Monday, May 5, 2008

شوية أفكار




مبدئيا كلنا متفقين على أن الزواج ده سنة من سنن الحياة

وهو حياة بحد ذاته

واحيانا كتير بيكون هدف للانسان

أنه يبنى أسرة تخدم المجتمع وتضيف ليه

وبيكون شايف أن نجاح أسرته ده نجاح ليه .. وأنه نجاحه شيء نابع من أسرته


بس تخيلوا لو كان الزواج عائق في سبيل أهدافك وأحلامك هتعمل ايه ؟؟


هتقولوا لي ازاي الزواج يكون عائق


انا في البوست ده هشرح ازاي هو عائق

انا هتكلم من خلال المجتمع اللي أنا عايشة فيه

اللي هو مجتمع كلية الاعلام

بالاضافة لتجارب ناس من حواليا


يعني نقدر نقول ان البوست هيكتسب نظرة شخصية في معالجته


أفتكر أني أول ما قررت أدخل إعلام

اتقالت لي جملة غريبة اوي ومن ناس كتير :

قدامك خيارين :

يا تشتغلي في المجال ده ... يا تتجوزي
الاتنين ميجتمعوش
طبعا انا كنت مصممة عالكلية فيعني لو كان اتقال لي ايه مكنتش هسمع لحد

ودخلت الكلية وأنا حاطة هدف اني عايزة أشارك في صناعة اعلام اسلامي حر


بس بردوا مازالت الكلمة دي بتتكرر لي كتير اوي

من أي حد يعرف أني ناوية أشتغل مراسلة أو مخرجة أو صحفية أو منتجة

وأني ناوية أكرس حياتي للموضوع ده

وكأن الزواج والاعلام لا يجتمعان

واحدة صاحبتي

صحفية كبيرة بتسافر برا وبتروح وتيجي


لحد النهاردة مااتجوزتش


وآخر عريس جالها كان شرطه : سيبي الشغل !!


ممكن تقولوا أني بهول الموضوع


وان عادي في زوجات عاملات كتير

أنا هنا بفترض أني مش عندي مواعيد عمل تحكمني ... وان ظروف العمل والاخبار والتصوير هي ما تحكمني

صاحبتي التانية متخرجة من كلية طب

وحاليا بتشتغل نائبة او حاجة كده مش فاكرة

بس شغلها ده يقتضي أنها بتبات في المستشفى أكتر من يوم

ومش مسموح لها طوال مدة زمنية معينة أنها تبات ولا يوم خارج المستشفى

وبردوا محدش عايزها تشتغل

الغالبية بتستنكر أن الفتاة تكون عندها ساعات عمل غير محددة


أو تشتغل فترة طويلة


أنا شخصيا هدفي أني أكون مراسلة لقناة إخبارية او مخرجةعظيمة لأفلام عظيمة وآخد على شغلي في الحالتين جايزة زي اوسكار


وشايفة أن من حقي أني أكون ليا هدف كبير في حياتي وأحققه وأنجح فيه

بس في المقابل نظرة الناس للموضوع ده
بتخليني أستغرب جدا
انتي بنت ... ومهمتك الأساسية بيتك وأولادك
وانتي اللي هتصنعي الرجال اللي يقدروا يحققوا الاحلام دي

ومش لازم تحققيه بنفسك قمة الانجاز انك تولدي حد يحققه

وانك لو مش اتجوزتي هتندمي

والصبيان دي وظيفتهم مش انتي

وكلام كبير كده

ساعتها بفكر وبتأمل الواقع :

مش من حقي أني أقتحم مجال بشهادة الجميع احنا لسه متخلفين فيه وانجح فيه وأنصر ديني هناك


مش من حقي أني أكون طبيبة بتحمي مثيلاتها من النساء بدل ما يلجأوا للرجال


نادرا أوي لما بنسمع عن طبيبة جراحة عندنا في مصر او في العالم العربي

نادرا ما نسمع عن مخرجة كبيرة مسلمة

لما بشوف شيرين أبو عاقلة عالجزيرة

بفرح اوي

دي امرأة أثبتت للعالم معنى الاعلام كاشف الحقيقة

عمري ماانسى يوم مااتحاصروا


او لما الدبابة مشيت وراها


ولما الشيخ القرضاوي شكرها

ليه معندناش نماذج اسلامية كتير زيها

نسمع كتير اوي عن حرية المرأة ومشاركتها في الحياة السياسية

نيجي نبص

نلاقي الازواج اللي كانوا بينادوا بكده هم من الاشخاص اللي بيمنعوا زوجاتهم من المشاركة

دي نقطة

نقطة تانية


نظرة العريس المتقدم :

أولا : مش بيبقى متخيل يعني أنا ايه أنا بشتغل في مجال زي ده

مش متخيل أني بشتغل ممكن لوقت طويل

ممكن أبات بره البيت

ممكن أسافر لأسابيع

بشتغل في محيط مختلط لاقصى درجة

أغلب زمايل العمل إن لم يكن جميعهم هما رجالة

والاختلاط ده في مجالنا ضرورة وشيء واجب

مش هيتم العمل الا بيه

مش ممكن في يوم من الايام اتحاشاه أو أشتغل في بئية بناتية بحته

ممكن كتير أسافر مع زمايلي في الشغل
بينا لقاءات عمل كتير

يتخللها غداء .. عشاء .. أي حاجة

وده شيء بجد بيحصل

غير أني في الآخر هيكون ليا وضع في مجالي

بحضر مؤتمرات .. ندوات

زائد أن الحياة كلها هتختلف لو فعلا حققت هدفي وانتشرت عالميا

ولو حصل وتخيلنا أنه وافق على ده كله


أكيد هيبقى إنسان ( مريخي ) مش من على سطح الارض


ممكن نظريا تدي اللستة دي كاملة للعريس ويوافق


بس نيجي على أرض الواقع


أنا لسه في بداية المشوار

ايه اللي يضمني أنه مش بياخدني على اد عقلي


وانه هيرفض يشاركني تكملة المشوار من أصله


بفكر كتير
هل فعلا دي معادلة :

إما حياة مهنية ناجحة
أو حياة أسرية ناجحة

والاتنين لا يجتمعان


أنا مؤمنة أن مجال الاعلام ده جهاد في حد ذاته

بيتطلب مجاهدين حارسين للثغر

ومادام دخلته

يبقى حماية الثغر فرض عين عليا

ببص للمجاهدات القساميات

وبشوف نجاحهم


وبفكر ... هل زوجها لما اتقدم لها قالها : سيبي شغلك ؟؟


20 comments:

Miss. Sosa said...

هههههه لا ماليش نفس اعنس

جميل اوي الكلام اللي انتي كتباه وفكرك واحلامك وامانيكي

لكن لا تتعجلى الامور .. عايزة تبقي انسانه ناجحة في حياتك وشخصية مؤثرة في المجتمع اوك خلى ده هدفك واسعي لتحقيقه بس فى نقطتين

اولا انتي لو قابلتي حد وحبتيه بجد هترمي كل الكلام اللي بتقوليه ده وهتضربي بيه عرض الحائط وهيبقى كل همك انك تكوني مع اللي بتحبيه

ثانيا لو فرض وما قابلتيش وكلها جوازات تقليديه ماتستحقش التضحية وقعدتي اشتغلتي 10 سنين ولا حاجة وبقيتي مركز مرموق .. هتقعدي مع نفسك تلاقي نفسك وحيدة وكل صحباتك معاهم زوج واطفال وحياة وانتي مش معاكي غير شغلك ونجاحك هتحسي ان اللي حققتيه ده ولا حاجة .. لان الامومة غريزة ومفيش بنت هتنسي امومتها ديه او تتنازل عنها

عموما نصحتى بلاش تتعجلي الامور وبكرة الايام هتحدد نجري حياتك

تقبلي مروري وتحياتي

محمد مصطفى عبد الظاهر said...

كلام كويس .. وخلانى أفهم أحد أسباب انه ليه صممتوا انكم ماتكلموش على الماسنجر غير الولاد اللى تعرفوهم شخصيا !!
ومعناه انك بالفعل عارفة حل المعادلة الصعبة اللى طرحتيها
و هو انك تتجوزى واحد من الوسط الاعلامى برضو وطموحاته زى طموحاتك وممكن بالتالى يقدر وجهة نظرك
لكن أحب ألفت نظرك ان ده مش شرط ، وان منظور الشباب اللى قولتيه مش قاعدة عامة وله استثناءات
ومش معنى انك قصرتى اختلاطك بالشباب على محيط الدراسة والعمل فماقابلتيش غير النماذج دى يبقى دول عينة ممثلة لكل الشباب

وبعدين يا اختى الكريمة أحب اقولك احترسى لأنى من خلال اللى شوفته من كلامك دلوقتى وقبل كده اقدر اقولك ان اتجاهك الفكرى محتاج شوية تغيير علشان يبقى بالمرونة اللى توصلك لحلمك ان شاء الله
وأخشى عليكى انك لو تعرفتى لفكر الليبراليين يصادف فى نفسك هوى رغم توجهاتك الاسلامية ظاهرا؛ فتحصنى بالعلم

وعلى فكرة الجايزة اللى زى الاوسكار فى الصحافة اسمها جايزة بوليتزر :)

أروى الطويل said...

سلام عليكم ،، ازيك يايويو
كلامك ممكن يكون فيه شيء من الصحه إن مش اي حد هيوافق علي العمل الإعلامي
لكن اذا كان فاهم الإسلام بطريقه صحيحه ومتقبل للآخر فأعتقد أنه مش هيبقي عنده مشكله
الحاجه التانيه هي الإختلاط
الإختلاط في حد ذاته مش هو المشكله
المشكله في الضوابط اللي الإنسان بيحطها لنفسه
ولو هو حس انك بتتعاملي صح مع الناس مااعتقدش انه هيمانع
سلام يايويوتا
اشوفك علي خير

Nahla Abdul Rahman said...

بسم الله الرحمن الرحيم
اللهم صلي على محمد وعلى آل محمد كما صليت على إبراهيم وعلى آل إبراهيم
السلام عليكم ورحمة الله
ـــــــــــــــــــــــــــ

هههههههههههههههه
يعني عشان اكتب رد عليكوا لازم اعنس
ههههههههههه

طيب ولات يهمكم

الموضوع رائع يا جماعة
واكيد اي بنت في مجال الاعلام بتفكر ازاي تحقق النجاح ده


بس انا اعتقد انه ممكن يتحقق

مش مستحيل يعني لو مع حد متفهم

مزايا العقارية القابضة said...

أنا مؤمنة أن مجال الاعلام ده جهاد في حد ذاته


بيتطلب مجاهدين حارسين للثغر


ومادام دخلته


يبقى حماية الثغر فرض عين عليا


عجبني أوي الجزئية دي

متفقة معاك فيها

بس مش متفقة معاكي إني عايزة أعنس

:D

في الأول و الآخر كل شيء في الدنيا دي رزق

ممكن ربنا يرزقك و أنتي لسه معنستيش و لا حاجة حد فعلا يعينك تكملي مشوارك و هدفك في الحياة

و مفيش حاجة منهم تتعارض مع التانية

الله أعلم ربنا هيسير الأمور إزاي

و على كل ... لعله خير

david santos said...

Excellent post.
Have a good day.

mohamed said...

هما بيقلوك سيبي الشغل
وانا بقولك سيبك منهم

المهم يكون اللي هترتبطي بيه انسان ويكون بيحبك لو توافرت فيه الصفتين دول مش هتلاقي اي مشاكل بعد كدا

jessy88 said...

بصي يا يويو انتى ممكن تستغربي انى انا اللى هقولك الكلام دة لكن اسمعى بقى اولا : مش شرط عشان انجح انى ارمى حياتى الاجتماعية ورا ظهرى لأنى ببساطة لازم ارتب اولاوياتى بمعنى قد ايه انا هضيف للمجتمع لو اشتغلت كذا..مراسلة مثلا ؟؟وقد ايه هضيف للمجتمع لو خرجت ولد لو بنت مثقف ومستنير و متربي؟؟مش معنى كدا انى بقولك منشتغلش فى الاعلام ابداخالللص والدليل انى لسه قايلة لبسمة امبارح لو حدقاللى سيبي شغلك ومتشتغليش اصلا هقول لأ...ليه بقى هى دى النقطى الثانية:
انا برضه لازم اسال نفسي لو انا معملتش دة مين هيعمله ببساطة لو انا اعلامية (مذيعة او صحفية) بقدم جديد ومفيد مفيش غيري يعمله بت دماغ يعنى لو على الاقل انا متميزة فيه اكيد زوجى لازم يساندنى فى دة لو حاسس انى بقدم حاجة ودة لو واحد دماغ برضه وانا كدة كدة مش هتجوز واحد سطحى لكن اسماحيلي ايه الجديد لو انى مراسلة؟؟ميت واحد وراجل يقدروا يعملوا دة لكن العمل الفكرى مينفعش حد غيرك يعمله لكن التربية ..اسمحيلي الام ممكن تبقى اب لكن الاب عمره ما يعرف يبقى ام.....وشكرااا

Anonymous said...

اية

المعادلة مش صعبة اوى لان مافيش تعارض بين الجواز والشغل بس اهم حاجة تنظمى حياتك صح...ومتهيألى انتى تعرفى تحليها كويس ..بس لما تحليها ابقى اعزمينى..

محمد

وخلانى أفهم أحد أسباب انه ليه صممتوا انكم ماتكلموش على الماسنجر غير الولاد اللى تعرفوهم شخصيا

على فكرة يمنى مش محتاجة تعمل كده عشان تتجوز بس كل الحكاية انها مش لتحب الدخلاء


امانى القداح..

Anonymous said...

أكبر واشهر دكتورة في أوروبا

كانت عانس

وعندما سئلت وكان عمرها السبعين عام


ما نصيحتك للفتيات الصاعدة

قالت: الزواج وتربية الاسرة

لانو مافيش حاجة تسد محل الزواج والاولاد

Anonymous said...

السلام عليكن

لو كانت الخلافة الاسلامية قائمة

هل كان مسموح للفتيات بالعمل ؟؟

مسموح للفتاة تعمل مدرسة أو دكتورة طب أو ممرضة

غير كده مش مناسب الها خالص

لو كده نقبل أما غير كده تجلس بالبيت احسن ليها

عمرو عبد الباري said...

ياه.. كل ده كلام...الموضوع كبير...أنا اختلف معكي كثيرا في ذلك....عند اتخاذ أي قرار لا بد من 6 أشياء
1- الايجابيات:وهي هنا واضحة أنك ستكوني مشهورة ومتميزة و.... كما ذكرت
2- السلبيات : عدم الزواج أو زواج غير مستقر وعدم استطاعة تربية الأبناء تربية اسلامية وعدم القدرة على ادارة المنزل ادارة صالحة
2- النقاط المثيره : وهي هنا واضحة وان اراء كل من سبقوكي يرفضون ذلك بناء على تجربة
3-القوانين : واعتقد ان القوانين هنا واضحة وهي القوانين الشرعية الاسلامية .. وقضية الاختلاط والسفر الطويل بدون محرم.. و...... الخ مما تعرفينه
4-الأولويات: واعتقد ان اولويات المرأة هي الوظيفة التي خلقت من أجلها.. وهي تربية الأبناء.. والمحافظة على البيت المسلم وتشجيع الزوج واعانته لكي يصبح ناجحا في حياته
(ولو راجعنا الفتوى الخاصة بعمل المرأة لوجدنا اجماع الجمهور على ان عمل المرأة لا يجوز الا للضرورة ) وأين الضرورة
5- الأهداف: واعتقد ان هذا سيؤخر الهدف العام لأنه كما قالت لك زميلتك وظيفتك هي تخريج الرجال التي تحقق هذه الأهداف
6- المعوقات : وأعتقد انه لا سبيل اللى اعتبارها في مناقشة هذا القرار
أعتقد أن رأيي الآن ظهر.... اذا استطعت اعتبار جميع العوامل السابقة فقد اتخذ القرار نفسه سواء بالايجاب او بالرفض
***تقبلوا مروري

محمد شوشة said...

بجد تدوينة ممتازة ربنا يبارك فيكوا يا سيادة اللى ناوية تكون مراسلة او مخرجة قصدى آية طبعا والاستاذة العظيمة يمنى الشركاء الأعزاء فى المشروع الاول من نوعه وهو التحريض على العنوسة
أولا : ادعوا ربنا انى مبقاش مسئول لأن ده لو حصل هخلى عقوبة اللى يحرض على العنوسة الاعدام جوازا : يعنى اخليها تتجوز غصب عنها من واحد غبى ميفرقهاش عن أخوه
لسبب بسيط جدا : انتوا قررتوا تعنسوا براحتكوا بس ليه تحرضوا البنات اللى زى القطط المغمضة على الكلام ده : هو لما البنات تقرر تعنس احنا نروح فين؟؟؟؟
ثانيا وده الأهم : انا نفسى كنتى تكلفى نفسك وتسأليها س}ال صغنطوط جدا: ياترى شيرين ابو عاقلة متجوزة ولا قررت تكون عانس زى حضراتكوا؟؟؟؟؟
وياترى لو هى عانس العنوان بتاع مدونتها ايه علشان نفسى أزورها وأطوف حوالين المدونة سبع لفات وأقول .................
واخر كلامى سلام
مش كده ولا أييييييييييييييييييييه؟؟؟؟؟
وأيييييييييييييييييييييييييه

ammar said...

فى الاول سلامو عليكو
انا كنت هاكتب كلام كتيييييييير
بس من الاخر كده
لو بصيتى قبلى بتعليقين
هاتلاقى تعليق اخونا عمرو عبد البارى
لخص القصة كلها
وقال اللى فى نفسى وزياده كمان
بس حتة ان الاعلام جهاد
وانك هاتبقى على ثغر
فانجاب الاولاد وتربيتهم تربية صحيحة
فى وجهة نظرى ...ثغر اكبر من الاعلام
تحياتى
عمار

فلسطينية الهوى said...

ربنا يكرمكم جميعا على آرائكم

اللي بحترمها سواء كانت مختلفة او متفقة معي

أنا مش هرد على مشاركة مشاركة

أنا هكتب بوست آخر توضيحي يتضمن رأيي في الآراء المعروضة

ووجهة نظري الشخصية

مش عارفة ممكن يمنى ترد ولالا

هبقى أسألها

جزيتم خيرا مرة أخرى


ومنورين المدونة

Amr said...

أنا بس عايز أقول حاجة
ممكن الشيخ القرضاوي نفسه (وممكن لا الله أعلم) يشيد بشيرين ابو عاقلة للصبح، لكن ميرضاش بنته تبقى زيها مثلاً، أو مراته بلاش بنته
ولو القرضاوي يرضى الناس مش هترضى، في حين انها هتشجع نفس النموذج
لسة كنت بتكلم مع صديقة النهاردة وكل طرف اشتكى للتاني عدم تفهم اهله ليه، طيب ليه؟ قلت عشان الصديق معندوش المسئولية اللي عند القريب، ممكن يبقى ليا صديق شيوعي... وعزيز عليا..ز بس هل أقبل مراتي تبقى شيوعية؟ بالنسبة لي لا

تعليق على فكرة القساميات بس
المجاهدات دول مبيقعدوش في "عشاء عمل" مثلا يظلع فيه مصور يستظرف دمه بافيهين، فالمقارنة مش واقعية أوي

غير كدة فيه عنصر مش لازم يغفل أبداً، إن الغيرة أمر تلقائي يعني ومن دلائل إنسانيتنا، وأحد العوامل اللي بتتحكم في الغيرة من غير ما تلغيها هي أسلوب الأنثى نفسها، هل هو بالبلدي كدة "يطمّع"؟ ولا تلقائي لدرجة إنه ساعات يخلي الإنسان اللي مش كويس حتى يتكسف يعيش الدور؟ وحتى لو كان الخيار التاني... بردو الغيرة مش ملغية

ردي على فكرة مش إعلان اختلاف للي بتقولي عليه أد ما هو اتفاق ضمني بوجود معضلة

تحياتي

أحمد عبد الفتاح said...

بصراحة انا ليا راي تاني
وهو ان كل واد حر
يقرر انه يكون عانس يقرر انه يشتغل اعلامي او حتي تاجر شنطة لان ده حياته وهو الي هيعيشها
ثانيا انا شايف ان اية ويمني محتاجين يوضحوا الفكرة أكثر من وراء دعوتهم وابعاد دعوتهم اكثر لان اكيد مش النظرية انهم يعنسوا والسلام وان كل البنات تعنس وبالتالي الرجالة تعنس وبالتالي الجنس البشري ينقرض
أتمني منهم التوضيح في بوست ساحق ماحق داحق
ثالثا بالنسبة للاخواة الي نصبوا نفسهم حاكمين بامر الله في من قرروا ان يكونوا عوانس فاحب اقول لهم ان مفيش نص بيحرم الزواج وان الزواج بياخد احكام تبدا من الوجوب وتنتهي بالتحريم
وشكراااااا
تنسيت اقول لكم
كل الاحصائيات بتقول ان اكبر نسبة في العنوسة دايما في مجال الاعلامين سواء رجالة او ستات
ربنا يستر علينا وعليكم

قررت أكون عانس said...

سلام عليكم

انا عارفة انى المفروض ارد بس فى سببين الاول مش هقوله بس فلسطينية الهوى عارفاه لكن التانى انى مشغولة وغرقانة لشوشتى فى الامتحانات

بس بجد نورتو المدونة

يمنى

Anonymous said...

لأ ماليش نفس اعنس

لكن نفسي الاقي الانسان اللى يقدر ويفهم اهمية الاعلام والمجال اللى انا فيه

انا مخطوبة ياستي وخطيبي في اول الخطوبة ياااه
زي ما تحبي اشتغلي وماعنديش مشكلة ودي ثغرة ومش عارفة ايه
وشرحت له اسلوب شغلي وطريقته ومسألة الاختلاط والعمل وكله كله
انا موافق وماعنديش مشكلة

لكن لما دخلنا في الجد والموضوع بقى رسمي ودبل وبتاع وقربنا على الزواج بدأت تظهر مشكلة الشغل
انا ماحبش مراتي تكلم شباب على تليفونها الخاص
ياعم الحاج دول تبع الشغل ومش بيتصلوا الا في الضرورة والناس اللى بشتغل معاهم كلهم محترمين جدا
انا ماحبش انه زوجتي يكون المكتب اللى بتشتغل فيه كله رجالة
انا ماحبش مش عارفة ايه وهاتك ياكلاموبحب ومابحبش

صدقيني يااية انا معاكي في اللى انتي بتقوليه بس مش الحل اننا نعنس ونقعد من غير زواج لانه برضه جهاد

لكن الحل اننا نحسن الاختيار عند الزواج من واحد متفهم لطبيعة وخطورة المجال ده مع محاولة مننا دائمة ودئوبة للتوفيق بين البيت وبين العمل

Anonymous said...

السلام عليكم
الأخت الكريمة .. على فكرة قرأت مقالك كله واعجبني جداً ذلك الفكر الراقي .. ولكن ما لم يعجبني هو استباقك للاحداث وتوقعك للمستقبل بناءً على مشاهدات لا تعدو كونها حالات ف المجتمع .. اتكلم بالعامية أحسن
طبعاً شغل الاعلام له ظروف خاصة .. لكن لا تتخيلين انه ممكن مسايرة الواقع دون زواج .. أحترم وجهة نظرك جداً .. وطالما انتي لا ترفضين الزواج كفكرة .. فقط ترفضين ان يكون ذلك الزواج عائق لك في تكملة مشوارك وتحقيق أهدافك .. فأسمحي لي أن أكلمك كأخ ليك .. أكيد هناك الكثيرين ممن يقدروا دور المرأة وخاصة اذا كانت نشيطة جداً ومتفاعلة مع مجتمعها بدرجة كبيرة .. والغالب على الأمر أن المرشح للتقدم لخطبتك يكون يعمل فى نفس المجال من قريب أو بعيد وبالتالي فهو سيكون في أنتظار تسلمك لأوسكار افضل مخرجة ليكون أول المهنئين وأكثر الحاضرين تصفيقاً لك .. وفرحاً بك .. ده مش كلام وعلي أد عقلك ولا شيء .. ولكنه انعكاس حقيقي لواقع ربما غاب ف القاع بينما ظهر لنا عكسه تماماً .. نهايته .. مدوناتك الاثنين عجبوني .. واكثر ما عجبني هو روح الشباب والحماس اللى وجدتها في شباب اعلاميين مصر الاحرار .. تمنيت يوماً أن أكون هناك فى ذاك المكان .. بس ما حصلش نصيب .. تحياتي وتمنياتي لك وللجميع بالتوفيق