Wednesday, May 20, 2009

وأصبح قريبا


أيام قليلة وامتحانات كتيرة



بتفصلنا عن التخرج



بعد عدة أيام هنصبح إن شاء الله من عداد الخريجين



هنتخرج بشهادة إننا درسنا الاعلام



قضينا 4 سنين من عمرنا بندرسه



سنين طويلة بأيامها



صعبة بتجاربها



عشناها عشان حلم ملك شغاف قلوبنا



الاعلام



اد ايه بحب الكلمة دي



بتملآني بسعادة داخليا .. بحب حلمي اوي



بعد أيام قليلة .. الحلم هيصبح حقيقة



هنكون خلصنا أول خطوة من مشوار الألف ميل



قدامنا لسه خطوات كتير .. ده أكيد



بس سعادة إننا أنجزنا الخطوة الأولى لامثيل لها



بفتكر أيام ما كان دخول الكلية مجرد حلم



حلم بعيد مش عارفين هنقدر نمسكه ولالا



حلم الحمد لله حققناه



ودلوقتي بنحطله اللمسات الأخيرة



هنتخرج خلاص



أفكار كتير جدا جوانا



توقعات كتير وآمال ومخاوف



خطط كتير جدا بنرسمها للخطوة الجاية



يمكن السؤال الوحيد اللي أنا واثقة ثقة عمياء من إجابته



هقدر أصنع إعلام ؟ هقدر أقتحم المجال بجد ؟



آه هقدر



قريب كنت بسأل حد يعرفني كويس :



شايف مستقبلي ايه ؟



قالي جيفارا البديري



سعادتي كانت لا توصف



لان مش بس الحلم واضح عندي



لا ده واضح حتى عند الناس اللي حواليا واللي عرفوني



أوعدكم إن شاء الله



إن خلال عشر سنوات على الأكثر



هكون مراسلة في قناة الجزيرة



هختم التقرير بجملة :



آية الفقي .. الجزيرة .. فلسطين



13 comments:

عاشقة الحواديت said...

بسم الله الرحمن الرحيم

ربنا يحقق لكى جميع امالك

ويحقق لى جميع امالى العظيمة ايضا

saragebaly said...

اول مرة ازور مدونتك

سعيدة بحلمك الجميل

وان اول مراحل تحقيقه بتتحقق

يارب كل خطوات حلمك تتم بنجاح

تحياااتي لكـِ

سارة

hasona said...

السلام عليكم

ان شاء الله تنجح وتحققي كل أمالك وأحلامك

وتصبحي اعلامية كبيرة
ذو صيت كبير
وشهرة دولية

وتخدمي قضايانا بكل صدق وأمانة

شموسة said...

جميل ان الواحد مننا يكون له حلم وبقوه طموحه يحققه
بهنيكي علي حلمك وأملك يا آيه
الله يوفقك ويوفقنا جميعاَ
شموســـــــه...

kochia said...

مبروك مقدما وان شاء الله تقدري تحققي رسالتك التي تتمنيها

Anonymous said...

انا احمد من الاسكندريه اتكعبلت في المدونه وبصراحه انا معجب جدا بيها بس يا ريت حد يعبرني ايه المانع ان الانسانه تتجوز وتحقق حلمها مع انسان طموح ويساعدها على تحقيق حلمهاوبدل ما تنجح نجاح واحد تنجح نجاحين واعتقد ان جيفارا وشيرين ولينا في الجزيره متجوزين وقمة الاداء المتميز لتغطية الاحداث وعلى فكره انا ليه اربعه اصدقاء في مجال الاعلام ومتواصل معهم وعلى قنوات مشهوره وانا مستغرب جدا ازاي عشر سنين على ما تقتحموا المجال وانتم اصل المجال وواحد زيي خريج كليه علميه كانت قدامي فرصه على تقديم برنامج طبي يشبه الى حد كبير برنامج الدكتور ايمن رشوان وانا اعرفه ولولا اني مش باستريح لهذه القناة وغير متفرغ التفرغ الكامل كنت وافقت انا شايف ان مش الحلم لازم يتحقق وخلاص لأ دا لازم يتحقق وصح واجتهد حتى يتحقق في اسرع وقت لأن مش الهدف الحلم الهدف ما بعد الحلم

Anonymous said...

يارب يا ايه يتحقق حلمك
واشوفك عالجزيره يارب
وانا عندي تفاؤل كبير ان شاء الله
لاني من وانا صغيره كنت دايما بسمعك تقولي انك نفسك تقولي الجمله الاخيره دي
وان شاء الله ربنا مش هيخيب املك


حفصه

فلسطينية الهوى said...

اهلا بيك يااحمد في المدونة

واحنا مقلناش ان في تعارض خالص

بالعكس لو قرأت المواضيع السابقة في المدونة

احنا قلنا لازم حد طموح عنده هدف عايش عشانه

وانه يكون مقتنع بحلمي وسايبني احققه

واحلامنا سوا تشكل تغيير حقيقي في المجتمع بتاعنا

و10 سنين

لان الجزيرة مبتقبلش اي حد

لازم أصنع حياة مهنية قوية

بس ان شاء الله من كتر اعجابهم بيا

هيخلوها بعد سنتين :D

فلسطينية الهوى said...

عاشقة الحواديت .. وسارة ..وحسونة

وشموسة وكوشيا

أهلا بيكم

منورين المدونة

ادعوا لي عندي امتحانات

امتحااااااانااااااااااات

وآسفة لتأخري في الرد بسبب الوباء اللي احنا فيه حاليا

Anonymous said...

شكرا على الاهتمام رغم الامتحاناتوشكرا على الرد الوافي ولو تسمحولي تساؤلات بسيطة .ومش مستعجل الرد ووالله انا اتعلمت منكم حاجات كتير.... ارى في مجال الاعلام وبالتحديد في الفضائيات اما قنوات لاتسمح للنساء بالظهور تماما وعليها اقبال شديد من المشاهدين او قنوات لا تسمح الا بمن ينساب وراء التقدميه والتحرر في نظرهم ونجد المذيعات ومقدمي البرامج لا يهتمون باعداد الحلقه مثل اهتمامهم بالمكياج والازياء كيف تسعون الى اختراق الساحه بفكره اسلاميه هادفة وما هو الحل عندكم في تحقيق هذه المعادلة الصعبة وما رأيكم في قناة الرساله مثلا هل هي موفقة في احتواء مثل هذا الامر .... أحمد

تلميذة الأيام said...

يا رب كده نشوفك على الجزيزه يا عسل
وربنا يوفقك لكل خير ان شاء الله


وعاوزه اسمع قريب
آيه الفقى .... الجزيره .... فلسطين

د. مونى said...

بتتكلمى عنى من سبع سنين
ربنا معاكى

خواطر شابة said...

ان شاء الله حلمك يتحقق
موعدنا على الجزيرة ان كان لنا عمر ان شاء الله