Monday, June 16, 2008

عريس الغفلة


سلام عليكم

اخيرا خلصنا امتحانات وقعدنا فى البيت ..على رأى اَية متعة لا يضاهيها متعة(و العكس صحيح) ملل ما بعده ملل

المهم...

انتو عارفين ان البنت بيجى عليها اليوم اللى بتوصل فيه لمرحلة الشباب و يجيلها خطاب
..
العادى ان الواحد منهم بيتقدم و يقعد مع البنت قعدة الصالونات ...

و بعد كده البنت تصلى استخارة

ارتاحت كان بها و الف مبروك وتوكلنا على الله

ما ارتاحتش يبقى خلاص بمنتهى البساطة مافيش نصيب

لحد دلوقتى مافيش اى مشكلة...

المشكلة فى ان الناس اللى شايفة ان العريس محترم وابن ناس و وظيفة ...و حاجات كده يبقى لازم يتوافق

عليه لكن البنت رفضت وازاى ده يحصل!!!

كل واحد مع نفسه كده يقول لازمن فى سبب خلاها مش موافقة و يبدأو يفكرو و يحللو و ينظرو للقضية بعين متفحصة

لحد ما يخرجو بنتيجة -مع نفسهم كده- يصدقوها و يواجهوكى بيها


نلاقى واحدة تاخك فى اوضة
لوحدكم وبصوت اقرب للهمس :

"يا حبيبتى هو فى حد انت بتحبيه ومتعلقة بيه عشان كده رفضتى...قولى عشان نتصرف احنا مش هنزعل "

!!!!!!!!!!!!!!

حد تانى :"انا عارف السبب بكرة الحقيقة تظهر و تبان

حقيقة !!!!!!!!


حد عاشر:"انتى عايزة واحد وسيم... تقبلى تتجوزى حد شكله حلو بس رخم ...

و خدى بالك انتى مش كاملة يعنى ما تتوقعيش يجيلك حد كامل"

و كلام من امثال بلاش غرور و ياريت تبطلى العنف اللى انتى فيه

واخيرا:"خدى بالك بين الثقة بالنفس والغرور شعرة يا ريت ما تقطعهاش"


ناس غريبة و الله

بس فى حاجة بتقول :"بين العقل و الجنان شعرة ياريت ما تقطوعهاش"

12 comments:

Anonymous said...

عندك حق يا اون اون
انا اختك واكتر واحدة فهماكى
بس صح الناس مش بتفم يعنى اية عدم الارتياح للشخص دة
معظمهم واخدين الموضوع محترم ومعاة فلوس كدة خلاص والموضوع يمشى
؟؟؟؟
احنا بقينا ف عصر ...ربنا يستر

أحمد عبد الفتاح said...

ههههه
التدوينة جامدة جدا
انا مبطلتش ضحك
هما البنات بيعانوا كده ؟

فلسطينية الهوى said...

يمنى


انتي نكتة


بس انا مع اللي كله هيظهر ويبان

هههههههه

قررت أكون عانس said...

ايه ده ايه اللى جابكم هنا

يلا كل واحد على مدونته قفلنا

يمنى

فلسطينية الهوى said...

قفلتوا ايه بالضبط يا آنسة

بلاش الكلام ده بدل ما ننزل بالتقيل اللي يخليكي تقفلي فعلا :D :D

روحي ربنا يرزقك بعريس غفلة يريحنا منك

قررت أكون عانس said...

ههههههه تقيل !!!احنا برده عندنا كلام تقيل

عموما ربنا يرزقك انتى كمان بعريس غفلة يريح البشرية كلها منك

و اعتقد ان فى ناس كتييير نفسها ترتاح

مي ... چــِنـيـن ... عيلة و عايزة أفهم said...

البوست تحفة

و عندك حق في كل جملة ... و على فكرة انا شفت كل اللي انتي كتبتيه ده في عيلتنا مع الاسف !!!

بنوتة من عيلتنا اتعرضت لكل التعليقات اللي انتي كتبتيها دي ... و لأنها قربت من التلاتين بقى كأن أي حد بقى ليه الحق إنه يتدخل في حياتها !!!

أنا حتى كنت ساعات باقول هي ماقبلتش ده ليه ... هي ماكملتش الموضوع ده ليه ... ليه هي بتتصرف كدة ؟؟

بس لما كبرت و فهمت ... فهمت ان هي بس اللي من حقها تختار و تقرر هي عايزة تكمل مع الشخص ده و لا لأ ... و مش من حق اي حد تاني إنه يجبرها على حاجة عشان أي سبب


و ياريت كل الناس تفهم ده ... كانت ناس كتير اوي ارتاحت

Amr Fahmy said...

فكرة حواز الصالونات مرفوضة عموماً، ع الأقل لو بنتكلم إن أحد طرفي العلاقة المنشودة لسة يا دوب سنه أو سنها صغير... الجواز بالطريقة دي حل متأخر شوية، لما تبقى الحاجة للشراكة عموماً ألح من حاجة لإنسان بعينه، وده ممكن ييجي بعد الثلاثين مثلاً لكن مش قبل كدة
ليه الفكرة نفسها مرفوضة، أو من أسباب رفضها... إن الطرفين بيبقوا عايشين حالة التمثيل، مش بطبيعية ومش بحرية، ومش بتلقائية، لأن حتى لو اتخنقوا من بعض هيحرصوا على صورهم بشكل ما... بعدين مجرد وجود الأهل في المشهد أصلاً كفيل بإفساده لأنهم بيلعبوا دور إعدام تلقائية الفعل ورد الفعل،وإضفاء صبغة رسمية كفيلة إنها تقتل الجو تماماً
فين هنا الانجذاب الأول، أو حتى مشروع الحب؟
مش معنى كدة إني بقول البنات والولاد يتصاحبوا أو إني بدعو للانحراف... بس ليه ما نسيبش للصدفة مجال؟ يا رب الجملة دي تكون مفهومة

Amgad said...

بجد انا بحييكي علي ترييح الدماغ ده يعني هما اللي كانو اتجوزو خدو ايه غير العيال ووجع القلب احييكي علي شجاعتك حتي لو كانت كلام
واصحح تصحيح بسيط بين قمة العقل والجنون شعرة

خالص تحياتي وتقديري

قررت أكون عانس said...

الاء هانم ..
ايه الكأبة دى فكيها


احمد عبد الفتاح

شكرا ليك و الصبيان كمان بيعانو ممكن تبقى تجرب تسأل الطرف التانى


فلسطينية الهوى

اكيد كل حاجة لازم تظهر و تتبان


مى...جنين

اللى انتى شوفتيه هتلاقيه مش فى عيلتكم بس ده فى اماكن كتيير
و شكرا لتشريفك لينا المدونة


عمرو فهمى

كلامك مفهوم بس جواز لصالونات بينفع لناس وناس لا بيبقى حسب طبيعة وضع كل شخصية


امجد

اكيد مافيش احلى من ترييح الدماغ واحيانا بيكون قمة العقل هو قمة الجنون

Amgad said...

وبعدين يعني فين البوست الجديد

Amr said...

كتبت مؤخرا عن موضوع الزواج, يبدو الموضوعين لهما علاقة ببعضهما, إقرئيه هناإن شئتي

http://amr.blogspot.com