تااج

تاج اتبعت لنا من مدونة انا عايزة أتطلق هو صحيح الرد متأخر بس مش مشكلة

السؤال الاول :

خمس أحلام من الماضي

اّية

اني اشتغل في محل عصير يكون بتاعي

اني اطلع دكتورة عظيمة واكتشف علاج لاي مرض مستعصي

اني اموت صغيرة

اني اعيش في كوخ

اني اطلع القمر واسجد هناك

يمنى

كان نفسى اهرب لفلسطين ايام الانتفاضة

ادخل اعلام واتفوق فيها و ابقى معيدة

اشتغل مراسلة لقناة الجزيرة فى فلسطين

ادرب فريق ريال مدريد الاسبانى لانى بحبه جدا

كان نفسى ابقى رئيسة دولة

ههههههههه

السؤال التاني : خمس احلام للحاضر

اّية

اني اكون مراسلة في فلسطين او الشيشان

اعمل برنامجي الخاص عالجزيرة

اموت صغيرة بردوا يعني مش عايزة اوصل لل 30

اعمل عملية استشهادية

اصلي في الاقصى

يمنى

اكون مخرجة سنيمائية


يبقى عندى شركة انتاج


و اعمل مشروع تنموى كبير افيد بيه الوطن العربى بس مش هبقى فيه لوحدى


ألف العالم و اتعرف على ثقافات جديدة وناس جديدة


أموت شهيدة

السؤال الثالث :

اذكر شخصين كان نفسك تعرفهم من الطفولة

يمنى المهدي ... كان نفسي أعرفها من وأنا صغيرة فعلا

وأشاركها طفولتها المشردة اكيد

بس انا قانعه بشبابها العاقل المجنون :D

الشخص التاني :

ياسمينتي

صديقة قسم صحافة المخلصة دائما

وطبعا منة وبسمة

حقيقي اروع اصحاب

اوبس كده بقوا 4

كفاية كده

يمنى


هما مش شخصين هما 5 اشخاص


اكيد طبعا اية الفقى ....كان نفسى اعرفها من زمااان


و امانى راضى معايا فى الكلية وفى نفس القسم وفى المدينة


زائد هويدا صلاح ومروة بكر وهبه صلاح


هما كتيير بس حياتى اتغيرت تماما لما عرفتهم وعشنا مع بعض لحظات ماعشتهاش ما اقاربى المقربين جدا


ربنا يخليكو لي

يمنى

في البداية بشكر يمونتي جدا على انها شالت المدونة الايام اللي فاتت



ونزلت بوستات عسولة زيها في غيابي



وبالمناسبة دي قررت اكتب عن يمنى



مالا يعرفه الناس عن يمنى



نسمي الله ونبدأ



يمنى بنت شكلها هادي ووقور عندها 19 سنة وهتكمل ال 20 في 22/10



فكل سنة وانتي طيبة مقدما



واعتبري البوست ده هدية عيد ميلادك عشان مش هجيب



الكل بيتخدع يا عيني في مظهر البنت الرقيقة المؤدبة



محدش يعرف ما وراء ذلك



يمنى شريرة جدا





عقلية اجرامية فذة وده اللي بحبه فيها



تفضل ساكتة ساكتة وبتجمع



ويوم ما تنفجر أجاركم الله



شكلها بيبقى نكتة وهي معصبة



حقيقي بتضحكني اوي لانها اصلا مش عصبية ففجأة بتبقى عصبية وبتزعق



بس هي داخليا على رأيها



وانا أقتبس من كلامها بالضبط ومش هذكر الموقف منعا لاحراجها



بلاعة حنان وطفحت



شايفين القدرة عالتشبيه



فهي عاطفية شوية بس مش بتبين ده الا للمقربين وانا منهم طبعا



يمنى مؤمنة جدا بنظرية الغرور الانثوي اللي احنا اخترعناها



وعشان كده هي ناوية تشتري عربية قبل الخطوبة



وابقوا أسألوها عالسبب



يمنى بتتريق على طريقة كلامي كتير

وبتقول اني عندي الفاظ خاصة بيا وناوية تنزلها فانا من هنا بحذرها تعملها والا هتلاقي الشر كله بيتصب فوق راسها


يمنى عقلية منفتحة ومثقفة يسعدك الحوار معها بس مش هتلاقيها بترد كتير لانها صامتة تحب الاستماع


يمنى شخصية خلوقة وملتزمة وانا بحبها

احسن ما فيها

انها

قررت تكون عانس

من غير كلااام

النداااالة

انا و اية زى ما انتو عارفين اصحاب جدا

و بتجمعنا صفات مشتركة كتيرة اهمها اننا قرنا نكون عوانس

والحقيقة اننا بنتناقش فى الموضوع ده كتير و اسبابه و كل واحدة بتفهم التانية جدا

عمرى ما حكيت لحد او فضفضتله فى الموضوع ده وفهمنى اد اية

لكن فى نفس الوقت فى ندااالة بتحكم علاقتنا احنا الاتنين

كل واحدة لما بتعرف ان التانية جالها عريس او حتى حد حلملها انه فى عريس بتفرح جدا

ماشاء الله الفترة الاخيرة الاحلام نازلة ترف على اية

كل ما حد يشوفها يقولها انه حلملها حلم معناه انهاهتتخطب قريب

و طبعا ما اقلكوش على معنوياتها بتبقى منخفضة اد ايه

لدرجة انها بتتصل مخصوص بيا عشان اواسيها

و انا بمثل الدور ده بس من جوايا ببقى فرحانة اوى و نفسى الحلم يتقلب حقيقة

من الناحية التانية عملت فيها مقلب عشان اختبر مدى اخلاصها لى..و اللى لاقيته مافيش

قلتلها بكل حزن واسى انى جالى عريس

مش عايزة اقولكم السعادة اللى كانت فيها

بس ماستمرتش كتير لانى صدمتها بالحقيقة ان ده مجرد مقلب

كان المفروض اقطع علاقتى بيها للابد بس عذرتها لان عندى نفس الاحساس

احساس الام اللى نفسها تتطمن على بنتها

او الاخت اللى عايزة تفرح باختها

او بمعنى اصح احم احم

الصاحبة اللى عايزة تشمت فى صاحبتها

اللهم لا شماتة

الحقيقة المرة

انا عرفت الحقيقة او عارفاها من زمان بس بستهبل ....

بالرغم انى كاتبة انى قررت اكون عانس بس حسيت فى لحظة انى لازم اواجه نفسى بالحقيقة المرة و هى ......

احم احم...

انى نفسى اتجوز برده و ده اعتراف خطير حاسة بالعار و انا بعترف بيه

الحالة دى بتيجى لى لما بكون فى اى فرح ....

و متهيألى بتيجى لاى بنت لما بتكون فى فرح...

لو بصينا هنلاقى مميزات كتيرة للجواز بس من وجهة نظرى انا بعيدا عن المميزات اللى بيقولها علماء الدين و الاجتماع و.....الخ الخ

مش هقول كل المميزات لانها كتييرة اوى...بس هقول على اللى ذاكرتى المبجلة فاكراه

اول حاجة ان البنت بتشترى حاجات بالهبل اى حاجة و كل حاجة ...و اكيد انتو عارفين ماذا يعنى الشراء للبنت...كل

حياتها تقريبا

تانى حاجة انها بتحصل على استقلال مؤقت بيبقى ليها بيتها الخاص بيها تنضفه تسيبه مفركش... تقلبه... تدهن

الحيطة اسود... براحتها.... ممكلكتها بقى

تقريبا كل طلباتها اوامر ...خطيبها بيدلعها و يهننها ...مامتها بتبقى شايلها من ع الارض شيل خاصة اذا كانت الكبيرة

و الام و الاب مالهمش خبرة فى المواضيع دى ...فالواحدة بتستعبط براحتها

انا عرفت دلوقتى بس ليه البت بتتفرعن لما بتتخطب

اخيرا و دى اكتر حاجة عايزة اتجوز عشانها ...

الفستان الابيض و الفرح و دى اللى بتدمر معنويات اى بنت و تخلى منظومة القيم اللى هى حاطاها لنفسها بتنهار زى ما

حصلى كده


انا قررت اقاطع الافراح كلها و اتجنب الفساتين البيضا و اى واحدة مخطوبة مش هكلمها للابد

ههههه