه يساعد في نقل الجرحى وإخراجهم من تحت الأشلاء

كان ينقل الجريح الثالث عندما قررت طائرة الاستطلاع استهدافه

استهدفته بصاروخ سقط على بعد عدة أمتار منه

ليوقع العديد من الشهداء ويصيب محمود

ظن المسعفون أنه قد استشهد

فنقلوه لثلاجة الموتى .. ظل داخل الثلاجة من الظهر حتى العشاء

جاء والده يودعه قبل دفنه ... وجده يحرك رأسه

مايزال محمود حي

محمود هنا ... جريح في مستشفى فلسطين القابعة في شارع الثورة في مصر الجديدة

فقد محمود عينيه إثر الإصابه ... وتشوه جزء من وجهه

أخبرني بالأمس أنه طوال الشهر الماضي لم يشعر أبدا بالحزن

حتى تيقن بالأمس أنه لن يبصر ثانية

سأله أحد الأطفال : أين عينيك ؟ لماذا لا تمتلك عينين ؟؟

لم يستطع الإجابة وبكى

أخبرته :

قل لهم عيني سبقتني إلى الجنة

عيني عند النبي تخبره أنه لأجل المسرى أنا ماعدت أبصر

2009-03-14T16:56:00.002+02:00

السلام عليكم

معرفش ليه حاسة أن المدونة بقت لوحة إعلانات

:D

بكرة الأحد الساعه 4 ونص

هطلع في برنامج شبابيك

على قناة دريم

إن شاء الله

عشان أتكلم عن مدونتنا وكتاب ( أنا أنثى )

اللي هيتفرج يبقى يقولي رأيه ايه فالحلقة

حفل توقيع

2009-03-02T01:27:00.003+02:00

حفل توقيع كتاب ( أنا أنثى )
اللي مدونتنا الكريمة شاركت فيه

يوم الثلاثاء

المكان
المركز الثقافى الدولى
17 ش السد العالى ميدان فينى الدقى
الشارع المقابل لشيراتون الجزيرة
اقرب محطة مترو انفاق محطة الاوبرا
الزمان
يوم 3 مارس الساعه 4.30 عصرا

يشرفنا حضوركم جميعا

شرف البنت

2009-02-10T00:06:00.006+02:00

(إن الذين يرمون المحصنات الغافلات المؤمنات لعنوا في الدنيا والآخرة ولهم عذاب عظيم يوم تشهد عليهم ألسنتهم وأيديهم وأرجلهم بما كانوا يعملون )

قعدت أتأمل في آيات القذف اللي ذكرت فالقرآن الكريم

والوعيد الشديد اللي فيها

ووصف ربنا للذين يرتكبون هذه الكبيرة

تأملت كثيرا لماذا هذا الوعيد الشديد

عقوبة وحد في الدنيا

وعذاب في النار في الاخرة

كبيرة تستوجب دخول النار فالاخرة

فكرت

ربنا سبحانه وتعالى عادل .. رحيم .. رحمن

مطلع وعالم

عارف قلب البنت اللي هتتحط فالوضع ده هيبقى عامل ازاي

قلب مكسور

روح مظلومة

لا يخفف ألمها أي شيء في الدنيا

مهما طال الظلم أو قصر

داخلها زرع ألم عميق لا يختفي بمرور الزمن

عارفين شعور البنت لو لاقدر الله حد اغتصبها ؟؟

شعور أن أعز ما تملك قد تم تدنيسه

أنها مكرهة سلبت شرفها الغالي

شعور المقذوفة شبيه بهذا

عنوة قد تم تدنيس سمعتها

اتهمت ظلما وزورا بما لم تفعل

هناك من يحاول تدنيس كرامتها واعتزازها بما هي عليه

أنا أنثى

لكي أكون أنثى فخورة

أمشي مرفوعة الرأس بين الأنام

لعلمهم ولعلمي بأني شريفة محترمة ... لم يلطخ كرامتي أمر مهما صغر أوكبر

ما بالكم لو سلبت الفتاة هذا الفخر والكبرياء

ما كنه شعورها وهي تسير بين أعين تتهمها بما لم تفعل

هي المحصنة الغافلة التي لم تفكر يوما في أي أمر يسيء من كبائر وفواحش

غافلة ان في هذا العالم .. ذئاب بشرية مهمتها تحطيم نفسها

ما كنه شعورها ؟

وقد غرز قلبها بشظايا عميقة بهدف تفتيته ؟

هي تعلم ما هي عليه

واثقه أنه محض افتراء

ولكن الشعور بالظلم والمرارة والألم والكره لا يختفي

أتعلمون الشعور بأن تكون حيا ؟؟

كل ما فيك ينبض وتعبر فوقك جرافة بهدف تحطيمك

تسمع أصوات تكسر عظامك

تتفتت لقطع صغيرة من المستحيل تجميعها مرة أخرى

الألم العميق الساكن بداخلها لا توصفه الكلمات

تعجز المعاني عن إيضاحه

احتراق قلبها ومرارته لا يتخيله مخلوق

تموت في اليوم ألف مرة

قلبها يطعن ويطعن مرارا وتكرارا .. حتى يستنزفه الوجع

روحها تهشم وتحطم

تتصادق الدموع وعينيها

ماعادت تبصر الدنيا الا من خلال دموعها

تتآلف روحها والوجع فلا تعود تحيا بغيره

تملأ الدنيا صراخا وعويلا .. لكن الألم لا يسكن

تتغير نفسها لتصبح ذات جرح غائر لا يندمل

ولا يزول أبدا عن خريطة تشكيلها

قد تسمع جميع الكلام العقلاني عن عدم أهمية هذا الألم فحقها لا شك عائد إليها

لكن كل هذا لا يجعل الألم يزول أو يختفي

رغم ثقتها في موعود ربها بالنصر

إلا أن قلبها المكلوم يظل ينزف

حتى ترى الانتقام الشافي له

الله سبحانه وتعالى عادل ورحيم

يعلم كم أن قلبها سيتحطم ويتألم ويذوي

فوعدها بأن يرد لها حقها

في الدنيا والآخرة

غزة .. أشكرك

2009-02-08T01:57:00.002+02:00

من بعد حرب الابادة اللي حصلت في غزة

وانا مش عارفة أكتب

حاسة أن كلنا رجعنا لنمط حياتنا تاني وهننساهم

هننسى الاطفال

هننسى الارامل

هننسى المحرقة البشعة اللي حصلت هناك

حاسة أني مينفعش أكتب الا عنهم

كل حياتي لازم تفضل عشانهم

زي ما كانت أيامها

غزة وضحت لنا أمور كتير

غزة صحت الأمة كلها

غزة رجعت لي آية من جديد

آية اللي فقدتها من سنين

لقيتها بترجع تاني وقتها

بتصحى من سباتها الطويل

بترمي شخصيتها الغريبة اللي كانت لابساها

حسيت اني اتولدت تاني من جديد

كانت ولادة مؤلمة

انها متجيش الا من وسط الدمار وآلاف الشهداء

بس أنا بقيت آية مرة تانية

أحلام كتير كنت ركنتها عالرف .. حاولت أمسحها من وجداني رجعت تاني وبقوة

آمال كنت صنفتها مستحيلة عدت أؤمن بها من جديد

يمكن لاول مرة من سنين

أحس اني قريبة من حلمي جدا

وأحب مدونتي جدا

أحب أفكاري جدا

قضيت 3 أسابيع من حياتي وسط ناس

رجعوني لأنا

الجرحى الفلسطنيين

بجد

مهما كتبت عنهم مش هقدر أوفيهم حقهم

غيروا منحى حياتي

شفت يعني ايه الصمود والعزة

يعني ايه إنسان مختلف

الانسان اللي هو وهدفه حاجة واحدة

حياته متبلورة عشان هدفه

هو مخلوق لهدف معين

هيعيش ويموت عشانه

اد ايه هما رائعين

اد ايه بجد هما راقيين وكبار

مهما كتبت مش هعرف اوصفهم

ربنا ينصرهم ويعزهم ويثبتهم

غزة

شكرا لك

غزة لن تسامحنا

2009-01-14T02:40:00.000+02:00

ونهرب إليه

2009-01-03T03:26:00.002+02:00

في أوقات النوازل

نهرع إليه

نتكأ بأحمالنا عليه

نختبئ بين يديه

نهرب من همومنا إليه

نرفع عيوننا له بخوف :

ماذا نفعل ؟

خبرنا ؟

ننتظر دوما منه العون

الأمان

الاحتواء

ننتظر منه أن يطمئن قلوبنا الوجلة بأن غدا أفضل

لا مكان لنا غير بيته

لا ساكن لقلوبنا سواه

لا نستطع ان نعيش يوما بعيدا عنه

والآن في أحداث غزة

في ليل الملمات الحالك هذا

لا ملجأ لنا غيره

يا الله

انصرهم فقد عجزنا عن نصرتهم

لمن نشكو مآسينا

2008-12-30T22:07:00.005+02:00

لمن نشكوا مآسينا؟

ومن يُصغي لشكوانا ويُجدينا؟

أنشكو موتنا ذلا لوالينا؟

وهل موتٌ سيحيينا؟!

قطيعٌ نحنُ .. والجزار راعينا

ومنفيون ... نمشي في أراضينا

ونحملُ نعشنا قسرًا .. بأيدينا

ونُعربُ عن تعازينا ... لنا .. فينا !!!

فوالينا

ــ أدام الله والينا

ــ رآنا أمةً وسطًا فما أبقى لنا دنيا

.. ولا أبقى لنا دينا!!

ولاة الأمر

.. ما خنتم .. ولا هِنْتمْ

ولا أبديتم اللينا

جزاكم ربنا خيرًا

كفيتم أرضنا بلوى أعادينا

وحققتم أمانينا

وهذي القدس تشكركم

ففي تنديدكم حينا وفي تهديدكم حينا

سحقتم أنف أمريكا فلم تنقل سفارتها

ولو نُقِلتْ.. لضيعنا فلسطينا!!

ولاة الأمر

هذا النصر يكفيكم ويكفينا

تهانينا

للشاعر احمد مطر

الحب

2008-12-21T17:54:00.004+02:00

يبدأ اليوم أبي عامه الثالث خلف القضبان ...غائب عن عيني حاضر في قلبي

هذه كانت جملة كتبها ابن أحد المعتقلين عنوانا له على الانترنت

المعتقلون على ذمة القضية العسكرية

تبدأ وتنتهي أعوامهم في السجن

لا لجرم ارتكبوه سوى

حب مصر

أخذت أتأمل وأفكر فيما وصلوا إليه

لابد أنه أحبها كثيرا

هام بها عشقا

شغفت حنايا قلبه

سهر ليال طويلة يخدمها ويرعاها

عمل أياما كثيرة

ليصنع لها مستقبلا مشرق

ولأنه يحبها

فلابد أنه ربى أبنائه على حبها

ذهبت بفكري إلى زوجته

تلك الصابرة على فراقه

تراها أحبتها هي أيضا ؟

أغلب حبها في قلبها حبها لزوجها

فسعدت بالبذل والعطاء والتضحية

هل علا صرح الحب في القلوب

حتى هانت كل التضحيات

مصر

فلسطين

الوطن

كلها مرادفات للحب الأكبر

تختلف الطرق في إثبات الحب

أزيل الأذى من الطريق

أحافظ على نظافتها

لأني أحبها

أعتني بفقرائها ومرضاها وأيتامها لأني أحبها

أتزوج وأبني بيتا سليما معطاءا لأني أحبها

أحارب لأجلها لأني أحبها

أسعى لحريتها لأني أحبها

الحب

المحرك وراء كل أفعالنا لأجلها

مصر

أن تعيش لأجلها

ولأجل مستقبل حر لها

تعيش لغاية أكبر من نفسك وطموحها ومطالبها

تلغي الكثير من ذاتك

لأجل محبوبتك الأغلى

بحبك لها

تجعل لحياتك أكبر قيمة

تختلف ألوان حياتك

تصبح أكثر إشراقا

لكل فعل صغير في حياتك يظهر معنى أكبر

حبك سيكبر

روحك ستحلق

عقلك سيبدع

زواجك سيثمر

موتك سيخلدك

فتاة مختلفة

2008-12-17T00:59:00.003+02:00

لست كأي فتاة في مثل سني أحلم بزوج وأسرة ولكني أحلم بسيف وبندقية .... برشاش ومدفعية
لا أحلم ببيت مستقر يلفه الود ويعشعش فيه الحب والطمأنينة .... بل أحلم بكهف أسمع وأنا داخله صوت الرصاص
وأشم عبق البارود ...أحلم بحياة المطاردة والجهاد ... أحلم بالشهادة والاستشهاد

لا أتخيل نفسي فتاة تتسارع نبضات قلبها ويرتجف فؤادها لأجل الحب ... بل أرى نفسي فتاة تتسارع نبضات قلبها حين يلاحقها جيش العدو ... حين توضع في رأس قائمة المطلوبين ..
يرتجف فؤادها حبا وهي تسير الى الشهادة بقدميها مطوقة خصرها النحيل بحزام ناسف استعدادا للحظة الرحيل عن أرض الغربه لتحط رحالها مع الشهداء في الجنة ....
لا أرى نفسي أما للأطفال أو مربية للأجيال ولكني أرى نفسي أما لثرى الارض أدافع عنها كما تدافع اللبؤة عن أشبالها

الصغار ..
لا أرسم أحلاما وردية لفارس أبيض يأتيني ممتطيا فرسه ليأخذني الى عالم السعادة الخيالية ..بل أرسم لوحة قد يراها البعض دموية ...
لوحة ليومي الاخير على الارض التي أحبها كما لم ولن أحب يوما ... أرسم صورتي ودمي متناثر حولي وأشلائي ممزقة في الارجاء ... وحولي المئات ممن استطعت قتلهم - بمشيئة الله -
لأمتطي فرسي الأبيض ملتحقة بالقافلة الطويلة الممتدة منذ آلاف السنين... وأسير جنبا إلى جنب مع كل الشهداء الذين سبقوني
وأحببتهم طوال فترة حياتي على الارض الفانية ... واتخذتهم قدوة ..
ذاك حلمي ... فهل ياترى يظل مجرد حلم ؟؟؟

تعبانة

2008-12-08T23:07:00.002+02:00

تتشابه الايام والساعات فماعدت أعرف في أي يوم أنا

لاسمة مميزة لهم سوى الحزن .. الحزن الشديد .. عشش في قلبي واستوطن

لاقدرة لي على إخراجه وهو لايريد الخروج

يلومني الجميع من حولي ... يتهمونني أني أستلذ بتعذيب ذاتي .. اعجبني ثوب الحزن فتوشحته

القليل من الثقة بالنفس وأخرج من شرنقتي فراشة سعيدة تحلق في الدنيا من جديد

لا وجود لهذه الفراشة .. فقد قصت أجنحتها وماعادت تجيد الطيران

سقطت جريحة بلا جناح .. غلفت نفسها بالشرنقة آملة أن تدواي جرحها

تضمد أجنحتها المقصوصة المليئة بالطعنات

ينتظرون مني أن أبتسم .. أن اكون سعيدة .. أن أغرد .. أن أنسى

النسيان .. أمنية مستحيلة بعيدة المنال .. لو كنت أملكها ما ترددت لحظة في دخول جنتها

سئمت الضغط يحيط بي .. سئمت النظرات المترقبة لسعادتي من جديد .. سئمت اللوم .. سئمت التوسل

سئمت النصيحة

لا أحد يدرك كم أتمنى أن أعود لذاتي

أن أنفض همومي كأن لم تكن

أن أعود الفراشة السعيدة

الشخصية القوية المتماسكة

أعود لأحلم وأعيش أحلامي من جديد

أن أتمكن من التواصل مع عالم البشر

أن تودعني الدمعات

أن أضحك

ولكن ما باليد حيلة

فالظلم أنهك قواي .. وملأني رغبة بالانتقام

أنتقم ممن حولني لشخص لا أعرفه

لعلي حينها أعود إلى ما أعرفه

حسبي الله ونعم الوكيل في الظالمين

2008-12-01T22:17:00.003+02:00

لبيك اللهم لبيك

لبيك لاشريك لك لبيك
إن الحمد والنعمة لك والملك

لا شريك لك

أصوات الحجيج تعلو بالنداء

تبتهل بالدموع

يهرولون نحو رب غفور رحيم

تتعلق أعينهم بالكعبة

راجين الجنة

طالبين المغفرة والعفو والعتق

قلوبهم ذابت شوقا للبيت

فكان الارتواء للقلوب الظامئة

بحج البيت

يتحررون من ذنوبهم هناك

يغتسلون منها في أقدس البقاع على وجه الأرض

ونحن هنا بين الارائك والوسائد

تثقلنا الذنوب

نتمنى التوبة

العودة

أن نهرب من هموم الدنيا لجنة القرب من الله

نغبط كل حاج قد تلفح بإحرامه

كل حاج سالت أدمعه في عرفة

كل حاج روى شوقه بنظرة للكعبة

يارب

لا تحرمنا زيارة بيتك الحرام

ارو شوق قلوبنا لروحانية بيتك

اغفر لنا في عرفة

وإن لم نكن هناك

فقد باعدت بيننا الأميال

أزف بدون أبي

2008-11-22T17:41:00.002+02:00

كل فتاة تحلم بيوم عرسها
بزفافها
وفرحتها

تحلم بأن تمسك بيد والدها ليسلمها لشريك مستقبلها

تحلم بنظرة الفخر والسعادة في عيني والدها

وهو يرى صبيته الصغيرة قد أصبحت عروسا فاتنة

لا تتخيل عرسها أبدا من غير حبها الكبير

والدها

ماذا لو تزوجت من غيره ؟

زفت لشريكها من غيره؟

افتقدت نظراته وضحكاته السعيدة بها

افتقدت وجوده في أهم لحظة من لحظات حياتها

لا لوفاة

بل هو حي يرزق

لكن النظام أصر على وضعه خلف القضبان

أن يحرمه من لحظات السعادة الصادقة مع أسرته

يحرمه من أن يمسك بيد محبوبته الصغيرة ويراها تكبر أمام عينيه

يحرمه من أن يهمس في أذن عريسها بكلمات قليله يوصيه بها خيرا بابنته

يحرمه ويحرمها

من سعادة لا تتكرر الا مرة وحيدة في العمر

يخلق لهم سعادة منقوصة مشوهة

سعادة ممزوجة بطعم الألم والفراق

لا لذنب

إلا أنهم متيمين بعشق مصر

سارة خيرت الشاطر

عرسك من غير والدك الشريف مسمار يدق في نعش نظام

تعفن لفساده

سارة :

لا تحزني فالجنة غالية

عوضك الله عن كل لحظة ألم بسعادة مطلقة في الجنة

وجمعك مع فاطمة بنت محمد - صلى الله عليه وسلم -جزاء لصبركم وحبكم لمصر

غزة ... لك الله

2008-11-15T23:29:00.003+02:00

فلسطين أي كلمات أملكها كي اكتب عنك ... أي حروف قد تطاوعني لأصوغ مشاعري نحوك ...

أتوسل إلى فرشاة رسمي بأن تبدع لوحة تنثر فيها ما احتواه القلب تجاهك لسنين ولم يستطع يوما أن يعبر بصدق عنه ..

فلسطين ... أواه يا فلسطين كم أشعر بالألم وقيود العجز تكبلني تقيدني الى أرض غيرأرضك رافضة السماح لي بالتحليق نحوك ...

دموعي تترجى كلماتي بأن تكتب شيئا أي شيء مهما كان صغيرا .. فالقلب أنّ بحمله الثقيل ..

أن أراك يوميا ترفلين في ثوب الاسر .. دموع أطفالك وآهات نسائك تحيط بأقصاك تزيد من ألمه وحزنه فيرتفع الآذان فوقه حزينا كليلا ...

مخبرا إيانا :أيها العاجزون المكبلون بذنوبكم وأهوائكم ... حتى متى ؟؟ حتى متى تتركونني في قيدي وحزني .. تسيل دماء ابنائي ثمنا لصمتكم ..

حتى متى ؟!! ألست بمسرى نبيكم ؟ ألا تخفق قلوبكم بحب نبيكم ؟ كم تغنيتم بحبه وعشقه ؟؟

أين ذاك العشق وهذا الهوى وأنتم تبصرونني أقتل كل يوم .. أطعن بيد قذرة تود لو تهدمني لتقيم حفلا ماجنا على أنقاضي

لا تؤذيني تلك اليد القذرة بقدر ما تؤذيني أيدي أبنائي التي امتدت لتصافح أيديهم ... تعاونوا وتكاتفوا ضدي .. جبنوا عن

المواجهة ... وخارت هممهم عن التضحية ... وتركوني وحيدا في حزني وألمي ..

حتى متى يا أمة الأسلام تتوشحين بثياب الذل والمهانة ... أليس فيك فرد يخفق قلبه بحبي ... فيأتيني وروحه على كفه ليخلصني من قيود الصهاينة التي حاصرتني لنصف قرن ؟؟

أن أراك يوميا هكذا ... وأسمع تلك الكلمات تتردد وتتردد أمامي فاضحة عجزي .. وزيف حب بغير تضحية ...

أتمنى حينها لو كنت حجرا من حجارة أرضك تتداولني أيدي أبنائك قاذفة بي في وجه العدو الغاصب ..أو لو أني جدار في منزل يختبىء خلفي مجاهد ينتظر اللحظة المناسبة ليقوم بهجومه ضد العدو ...

أو لو أني ذرة تراب تحملني الريح لتسمح لي بالتسلل إلى عين ذاك القناص علّي أشغله قليلا بآلام عينه حتى يهرب الاطفال من الطريق مضيعة بذلك فرصته لقتلهم

أتمنى لو أني أي جماد على أرضك على أن أكون أنسانة عاجزة لا تستطيع شيئا لنصرك

عيش حلمك بالالوان

2008-11-09T22:48:00.002+02:00

كلنا تابعنا أوباما ونجاحه في الوصول للبيت الابيض

يمكن غالبيتنا تابعوا رحلة وصوله

وعرفنا حاجات كتير عنه كشخص

بغض النظر عن سياسة أوباما واتفاقي او اختلافي معه

بس أوباما عاش حلمه بالالوان

وهو طفل صغير كتب أمنيته انه يكون رئيس أمريكا

مدرسته سخرت منه

بس الحلم داخل نفس الطفل ده كبر وأصبح حقيقة

أكيد لاقى صعوبات كتير جدا

بس في كل مرة تغلب عليها

فبقى الاول في التحديات

اول رئيس امريكي أسمر البشرة وأول رئيس لقسم القانون في هارفرد بردوا

عارفين شعور انك تعيش حلمك لأقصى درجة

تعيشه بالالوان

شايف أحداثه قدامك كأنك بتتفرج على فيلم بتحبه

العشاق دائما بيحتفظوا بذكرى او صورة لمعشوقيهم

بتفكرهم دايما بيهم

احتفظ دايما بصورة للحلم

لما تكتئب أو تزعل تشوفها قدامك

فتعينك وتمدك بالقوة

لما تنهك قواك تشوفها فتشد من عزمك

انت عندك هدف .. مصمم توصله وهتوصله

الناس حواليك بتحاول تحبطك .. تقلل من عزيمتك

واقع الحياة بيعاندك

بيحاول يكسر مجداف مركبك

بس انت شايف انت رايح فين

ومصمم توصله

فهتوصله

رغما عن الجميع

ممكن في النص تضحي بحاجات كتير

باستقرارك

بأشخاص كانوا حواليك في يوم من الايام

بجزء من مشاعرك

بس المهم

انك هتوصل

استوحش

2008-11-03T22:18:00.003+02:00

أتدرك كنه الشعور بأن يبتسم الجميع من حولك لكن قلبك يأبى الابتسام

تشعر بأرواحهم تحلق سعيدة حولك ... لكن روحك مكبلة إلى نفسك تلتمس الدفء

يتسلل شعور الوحشة إلى قلبك .. يغمر البرد روحك ... ينسجان حولك وشاحا من التوق

تتوق إلى شيء لا تعرفه

لم تجربه يوما

لم تدرك كنهه بعد

لكنك تتوق إليه .. وبقوة

لا تسطع حياله أمرا فهو يغلبك

تستلقي على الوسادة تحدق في النجوم ... تبحث عن نجمة تنتظر منها أن تنير ظلمة ليلك

لاتجدها

تذرف دمعة ... ثم تنام

وحشتني مكة

2008-11-01T20:45:00.002+02:00

اللهم لا تجعل هذا آخر عهدنا ببيتك الحرام

ترددها كثيرا وكلك خوف بأن تتحقق ... تتلاحق أنفاسك ... ترددها مرة أخرى

تشعر بأن يدك تمتد لتتلمس استار الكعبة .. تتحسسها بأناملك ... تطبع صورتها في خلايا روحك

تنهمر دموعك ... تود لو تمد ذراعيك لتحتضن الكعبة محتويا إياها في قلبك

يعلو صوت نحيبك مع إدراكك أنك لابد راحل عنها وقد لا تعود

تتنمى أن تظل معلقا بأستارها طوال عمرك .... تلفظ انفاسك أمام أحجارها المقدسة

لكنك لابد راحل

تلتفت إليها مودعا ... تردد الدعاء باصرار أكبر

تجهش بالبكاء ... ثم تغادر

التحرش

2008-10-27T23:20:00.005+02:00

( ولا تخضعن بالقول فيطمع الذي في قلبه مرض)

(ذلك أدنى أن يعرفن فلا يؤذين )

اد ايه الآيتين دول جمال جدا

وعظيمتين جدا

وبيعالجوا مشكلة كبيرة جدا

التحرش والمعاكسات

موضوع شائك جدا موضوع التحرش .. وللأسف بقى منتشر بشكل خطير في مصر

وبطريقة تدعو للقلق والخوف

ومفيش أسس معينة يقوم عليها

فسواء كانت كبيرة في السن او صغيرة

محجبة او غير محجبة

حاليا التحرش بيطول غالبية نساء مصر

وتأثيره النفسي سيء جدا على أي بنت حتى لو كانت هي نفسها مش كويسة

لانه تعدي صريح على خصوصيتها

تعدي على شيء هو ملكها وحدها

فشعورها ساعتها هو الغضب والقهر والقرف

هو بيحاول يوصلها إنك شيء رخيص

وإنك ضعيفه وأنا بعتدي عليك

فبالتالي حتى لو كانت قوية إلا انها هتشعر ان في شيء في داخلها حد حاول يكسره

ومع الواقع المؤلم ده

وإن الشاب المتحرش مش بيفرق بين حد

كان في آراء بتطلع متطرفة على الناحيتين

رأي أن البنت هي وحدها تتحمل الخطأ

ورأي أن المتحرش وحده يتحمل الخطأ .. وحتى لو كانت البنت لابسه مش لابس -عذرا في اللفظ - مش من حقه يعمل كده

وأنا رأيي يقف بين الاتنين

البنت ضحية في الحادثة دي وده شيء مفروغ منه

بس أحيانا الشاب أيضا يصبح ضحية

عشان كده إسلامنا العظيم حط لنا حل

ربنا خلقنا وهو أعلم بمناطق الضعف فينا

ففي مرة قالنا في شباب في قلوبهم مرض فلا تخضعن بالقول عشان المرض ده ميتحركش

يعني مش أضحك بمياعه وأتكلم برقة مبالغ فيها وأقول مش من حقه يعاكسني

آه مش من حقه يعاكسني وفي المقابل أنا أتوخى الحذر لادراكي وعلمي ان في ناس في قلوبهم مرض

مش كل الناس بس في ناس

فمن حرصي على نفسي أحرص على ده

وحل تاني

حتى يعرفن فلا يؤذين

بيقولوا المحترم الناس بتعرف انه محترم فبالتالي بتحترمه

ربنا بيقولك هيعرفوا إنك محترمة فمحدش هيؤذيكي

ربنا سبحانه وتعالى بيحبك ومش عايز قلبك يتكسر او تمري بتجربة سيئة

محدش يؤذيكي

فقالك الحل ... حتى يعرفن فلا يؤذين

وتعرفي بايه ؟

( ياأيها النبي قل لأزواجك وبناتك ونساء المؤمنين يدنين عليهن من جلابيبهن ذلك أدنى أن يعرفن فلا يؤذين وكان الله غفورا رحيما )

سورة الاحزاب ... الآية 59

قالك ارتدي حجابك الصحيح اللي يوصل رسالة لأي شخص ان مش من حقك تؤذيني

الرأي اللي كان شايف ان التحرش اهانة للجسد وإنه جسدها وهي حرة فيه

ربنا أعلمك إن احترامك لجسدك هو حجابك

مينفعش تطلبي من حد يحترم شيء انت مش بتحترميه

يعرفن فلا يؤذين

وزي ما ربنا أمر البنات بالحجاب

أمرهم بغض البصر .. وكان تشديد الامر للرجال اكثر من النساء بالرغم ان الامر للاثنين

لان ربنا خلق كل واحد وأعلم بما هو أصلح له

المرأة الطبيعية يغلبها الحياء .. وغرورها الانثوي في كونها مطلوبة لا طالبة

الرجل تثيره المناظر فربنا قاله يصرف بصره

ربنا سبحانه وتعالى قدم لنا الحل

بس احنا اللي رغم وضوح الحل قدامنا

بنحب دايما ندور على حلول تانية

يارب نقدر نطبق الحل الصح

____________________

على الهامش :

أنا لا أقصد أبدا أن غير المحجبة غير محترمة

أنا أحترمها وأدعو لها بالهداية

بعتذر للجميع عن أي لفظ خادش للحياء في البوست

بس هو موضوع خادش للحياء اصلا :)

______________

تحية للمخرجة نهى رشدي اللي رفعت قضية عاللي اتحرش بيها

وتهنئة لحصولها على الحكم بحبسه 3 سنوات

_____________

البوست لا ينفي أبدا مسئولية الفساد اللي بيعيشه المجتمع في ظهور هذا المرض الخطير

اكيد الفقر والعنوسة وتأخر سن الزواج والبطالة والاعلام الفاسد

أسباب رئيسية في المرض

وهي أسباب ان شاء الله ستحل وإن كان الحل بطيء

لكن هذه الأسباب لا تلغي السبب الأول في الظاهره وهو فساد النفس الانسانية

واللي علاجها هو العودة الى من خلقها

أنا بنت

2008-10-22T22:00:00.008+02:00

لفترة طويلة من حياتي لم أستطع يوما أن أتقبل حقيقة أنني فتاة تحمل مشاعر الأنثى

لم أكن أحب أحاديث الفتيات ولا ألعابهن

حديث الحب وفارس الأحلام

كنت دائما ما أشعر بالغربة وسط مجتمع مليء بالفتيات

أنظر لنفسي مستغربة لما لا أعشق مثلهن ... لما لا تنتابني نوبات الاعجاب المجنونة في سني المراهقة

لماذا يسيطر العقل والمنطق على تفكيري في أمور عدة

لماذا أكره البكاء ؟؟

كنت أدرك دائما أني مختلفة ... ولعل ذلك ماجعلني دائما أرفض النظرة إلي كفتاة
لأني في داخلي مختلفة عن صورة الفتاة التقليدية التي ألمحها
لكني ذات يوم أدركت أنني .... بنت
بكل مشاعرها وأفكارها .. أنا هي
بالعقل ، بالمنطق ، بالغرفة المغلقة في قلبي ... بأفكاري الحبيسة داخل نفسي ... أنا هي
حبي الكبير للأقصى الذي كنت أستغربه أحيانا وأجهله أحيانا أخرى ... دليل ملموس على أنني هي
رفضي للألم والبكاء والانهيار ... يثبت أنني هي

شغفي بعملي .. يثبت أنني هي

غياب فارس أحلامي ... يثبت أنني هي

حلم حياتي .... جعلني هي
أنا بنت .... و أفتخر بذلك

الاحترام

2008-10-15T22:09:00.004+02:00

مؤخرا كنت بفكر في العلاقات الانسانية وأسباب نجاحها وفشلها

وايه العمود الثابت في أي علاقة اللي من غيره الدنيا مش هتمشي

ووصلت في رأيي أن العمود الثابت هو الاحترام المتبادل

مفيش ثقة من غير احترام

مفيش حب من غير احترام

مفيش صداقة من غير احترام

مفيش شراكة من غير احترام

الاحترام هو اللي بيخلينا نراعي مشاعر الآخرين فمش نجرحهم

هو الدافع في أي شراكة إني ماخدش خطوة من غير رأي شريكي لاني بحترمه

هو السبب في البقاء على علاقتنا مع من نختلف معه في الرأي لاننا بنحترمه رغم اختلافنا

اللي بيخلي الانسان يغير من سلوكه وشخصيته عشان ميجرحش الاخرين

هو احترامه لمشاعرهم

الاحترام هو السبب اني متكلمش عن حد في غيابه

مجرحش في حد وأنقص من قدره أمام الناس

هو السبب اني مهما اختلفت مع الشخص ده لا أذكره الا بالخير عشان صورته لا تتشوه أمام أي إنسان رغم اني ممكن اكون زعلانة منه جدا

احترامي للاشخاص اللي بحبهم وبقدرهم هو السبب أني آخد رأيهم في أمور حياتي

حتى وإن كنت أرفضها باخدها عشان أظهر لهم احترامي لوجودهم في حياتي

الشعور الناتج عن فقدان الاحترام في العلاقات شعور سيء

انك تحترم شخص جدا وتكتشف أنه لا يبادلك هذا الاحترام .. او يبادلك ربعه مثلا

شعور سيء بيؤثر على أفكار كتير داخلك

على نظرتك لنفسك وحكمك للامور

لان الشخص اللي بتحترمه لا يحترمك

في داخل كل إنسان منا إنسان شغوف وحساس حتى لو لم يظهر ذلك

مفيش إنسان مجرد من العواطف

مراعتنا لهذا الانسان الشغوف في الداخل ومحاولتنا الاعلاء من قدر مشاعرهم

ده أكبر احترام له في نظري

ياريت دايما نحترم بعض :)

ارحل

2008-10-10T22:51:00.003+02:00

أفلته من بين يدي .... حررته من كل وعوده

أغلقت خلفه الباب ولم أذرف أمامه دمعة

تأملته راحلا ولم أترجاه أن يعود بكلمة

وما إن غاب ... حتى سقطت أقنعتي ... تفجر حبي وتوقي

لن أدعي كذبا حين أقول أني بكيته بكل دموعي حتى لم يبق في جفني دمعة

رافقني طيفه في كل أحلامي مؤرقا سهاد ليلي

ظللت أتذكر .. صوته .... همساته ... ضحكاته ... نظراته

وددت لويعود ..

تمنيت أن يعود

لكن كان عليه أن يرحل

وجب عليه أن يرحل

لا لشيء ..

إلا لأني أحببته ..

ارحل

عيد سعيد

2008-10-03T03:42:00.003+02:00

كل عام وأنتم جميعا في طاعة وسعادة

احنا بنفكر نبقى نغير التهنئة

وتبقى

كل سنة واحنا وانتوا عوانس :D

رحيم

2008-09-25T14:22:00.005+02:00

من أسمائه عز وجل

الرحمن الرحيم

جميعنا نستشعر نفحات رحمته في كل فترة من فترات حياتنا

مع ان رحمته دائما ما تكون محيطة بنا

نستشعر رحمته في الابتلاء

في وقت المصائب

حين تتقاذفنا أمواج الحياة

تتخبط سفينتنا في بحر لجي

تبحث عن ملجأ لا تجده الا عنده

تهتف بقلبك : يارب

فتجد رحمته محيطة بك من فورها

قد يطول أمد البلاء

فتعيش فيه ردحا من عمرك

وعلى رغم طوله فإن رحمته تحيط بك من كل جانب

يرسل لك السلوان والصبر دوما

لا يتركك تعاني البلاء وحدك

بل يساعدك على تجاوزه

لأنه رحيم

رحمته وسعت كل شيء

خلقنا بشر خطائين لكنه يقبل منا العمل على صغره

يعفو ويصفح

وحين يبتلينا ليطهرنا

فإن رحمته تشملنا على الرغم من ذنوبنا

يارب لك الحمد

لك الحمد الإسلام

وعلى أن جعلتنا نعرفك ونؤمن بك

يا رحيم