Tuesday, September 16, 2008

وقفة مصرية



حملة وقفة مصرية كانت بتعملي عصبية رهيبة جدا لانهم كانوا محسسني انهم مثلا ماسكين الرزق بايديهم

وبعدين لاقيت اني ممكن افهمها برؤية خاصة مختلفة

كتير يمنى تحكي لي على حلمها انها تكون ناجحة كمخرجة أفلام سينمائية

وتكون عندها أسرة ناجحة كمان

فقعدت أفكر في ازاي تحقق يمنى معادلة النجاح

اي مشروع بيحتاج لخطة وموارد وماالى ذلك

مثال صغير :

لو عايزة أشتري أرض وأزرعها زرع مثمر يخدم المدينة كلها



هدور بدقة على أرض جيدة .. هختارها بعناية شديدة جدا

بعدين هجيب أفخر البذور وأجودها عشان أزرعها

وهتابع الارض دي بالسقاية الدائمة والرعاية لآخر يوم في حياتي

حتى لما أموت هوكل شخص يتابعها بعدي

لان ببساطة هدفي أخدم المدينة كلها

بثمر مفيد وصالح

الزواج شبيه بالجنينه دي

لاني ببني بيت هدفه خدمة بلدي وأمتي

أني أكون بيت يكون كل الافراد اللي فيه خادمين لمجتمعهم صح متقدمين بيه للامام

وعشان أحقق ده لازم أتعامل مع الموضوع بجدية

مش أتجوز لاني كملت ال 25 سنة

او اتجوز لاني عايزة أحب و أتحب

أو عشان أنتقل لمرحلة اجتماعية ومادية مختلفة

أو خوفا من نظرة الناس ولقب عانس

مش أتجوز لأني عايزة أتجوز وخلاص

انا بتجوز عشان أبني بيت يكون لبنة قوية في جدار مجتمعي

جدارنا في لبنات كتير ضعيفة محتاجة اسمنت وطوب قوي يقوي الجدار

وبيتي حيبقى الاسمنت والحجر القوي ده

فلازم اختار شريكي في المهمة دي بعناية فائقة

مش واحد كويس وهيعيشني كويس وخلاص

شريك كويس هيعيشني كويس و هيخلي مجتمعي يعيش كويس

لانه شخص طموح وعنده هدف

وعايش لغاية أكبر من نفسه

عايش لوطنه

فهختاره كويس وهقرأ كل كتاب يساعدني على انجاح العلاقة واستمرارها

هقرأ عن الاختلاف بين الشخصيات .. عن المريخ والزهره والفروق بينهم

عن الحب .. والتضحية .. والكبرياء

هخطط لزواجي بعناية

وبعد ما أتجوز .. وتيجي مرحلة تكوين أسرة و إنجاب أطفال


مش هنجب عشان اجيب حد يونسنا

او لآني على خلاف مع شريكي فهربطه بالاطفال زي ما بيقولوا

او لان حماتي عايزة ولد

انا هنجب للامة قائد

في الغرب بيخططوا لكل حاجة بما فيها الانجاب

بياخدوا كورسات قبل الزواج وبعدين عن الاطفال والحمل والولادة

والابوة والامومة

لانهم مدركين انهم هيبنوا أنسان

انا هجيب للامة انسان ... يعيش فيها

ويخدمها

المهندس لما بيني اي حاجة بيخطط لكل جزء منه عشان يطلع بناء متكامل

ما بالكم ببناء إنسان
وإنشائه

بغرس فيه كل حاجة ايجابية او سلبية

بساعده في تكوين شخصيته ومستقبله

مما يعني اني بشارك في تكوين مستقبل الامة

انجاب انسان محب وصالح شيء عظيم

انشاء بيت وتكوينه شيء عظيم

والاعظم أن;ي أعملهم لهدف كبير

ومكنش عايزة اتجوز وخلاص
________

وقفة مصرية بتقول
:
قبل ما نجيب مولود نتاكد ان حقه علينا موجود

مش نجيب طفل لعائلة مشتتة

تعامله وحش وتقسو عليه او ترميه في الشارع

فيطلع مجرم كاره للمجتمع

لازم الطفل يجي في عائلة محبة

دي العلاقة بين البوست والحملة

20 comments:

blue-wave said...

ممممممممممممم
تصدقى انك فعلا خليتينى ابص للوقفه دى بنظرة تانيه؟
تسلمى بجد

مصري بالغربة said...

على فكرة كل الاسباب اللي انت قولتيها للجواز صح

بردوا مش غلك

انك تتجوزي لان سنك وصل 25 سنة صح

لان مش المفروض ان ابنت تاخر جوازها وخلاص

انك تتجوزي عشان تنتقلي لحياة تانية
بردوا صح

لانك مش هتفضلي في بيت باباكي وممتك
حتى لو انت قعدتي جنبهم صدقيني هما نفسهم مش حيكونوا مبسوطين بقعدتك جنبهم

انك تتجوزي عشان تحبي وتتحبي بردوا مش غلط

لان الحياة العاطفية ضروروة من ضروريات الحياة الطبيعية السليمة

انك تتجوزي عشان يبني لبنة جيدة في المجتمع بردوا صح


انما في راي الغلط ان مفهوم الجواز عندك يكون بسبب تكوين اللبنة الجيدة وخلاص

بدون حب وتفاهم ومودة ..... الخ

فميكونش مفهومك للجواز ان تكوين اللبنة ديه وبس ,

ABOALI said...

وقفة مصريه
وكمان محتاجين فيها مصرى
يعنى وقفة مصرى ومصريه
محتاجين نفكر بجد
اصلى عقولنا بعد الافيون
ايه اللى هاتقوله غير جنون
نفكر نسعد بعض
مش كلام على الورق
ولا نظم كشكول الهمم
محتاجين نطبق مرسوم
يكون العمل والجد
وتوفيق الرحمن
فيه يكون مرسوم
نشوف كل طاقاتنا
ونعبر بيها عنوان بيتنا
اصلى احنا محتاجين عبور تانى
مايكنش فيه التفكير انانى
وقفة مصري ومصريه
عنوان كبير
لوطن تانى


تحياتى لك يا مصريه

MaGn0liA... said...

احنا بس عاشان عندنا هيستيريا من اى حاجه تبع الحكومه

مع انها ممكن تكون حاجه كويسه و تفكيرها كويس

لكن احساسنا ان دائما هيكون فى نظريه مؤامره

و تفكيرك و تحليلك ليها حلو

بوست حلوه اوى

مـجـنـووون said...

والله كلامك جميل جدا
وفكرك عالي قوي

لأزم الناس تبص لموضوع الجواز بنظهره إجابية مش موضوع ظل راجل ولا ظل حيطة

وزي ما أنتي قولتي
لازم الزواج يكون علي أساس وأختيار شريك الحياة علي أساس وأنجاب العيال علي أساس

يعني كل حاجه محسوب حسبها ولها هدف ومعني
والله لو استشعرنا الموضوع ده حتتغير حاجات كتيره في بلدنا

تقبلي مروري
مجنووون

سمـــر مــاهر said...

اموت انا فى الناس اللى بيخططوا لكل
حاجه
:D

انا ودماغي said...

و الله كلامك صح جدا و بيدل على عقلية ناضجة....القرار ده أخطر قرار فى الدنيا و يأما يتاخد صح يأما قلته أحسن ألف مرة...و تصدقى فعلا أنا برضه بصيت لوقفة مصرية دى بعين تانية انا كنت شايفاه إشتغالة و أى كلام من اللى بيطلعوه بيه على طول ده

هانى زينهم said...

اية :
اولا العلاقات الانسانية عمرها ما خضعت لمبدأ التخطيط لان الانسان بطبيعته متغير وبالتالى علاقاته والاسس اللى بيكون عيها العلاقات دى مش ثابتة.
ثانيا : الجواز هو اكتر نوع من العلاقات دى ما بيخضعش لاى نوع من انواع التخطيط لانه ببساطة قدر ونصيب واوعى تفتكرى انه لو اتقدملك حد وانت ما لقيتيش فيه كم المواصفات دى وهو نصيبك هترفضى ومش هتتجوزيه المسألة هنا مش اختيارية.
ثالثا :بعد الجواز بقى اللى هو اصلا نصيب بتلاقى نفسك زيك زى السفينة فى وسط البحر كل يوم فى جديد ومش شرط الجديد يكون حسب الخطة الموضوعة واكيد انتى شفتى افلام كتير لسفن الموج بيعصف بيها ولو القبطان بتاعها عنده خبرة 60 سنة برضه بيحايلها بس ما بيسوقهاش .وده مش هتقدرى تفهميه قوى دلوقتى الا لما تتجوزى.رابعا :العيال بقى انيس منصور قال " قبل الزواج كان عندى 6 نظريات لتربية الاولاد ولم يكن عندى اولاد والان عندى 6 اولاد ولم يعد عندى اى نظريات " واكيد المعنى وصلك وببساطة احنا بنربى عيالنا على قد ما ربنا يقدرنا انما صلاحهم وهدايتهم ونجاحهم بتخضع لعوامل كتير احنا واحد منها مش كلها وفى النهاية نجاح الاولاد رزق زيه زى الرزق اللى هو الاكل والشرب مش احيانا تلاقى دكتور ولاده فاشلين وبياع اسبتة ابنه من الاوائل فى الثانوية العامة .
خامسا : مش معنى كلامى انك ما لكيش اى دور بالعكس احتكى بالناس وكونى خبرات واعرفى وبعدين اختارى على اساس راحتك وخبرتك وبعدين اتمنى التوفيق من ربنا وابعد كل الحسابات اللى قلتيها دى وكلام كل الناس اللى بتحب تتكلم وخلاص لانه ببساطة انتى اللى هتعيشى مش حد غيرك
سابعا : الواحد فى بداية حياته ممكن يعمل مدونة اسمها قررت ابقى عانس وبعدين لما الحكاية تدخل فى الجد بيعمل واحدة اسمها عايزة اتجوز وبعد الجواز ب3 سنين لو هو طبيعى بيعمل مدونة اسمها عايز اتطلق وده التطور الطبيعى للحياة البشرية هههههههه باهزر فى سابعا دى ربنا يوفقك
سادسا :انا طولت عليكى واسف على كدة بس دى وجهة نظرى فى الموضوع واسال مجرب زى ما بيقولوا وربنا يوفقك

Sherif said...

تفكير واعى حقيقى ومرتب

غايته ان المثالية العالية اوالمبالغ فيها هى غير موجودة

من هنا الاعتدال مطلوب .. والرضا بما هو معقول يساعد على دفع العجلة

بالتالى انالست من انصار اما كل شئ او لاشئ .. لان المبدأ يعطلك كثيرا فى انتظار مالايجئ

الزواج فى حد ذاته هو قرار شخصى بتحمل المسئولية .. والتأخر فى بعض الاحيان اكثر من اللازم غير مفيد ان لم يكن مضر .. انت لازلت شابة صغيرة ولو تأخرت لاقدر الله سيصبح القرار اصعب .. وربما تضطرين لاى شئ وهنا المشكلة

لهذا اتعجب من قرارك ..ان تكونى عانس .. ولكن قولى قررت ان ارجئ فكرة الزواج للحظة المناسبة

كل تمنياتى لك بالتوفيق والسعادة

خديجة محسن "لؤلؤة الاسلام" said...

ما شاء اللله
مدونة رائعة اختى
اول زيارة بس ان شاء الله تتكرر

و تحياااااااااتى
رمضان
كريم
و عيد سعيد

كلام حسام said...

وقفة مصرية او وقفة تدونية دايرة الحياة بتلف ولكل انسان رؤيته
ورؤيتك علي فكرة هادفة جدا لو اتعممت تبقي هايلة جدا
لكن في النهاية ساعات بتكون مؤثرات الحياة ومتطلباتها اقوي من اهدافنا ساعات بتجبرنا نتنازل عن جزء بعد جزء منها
أتمني من كل قلبي انك ما تفقديش اي ذرة من حلمك

عايزه اتطلق و said...

اولا ازيكوا يا قمرات ان شاء الله كويسين...
ثانيا انتوا حللتوا الوقفه صح بس احنا كلام الحكومه دايما مبيجيش على مزاجنا وده مش افترا مننا انما من عمايلها...
بعدين اختيار شريك الحياة شوفى اولا واخيرا قدر قدر قدر بس ده ميمنعش اننا ناخد بالاسباب ونحسن الاختيار
انما بالنسبه للحياه الزوجيه فمش عايزه ااقلكوا ..انما الكلام فيها شئ والفعل شئ تانى خالص مالص..
بس لو بتتعاملى مع زوج عاقل وبيعرف يستخدم الودان اليى ربنا خلقهاله وبيشغل العقل اليى فى جمجمته ...
وانتى اعتبرتيه ابنى واخوكى وابوكى وصاحبك وجوز خالتك لو امكن..
فاكيد اكيد ربنا هيوفقكوا وتعجزوا مع بعض..
انما لو عنص او ركن من الاركان دى اتخلخل فيبقا خلعه احسن...
ويا رب ربنا يرزكوا بالازواج الصالحين ..وتوصلوا مع بعض للسعاده اليى بتتمنوها..

فلسطينية الهوى said...

في حديث للرسول صلى الله عليه وسلم

فيما معناه : ( لو دعا لك جبريل وميكائيل وحملة العرش .. ما تزوجت الا التي كتبها الله لك )

جمعاوي(لا للنميمة) said...

السلان عليكم

بجد كلام منظم فعلا واحلى ما قيل
(الزواج شبيه بالجنينه دي


لاني ببني بيت هدفه خدمة بلدي وأمتي)

وربنا يكرمك ولكن ....

الحملة دى كنت سألت احد أعضاء مجلس الشعب عنها قاللى ان الحملة دى ممولة من امريكا والحملة دى هتشتغل بشكل او باخر فى كل البلاد المسلمة لان فى اخر احصاء الدين الاسلامى اصبح الديانة الاولى على مستوى العالم بنسبة 20% متفوقا على الكاثوليك !

دمتى لنا بخير ويلا سلام

رؤية said...

شكلى هانضم ليكم ، واعنس معاكم،
اصلى دماغكم عجبتنى،
^-^

طريقة تفكيرك مظبوووووطة،

تسمحيلى اضيفكم لقائمة المدونات عندى،؟

تحياتى لك.

فلسطينية الهوى said...

جمعاوي :

هي حملة واضح جدا انهم لا يراد بيها خير

لان الشعار اللي بترفعه مرتبط بالرزق

والرزق من عند الله وحده

مفيش خير اصلا بيجي من ورا الحكومة

شكرا عالملاحظة

_______________

رؤية :

انتي تنورينا لو انضميتي لينا

ويافندم انك تحطيها عندك ده شرف لينا والله ... شكرا اوي عليه

جـيـداء said...

اول زيارة ليكم عشان اسم المدونة شدنى قويييييي
اصل انا كمان قررت ما اتجوزش عشان خاطر بابا المجتمع يرضى عليا

صحيح ايه معنى ان انا افضل اخلف فى عيال و ما اربهمش و يطلعوا مرضى نفسيين و ناس غير اسوياء فى مجتمع ما بيرحمش زى ده؟
ليه الناس بتتعامل مع الجوزا على انه تحصيل حاصل و خلاص؟

معاكى جدا فى كلامك ، مدونتك حلوة بجد :)

simple girl.. ..simple dream said...

بصى انا معاكى اننا لازم نخطط لكل حاجة ونعمل حساب كل خطوة عشان ما ينفعش مستقبلى يكون هليهلى كدة ومن غير تفكير

لكنى ضد الحملة وبشدة لانها بتتكلم على ان السبب الوحيد اللى هيحسن حياتنا هو اننا نبطل انجاب
يعنى الحكومة بتقولنا الله يقطع خلفكو
مع ان مشكلتنا فى عددنا
احنا مشكلتنا فى الفساد والسرقة والنهب اللى عينى عينك

لكننا لو بنستغل ثروتنا البشرية هنكسب كتير اوى

mahasen saber said...

ايه يا قمرات عاملين ايه فى الدراسه
وكل عيد وانتوا سعدا وبالف خير
وربنا يتقبل منكم الصيام والقيام..
حبيت اسلم واطمن عليكوا

Anaza3lan said...

تصدقي انا بقيت خايف اخلف .. لحسن اجيب عيل يكبر ويقتلني .. او انه يطلع ملطوش في دماغه زي حماتي

بس علي العموم انا هجيب للمجتمع انسان منتج ومبدع . احتمال اوقفه علي عربية ايسكريم .. او ادخله جامعة خاصة ..

بس صراحة انتي فكرتي تفكير عالي شويه لان في مثل بيقول . " جلست طول حياتي ابحث عن المراه المثاليه .. فلما وجدتها . وجدتها تبحث عن الزوج المثالي " فضاع عمري

يعني انا شايف ان المفروض حكمة الزواج دي تكون محكومة شويه .بمعني عيش وخلي الناس تعيش والمجتمع برده يعيش

واحييكي علي حماسك ومبداك
منتظرين المولود الجميل ده