Monday, January 4, 2010

الحب في زماننا



رآها واقفة هناك .. تتأمل البحر الممتد عبر الأفق ... تدفع النسمات شعرها برفق .. سامحة له بأن يداعب وجهها الجميل
خفق قلبه بشدة .. سار نحوها متمهلا .. متأملا جمالها

دي مش قصة رومانسية :D

دي مقدمة لغالبية قصص الحب اللي قرأتها أو شفتها

هي البطلة الجميلة

وهو الشاب الوسيم

ولازم يكون واحد فيهم غني

أغلب الأفلام المعروضة بتروج لنفس القصة .. بتحكي عن قصص حب .. كان بدايتها الاعجاب وتخللها شوية اكشن وانتهت أن البطل السوبرمان .. اتقدم للفاتنة

من شهرين كده شفت فيلم عربي لمصطفى شعبان كان البودي جارد للبطلة ومن هنا نشأت قصة الحب

ومش عارفة بصراحة نسبة الحراس الشخصيين في عالمنا العربي اد ايه عشان نقدمهم دراما للناس

بفتقد بجد الدراما المعبرة عننا .. عن واقعنا

زهقت من م
نظور قصص الحب المقدمة إلينا والمستوردة من ثقافة ليست بثقافتنا

فين قصص الكفاح ؟؟ القصص الرائعة الحقيقية اللي كانت بترسل للكاتب الكبير عبد الوهاب مطاوع

فين قصص الحب التي تجاوزت الفقر والمرض وصعوبات الحياة وظلت حية وبقوة

الحب مش مرتبط بالمادة

ليه مش بنشوف قصة حب بين موظف مصري عادي بيكافح في حياته عشان يبني نفسه

وزوجته اللي بتساعده وتدعمه عشان ينجح

او قصة حب بين واحدة عادية مش جميلة .. بالعكس ممكن تكون اقل من عادية .. بس روحها تشع جمالا على كل اللي
عليها

وبطل فقير بيعي
ش يوم بيومه ... وهي اللي بتمده بالأمل والعزم عشان يفضل يكافح بحب في بلده

كنت مرة في زيارة للجرحى

وشفت هناك قصة أثرت فيا جدا

يوسف شاب فلسطيني طالب في هندسة .. الحرب أفقدته بصره

بعد ما فقد بصره خطب
بنت فلسطينية .. اد ايه كانت بتدعمه معنويا وبتشجعه .. بثت في قلبه حب الحياة من التاني والأمل

كان بيقول لاحب بعد كفاح

وكفاح كان اسمها وفعلا اسم على مسمى

المشكلة في الحب الجديد .. أنه مستورد

يعني البنت حال
يا بتنتظر الشاب الوسيم الغني وتعجب بيه الاول وتحبه وبعدين تتجوزه

والا ترفض اي حد تاني

او ببساطة تقرر .. مش هتجوز الا عن حب

وطبعا مش محتاجة أقول أني لا أؤمن بالحب قبل الزواج

أنا أؤمن بمقولة للعظيم : عبد الوهاب مطاوع

ان الحب بذرة ... بيزرعها الاعجاب

مبتكبرش الا بالاحتكاك والتعامل والمعايشة

مش هتتحول شجرة الا لما تسقى بسنين الحياة سويا

ومفيش شجرة هتكبر بسهولة وببساطة .. لازم كفاح وصبر وعواصف عشان تكبر وتفضل عايشة خضراء مورقة بالسعادة

بس للاسف الثقافة المعروضة علينا حاليا ان المال يصنع السعادة

وان الجمال بيصنع االسعادة

ونسيوا ان المال والجمال ايام وهينتهوا

واللي هيفضل عايش

القلوب المفعمة بالحب الصادق


7 comments:

د. مونى said...

ياااااااااااااه
انا سعيدة انى اول تعليق رغم انى كنت بتتريق على اللى بيعمل كده بس دلوقتى حسيت بيهم
ياترى فاكرانى؟؟؟
غبت كتييير بس رجعت
وحشتنى مدونتك وكنت دايما بذكرها لاصحابى
بالنسبة للبوست : اقترح عليكة تقرى ديوان الاستاذة زينب أبو النجا" سيمفونية الوجع المقدس" هيعجبك جدا واسمحيلى اقتبس منها:
الحب عندى كبرياء
والحب فى هذا الزمان .. تباهتت ألوانه
مش هحرقهولك بقى
تقبلى مرورى

خواطر شابة said...

تعرفي يمكن والله السن بيفرق كلما بنكبر بننضج اكثر بنفهم الواقع اكثر بننزل على الارض اكثر

هناء محمود said...

أسلوبك جميل وبيشد لآخر كلمة

وردة فرح said...

كلامج صح 100 % ...
ثقافة الحب عنا مستوردة ...
و دايما يعلمون الناس على ان الحب قبل الزواج هو اهم شي !
عيبتني هالجملة ...
"ان الحب بذرة ... بيزرعها الاعجاب"

بوست رائع ...
و مدونة جميلة ...
بالتوفيق حبيبتي ...

:)

تيك كيير ...

wafaa said...

حالة الضياع دى عشان قصص الحب ف ثقافتنا مستهلكة
لو قرينا قصص الحب ايام الصحابة وزوجاتهم وحب الرسول عليه الصلاة والسلام لزوجاته واد ايه كانوا بيساعدوه
هنفهم معنى الحب الحقيقى

فلسطينية الهوى said...

د موني

نورتينا برجوعك والله

واديني بعمل سيرش اهو أقرأه

__________

خواطر شابه :

الاحتكاك بالواقع بيدينا خبرات ونضج يعادل سنين

اقعدي مع اي مجموعة بنات في الجامعة واسمعي قصصهم هتعرفي اد ايه فعلا في ثقافة غلط منتشرة بتدمر قلوب البنات مش حاجة تانية .. وأهم حاجة في نظري قلب البنت :)

__________

أم بوبة :

نورتي المدونة بجد .. ربنا يكرمك على اطراءك ويبارك لك في بوبة :D

____________________

انسانة :

سعيدة أنه عجبك

تقبلي تحياتي

_________________

وفاء :

عندك حق فعلا

يكفينا حب محمد صلى الله عليه وسلم لخديجة :)

just dream said...

ههههههههه اولا انا مش نفسى اعنس معاكم ولاحاجه ابعدينى عن الحته دى هههه
ثانيا مدونتك جميله بجد واسلوبك حلو
وبصراحه عندك حق الحب الحقيقى بجد هو اللى بيتولد فى المواقف الصعبه مش على البحر اعتقد ان اغلب الحب اللى بيجى ع البحر وفى ساعة الغروب بتبقى حاله بيعيشوا فيها وبتروح لحالها
اما الحب اللى بيعيش بجد هو اللى بيكبر مع المعاشره والاحتكاك والتعامل صدقتى فعلا ف كلامك
تقبلى مرورى يافلسطنيه ياجميله