Monday, February 1, 2010

هو وهي

من أول يوم عملت فيه مدونة قررت اكون عانس والناس كانت بتطلب مني أكتب قصص نجاح ناس حقيقية عشان أضفي المصداقية والواقعية للمدونة

بس انا كنت بفكر إن صعب أوي أكتب تجربة ناجحة لأن الحي لايؤمن عليه الفتنة

وممكن الاتنين الناجحين دلوقتي بكرة أوضاعهم تتشقلب

فعلى كده هكتب عن ناس عواجيز فضلوا حياة طويلة مع بعض

دي كانت أفكاري

لحد ما قابلتهم

يمكن عرفتها هي أكتر لأنها صديقتي المقربة

وهو عرفته من كلامها عنه واختلاطي القليل بيه


النهاردة أنا هكتب عنهم الاتنين هو وهي

بمناسبة عيد زواجهم

خاصة أن في عيد زواجهم ده بالذات عرفتهم الاتنين كويس اوي

هبدأ من البداية

هي .. كانت الشياكة والأناقة دائما وأبدا

عمري ماقابلت واحدة شيك كده أو بتهتم بالأناقة زيها

ومش بس أناقة المظهر .. كان جمال الجوهر بيشع

طيبة قلبها عرفها بيه كل اللي عرفوها واتعاملوا معاها

رقتها ميزتها .. وحرصها على مشاعر الناس .. حتى لو الناس دول أذوها وزعلوها عمرها ما تردلهم الأذية

و تزعلهم أبدا

ومهما اتضايقت منهم عمرها ما تظهر لهم أو تعاملهم وحش

كانت بترجع البيت متضايقة من كلام الناس

كنا نقولها ثقي ان ربنا هيبعتلك ملاك يتجوزك .. لانك متتعوضيش

انا مش هقول عنها إنها كانت جميلة لان دي مش الحقيقة

هي كانت فائقة الجمال

كانت في نظري مثال لجمال الفتاة العربية

بالسمرة الخفيفة والعيون الواسعه والملامح الرقيقة

كانت مدرستها في ثانوي تقولها انا بحب أتأمل جمالك

أنا كمان كنت بحب أتأمله

فضلت سنين كليتها البنت المؤدبة العفيفة المترفعة عن كل مايعيب
.. واللي حواليها مكنوش بيرحموها من تعليقاتهم السخيفة

لحد ماجيه الموعد المقدر

في رابعة كلية

اتقدملها هو



مكنش يعرفها قبل كده .. شافها وهو مع صاحبه زوج أختها الكبيرة

هي من عيلة محترمة

والدها ووالدتها الكل يشهد لهم بالتدين العميق والخلق الرفيع - نحسبهم كذلك والله حسيبهم -

اتقدملها

كان جواز عادي مش مبني على قصة حب كبيرة قبله

بس كل اللي كان يشوفهم كان يعرف انهم فعلا بيكملوا بعض


كل واحد فيهم كان النصف الثاني للاخر

كأنهم كانوا عايشين بحاجة ناقصة جواهم لحد ماقابلوا بعض

اهتماماتهم الصغيرة كانت متشابهة

كانت مهتمة بالاتيكيت اوي والذوقيات .. لقيته دارس اتيكت فعلا وبيدي فيه دورات

بيحبوا اللون البيج والبني

حاجات كتير اوي كانوا متشابهين فيها

اتخبطوا لبعض في اول شهر ثمانية

في نص الشهر اتكتب كتابهم

يوم 1/2/2007

كان زفافهم

اتجوزوا بسرعة

وسافرت تعيش معاه في الغربة

كنت عارفة طبعا أنهم بيحبوا بعض .. كانت حياتهم في نظري حياة زوجية عادية

يغلفها الحب وتتخللها المشاكل أحيانا زي أي زواج

ربنا رزقهم طفل .. فأصب
حوا أسرة .. كانوا في نظري أسرة لاتختلف عن الكثير من الأسر حواليا

اتنين ملتزمين بيحبوا بعض وعايشين حياة عادية .. اه عندهم اهتمامات مختلفة عن الأسر التانية

عايزين يغيروا في العالم للأفضل

كان نفسها بعد أحداث غزة تتبنى طفلة يتيمة .. تربيه في بيتها مع ابنها

كان اللي بيميزها في نظري قلبها الكبير ورهافة إحساسها

مكنتش تشوف أبدا حد محتاج ومش تساعده

لازم تمشي بفلوس فكة عشان لو قابلت أي حد محتاج تديله

بسيطة جدا بساطتها تفاجئ أي حد يتعامل معاها

عفوية وبسيطة ورقيقة

وبتحب الاطفال والمساكين جدا جدا

بس نجاح الانسان مش بيبان في الحاجات دي بس

لازم امتحان صعب عشان يوم ما ينجحوا فيه .. ينجحوا بامتياز

والامتحان جيه بعد سنتين بس من زواجهم

جيه بعد أحداث غزة .. بعد ماابنهم كمل سنة

جيه في عيد زواجهم التاني

اكتشفنا أنها عندها المرض الخبيث

شابة كان عندها 24 سنة

راحت هي وزوجها وابنها يحللوا ورم صغير كان طلع ورا ودنها اليمين

الدكاترة قالوا لهم انها عندها نوع نادر من المرض الخبيث .. سرعة انتشاره رهيبة

وعشان كده لازم يشيلوه

بس هيتشال معاه عصب الوجه

فنصف الوجه الأيمن سيصاب بالشلل

وجهها الجميل .. اللي كانوا الناس دايما يؤذوها فيه ويعلقوا عليه

هيصاب بالشلل .. نجحت أسماء في الامتحان الأول هي وكمال زوجها

لانها أول مافاقت من العملية وعرفت أن وجهها اتشل مقالتش غير الحمد لله الحمد لله

ونجح زوجها لان حبه ليه متغيرش أبدا بسبب تشوه بسيط في رمز جمالها

كانت بتخاف اوي ليكون شكلها يضايقه .. أو يكون ده تقصير في حقه أنها لا تستطيع التجمل ليه بالقدر الكافي

وعدى الامتحان وجيه الامتحان التاني

الورم رجع هنشيل الاذن اليمنى كاملة وجزء من الفك

لو كان شكلك اتغير في الاول شوية

دلوقتي هيتغير تماما

اخدت كيماوي وشعرها بدأ يتساقط

قالت له انه حر يتزوج مرة تانية .. كان دايما بياخد كلامها أنه مزحة تقيلة بتزعله

بعد العملية التانية رفضت تقابل الناس لحد ماترجع جميلة زي الاول

لما تخلص علاج وتعمل عملية تجميل تزرع ودن جديدة ساعتها هتقابلهم

لانها ببساطة مكنتش بتحب تزعل اللي بيحبوها

كانت بتخاف شكلها الجديد يضايقنا

في مرة قالت لي لو شكل ودني المتشالة بيضايقك هغطيها بشاش عشان مش تضايقك

مكنتش
زعلانة على ودنها كانت خايفة بس ان ودنها متكنش في الجنة

ونجحت في الامتحان التاني

ونجح كمال لانه طول فترة علاجها أخد إجازة وفضل معاها عشان ميسبهاش لحظة تتألم فيها وهو مش جمبها

شفت كتير اوي مشهد اتنين ماسكين ايد بعض

بس اتحفر في ذهني مشهد ايد اسماء جوا ايد كمال

كانت لما تتعب او تتضايق تلاقيه جاي يمسك بايديها بصمت ومن غير ماتتطلب

كان مشهد حب بسيط وجميل مش محتاج كلام يعبر عنه

وجيه الامتحان التالت الورم رجع في الرئتين

عملية التجميل هتتأخر .. وشعرك هيستنى كمان شوية عشان يطول

أصله هيقع تاني

والمرة دي هيضاف لوجهك شيء جديد

أنبوبة أكسجين تتنفسي منها

وصوتك هيروح .. هتعجزي عن الكلام لفترات طويلة

هتفقدي وزنك كمان

40 كيلو هيروحوا منك

رغم كده ابتسامتك هتفضل تسعد اللي حواليكي

ابتسامة مش كاملة صحيح لإنها مائلة بحكم الشلل .. بس انتي بروحك الكبيرة مش هتمنعي الناس منها

قعدتي
شهر في المستشفى وكمال معاكي في كل لحظة

تعبتي كتير وهو كمان

كانوا الدكاترة ياخدوه على جمب يقولوا له زوجتك مش هتعيش

كلها ايام وترحل ويرجعلك بابتسامة

يخطط معاكي هتعملي ايه بعد ماربنا يشفيكي

يرجعوا تاني يقولوا له كلها ساعات

يرجعلك بهدية جميلة في عيد ميلادك

6/1/2010

كان عيد ميلادك ال25

عملنا لك حفلة عيد ميلادك وسط الاجهزة الطبية الموصولة بكل جزء فيكي

كان بيشيلك يخرجك تشتري هدايا للناس اللي بتحبيهم وانتي مش قادرة بس بتنزلي تخرجي على كرسي متحرك عشان تسعدي الناس

شهر كامل قعد معاكي فيه لحظة بلحظة رفض يسيبك دقيقة عشان لو احتجتيه تلاقيه جمبك

لآخر لحظة بيقولك إنك أجمل واحدة في العالم

ولآخر لحظة بتقوليله أنه الملاك اللي استنتيه كتير

وودعتيه ونمتي

جيه يطم
ن عليكي في نومك .. يقبل جبينك بصمت ويقولك ربنا يشفيكي

مسك ايدك من غير ما تطلبي

بس انتي كنتي نجحتي خلاص فالامتحانات كلها

روحتي لربنا .. بس منستيش ان كمال بيحبك

ابتسمتي له ابتسامة جميلة .. بقاله سنة مشافهاش

ووشك نور بحبه

ورحلتي تستنيه في أجمل مكان في الدنيا

في الجنة

وان ش
اء الله هيجيلك .. لأنه أثبت للعالم كله اد ايه كان بيحبك

كلنا نشهد أنه أكرمك وعاملك كملكة متوجة في عرش قلبه

ومتقلقيش عليه هنشيله في عينينا لحد ما يجيلك هناك

ونحضر فرحكم من تاني

أسماء وكمال

حقيقي علمتونا يعني ايه حب .. يعني ايه تضحية

يعني ايه زواج حقيقي

شكرا ليكم


ملحوظة صغيرة

أسماء بطلة القصة هي أختي
توفت يوم 18/1/2010
متنسوهاش من الدعاء
:)

25 comments:

Anonymous said...

انتي اللي شكرا ليكي :)
حقيقي قليلين اللي زيهم ، قليلين جدا كمان
انا لما كنت بشوف مشهد تضحية بين اتنين "زوجين" كنت بستغرب اوي ، و بقول يعني هم متجوزين عشان يتعبوا بعض ؟
لكن فعلا محدش بيحس بمعنى الحب الا في الوقت ده ، ربنا يرحم أسماء ، و يصبر كمال ، و يعوضه في ابنهم اللي يسري عنه

أم .. بوبه said...

بجد أنا بكتبلك دلوقتى ودموعى مش شايفة منها كويس

الحمد لله الحمد لله إنها صبرت وربنا هجزيها كل الخير بإذن الله مقابل صبرها بغير حساب

وفعلا تصرف زوجها من التصرفات النادرة إللى مش بتتكرر كتير

وهو كمان إن شاء الله ربنا هيعطيه مقابل صبره

ربنا يتولى إبنها ويصبر زوجها وأهلها

ويسكنها الفردوس الأعلى برحمته يارب العالمين

ونشرك لقصتها شئ جميل أسأل الله أن يجزيكى عليه كل خير ويجعله فى ميزات حسناتك بقدر ما فى القصة من عظات وعبرات

ابن القسام said...

هو وهى رمز النقاء والوفاء
هو وهى انشودة حب من السماء
هو ربط الله على قلبه وصبره وهى رحمها الله وغفر لها
هو وهى ندعو الله ان يجمعهمها يوم القيادمة فى جنانه

..
ابكيتمونا وسالت الدموع رقراقة
تلمست صفاء الحب ونبل المشاعر فيها

ربنا يبارك فى ابنهم يارب

موناليزا said...

ياحبيبتى
أنا مش عارفة أقول ايه بجد
تعجز كلماتى عن التعبير ولا تعجز دموعى عن الانسياب
ربنا يرحمها ويصبركم

مسلمة من أرض المشرق said...

أسكنها الله فسيح جناته .. هنيئا لها .. فقد ماتت شهيدة ان شاء الله

أبكيتينى .. كثيرا كثيرا ..

ولكن هي الأن ان شاء الله فى الجنان تسعد بصحبة الرسول صلى الله عليه وسلم .. هنيئا لها حقا

ولا أملك سوى الدعاء لأهلها ولزوجها بالصبـــــــــر

أسأل الله أن يلهمهم الصبر
والسلــــــوان

Anonymous said...

ان لله عبادا اختصهم لقضاء حوائج الناس حببهم الى الخير وحبب الخير اليهم انهم الآمنون من عذاب الله يوم القيامه عرفت اسماء وكم كانت مثالا للحب والتضحيه صدقت الله فصدقهاذهبت الى ربها مشتاقه صابره ولتعلمى آية ان الجنة مثوى المؤمنين وثواب المتقين وسرور المحزونين الى جنة الخلد اسماء وانزل الله الصبر على قلوبنا جميعا واقر الله قلوبكم ب البراء اماني عبد الحافظ

حكاوي يمنى... ! said...

ربنا يدخلها فسيح جناته ان شاء الله
و تفبليها فى الجنه ان شاء الله

Anonymous said...

ربنا يرحمها ويسكنها فسيح جناته

عفوا أنا أميرة said...

السلام عليكم ورحمة الله وبركاته
دى المرة الأولى اللى بتشرف بيها بزيارتك مدونتك، عنوانها جرئ جدااا فاتكرت أنى هلاقى فيها افكار هدامة بس اللى وجدته مشاعر راقيه وأسلوب مريح جدااا جزاك الله خيرااا وجعلها الله فى ميزان حسناتك..لله ما أعطى وله ما أخذ وكل شيء عنه بمقدار، ربنا يرحمها ويصبركم.

dramaqueen said...

مفيش كلام يوصف اللى حاساه بعد ما قريت
ربنا يرحمها ويصبركم
ويصبر زوجها

اشكرك جدا جدا

ست البيت said...

بجد آسفة
وبحمد ربنا على كل شيء
آسفة لأني معرفتش الخبر إلا دلوقتي البقاء لله
نسأل الله أن يغفر لنا ولها
وبجد زعلانة إني معرفتكيش إلا اليومين دول
وبتسغرب لأني في الوقت اللي بحمد فيه ربنا على حاجات لسه ما عطاهنيش
ألا نفسي داخله هنا تواسيني بألمك
ربنا يرحمها ويغفر لها ويصبرك أمك
بجد نفسي نبقى صحاب قوي
بجد بكيت
ومش عارفة اقول ايه عنيا مليانة دموع خاصة لما عرفت انها أختك
بجد ربنا يرحمها ويغفر لها ويرزقنا الخلق الحسن زيها يا رب
ويشفى مرضي المسلمين
ويعافينا ولا يبتلينا
اللهم آمين

Anonymous said...

rabenna yer7amha

حسين said...

الله يرحمها ويجمعهم فى الجنة بجد قصة شديدة مؤثرة اسال الله ان يرحمها بطيب قلبها وصبرها على ما ابتلاها به

Eanass Abouzeid said...

رحمة الله عليها و عليه و ربنا هو المستعان به على كل شئ , رحمة الله عليها و عليكم و عفوه و رضاه
رب اغفر للمسلمين و المسلمات الاحياء منهم و الاموات يوم يقوم الحساب ربنا اتنا فى الدنيا حسنة و فى الاخره حسنة و قنا عذاب النار سبحانك انا كنا ظالمين

مصعب رجب said...

لو كانت فعلا زي ما بتقولي يبقى يا بختها باللى هي إن شاء الله بقت فيه

ربنا يرحمها رحمة واسعة ويتقبلها في الصالحين .

مش عندي جديد أقوله بعد التعليقات كلها

لكن فعلا الواحد قدام القصص الحقيقية اللى زي دي بيقف عاجز مبيعرفش يقول إيه

يمكن عشت موقف قريب من ده مع والدتي رحمها الله
5 سنين مع نفس المرض وفي النهاية رحلت إلى الله عز وجل ، ما اشتكت يوما لغير الله سبحانه وتعالى

مش عارف أقول إيه والله

اعذرونا

أحمد عبد الفتاح said...

نادر لما الواحد يقرا بوست يخليه يبكي

حسن ارابيسك said...

اللهم أجعل قبرها روضة من رياض الجنة
وأسكنها فسيح جناتك
وأحسب أهلها لديك من الصابرين...أمين
الفاتحة لها ولأموات المسلمين جميعاً

Anonymous said...

مش عارفه اقلك ايه

بس الله يرحمها ويغفرلها ويبدل سيائتها حسنات
وان شاء الله تكون فى جنة الخلد ويعوض جوزها خير فى الدنيا والاخره وربنا يحفظ ابنها من كل شر يارب

who cares about names said...

ربنا يرحمها ويجمع بينهم في الجنة ان شاء الله

rizk said...

ياريت كل زوجين محبين يفهموا الحب الجميل ده حب الروح اللى طغى على حب الجسد فمنذ أن توفيت رحمها الله وأنا أقرن قصتها بالحديث عن الصبر لكل من يدور بينى وبينه هذا الحديث رحمها الله وصبر محبيها وإنى لأراك يابراء تحقق أمنية والدتك فى تغيير هذا العالم للأفضل جزاء لها على صبرها ولزوجها على وفائه

dark angel said...

بجد اتاثرت جدا ومش لاقية كلام يوصف اللى جوايا لكن احب اقولك انها رغم اللى مرت بيها فهى محظوظة انسانة طيبة وان شاء الله تدخل الجنة وكان معاها زوج طيب زيها بيحبها

المثالي جروب said...



شركة المثالية للتنظيف
شركة المثالية للتنظيف بالدمام
شركة المثالية للتنظيف بالخبر
شركة المثالية للتنظيف بالجبيل
شركة المثالية للتنظيف بالقطيف
شركة المثالية للتنظيف بالاحساء

شركة مكافحة حشرات بالجبيل
شركة تنظيف شقق بالجبيل
شركة رش مبيدات بالجبيل
شركة تنظيف خزانات بالجبيل
شركة نقل عفش بالجبيل
شركة تسليك مجاري بالجبيل

المثالي جروب said...



شركة تنظيف منازل بالاحساء
شركة تنظيف بالاحساء
شركة تنظيف مجالس بالاحساء
شركة تنظيف فلل بالاحساء
شركة تنظيف شقق بالاحساء
شركة تنظيف خزانات بالاحساء
شركة تنظيف مسابح بالاحساء
شركة نقل عفش بالاحساء
شركة كشف تسربات المياه بالاحساء
شركة تسليك مجاري بالاحساء
شركة شفط بيارات بالاحساء

المثالي جروب said...


شركة تنظيف منازل بالقطيف
شركة تنظيف بالقطيف

شركة تنظيف منازل بالخبر
شركة تنظيف بالخبر

شركة تنظيف بالجبيل
شركة تنظيف مسابح بالجبيل
شركة تنظيف مجالس بالجبيل
شركة كشف تسربات المياه بالجبيل
شركة شفط بيارات بالجبيل
شركة مكافحة فئران بالجبيل

المثالي جروب said...


شركة مكافحة حشرات بالخبر
شركة مكافحة حشرات بالدمام
شركة مكافحة حشرات بالاحساء
شركة مكافحة حشرات بالقطيف
شركة مكافحة حشرات بالجبيل

شركة رش مبيدات بالدمام
شركة رش مبيدات بالاحساء
شركة رش مبيدات بالقطيف
شركة مكافحة حشرات بتبوك
شركة رش مبيدات بتبوك