Tuesday, August 19, 2008

يمنى




في البداية بشكر يمونتي جدا على انها شالت المدونة الايام اللي فاتت



ونزلت بوستات عسولة زيها في غيابي



وبالمناسبة دي قررت اكتب عن يمنى



مالا يعرفه الناس عن يمنى



نسمي الله ونبدأ



يمنى بنت شكلها هادي ووقور عندها 19 سنة وهتكمل ال 20 في 22/10



فكل سنة وانتي طيبة مقدما



واعتبري البوست ده هدية عيد ميلادك عشان مش هجيب



الكل بيتخدع يا عيني في مظهر البنت الرقيقة المؤدبة



محدش يعرف ما وراء ذلك



يمنى شريرة جدا





عقلية اجرامية فذة وده اللي بحبه فيها



تفضل ساكتة ساكتة وبتجمع



ويوم ما تنفجر أجاركم الله



شكلها بيبقى نكتة وهي معصبة



حقيقي بتضحكني اوي لانها اصلا مش عصبية ففجأة بتبقى عصبية وبتزعق



بس هي داخليا على رأيها



وانا أقتبس من كلامها بالضبط ومش هذكر الموقف منعا لاحراجها



بلاعة حنان وطفحت



شايفين القدرة عالتشبيه



فهي عاطفية شوية بس مش بتبين ده الا للمقربين وانا منهم طبعا



يمنى مؤمنة جدا بنظرية الغرور الانثوي اللي احنا اخترعناها



وعشان كده هي ناوية تشتري عربية قبل الخطوبة



وابقوا أسألوها عالسبب



يمنى بتتريق على طريقة كلامي كتير

وبتقول اني عندي الفاظ خاصة بيا وناوية تنزلها فانا من هنا بحذرها تعملها والا هتلاقي الشر كله بيتصب فوق راسها


يمنى عقلية منفتحة ومثقفة يسعدك الحوار معها بس مش هتلاقيها بترد كتير لانها صامتة تحب الاستماع


يمنى شخصية خلوقة وملتزمة وانا بحبها

احسن ما فيها

انها

قررت تكون عانس

14 comments:

mostafa rayan said...

مش شايفة انها غريبة شوية دي بنت عنده 19 سنة يعني في عز سن الحب والرغبة في الأرتباط تقولك لاء مش هتجوز
اكيد دة كلام من وراء القلب فالمرأة لا تستغني عن الرجل كما ان الرجل لايستغني عنها
تحياتي لك ودعواتي بعد التعنيس

Rannon said...

ليه يا منى عايزة تشتري عربية؟؟!!

عارفين من وانا اصغر منكم وانا بقول اني هعنس بمزاجي :D
يمكن ساعات بحن بس أنا عارفة نفسي الموضوع ده مش بيدوم معايا فبرجع لقراري..يعني أنا معاكم لا تقلقوا
ربنا يخليكوا لبعض ويخليكوا للمدونة :))

تحياتي:)

بث تجريبي said...

السلام عليكم

اولا ربنا يخليكوا كدا يارب لبعض وتفضلوا اصحاب كدا على طول


فى حاجة عاوزة اعرفها انتى قلتى ابقوا اسألوا يمنى عنها
هى ناوية تشترى عربية قبل الخطوبة
ليييييييه؟؟
اشمعنى؟؟

انا مستنية البوست الجديد اللى يمنى بقى هتتكلم عنك فيه هنشوف بقى يمنى هتقول ايه عنك.
سلاموز.

walaa rizk said...

على فكره

احساسى طلع صادق ساعات ماشوفت الصوره اللى انتى حاطها انتى ويمنى ليكوا اللى بتظهر جمب تعليقكم

خمنت انها تكون يمنى

هيا ممكن مش تعرفنى ومش يجيى فى بالها

بس انا هأسيبك تفكرى

شويه وان شاء الله ابقى اقولك

بس بجد انا عارفه يمنى معرفه بسيطه اوى

بس حد تحسى فعلا بالبراءه فيها

بوست جميل يا آيه

هــــــــــــايدي said...

السلام عليكم
ربنا يحفظكم ويديم العلاقه اللى بينكم على طول
جميل انك يكون عندك صديقه بتحبيها وتثقى فيها

على فكره شخصيتها جميله اوى وعقلانيه لانها بتسمع اكتر

Amgad said...

احسن ما فيها

انها

قررت تكون عانس
يبقي عايزة تشتري عربية
قبل الخطوبة
عشان تتقنعر
لامؤاخذه في اللفظ علي خطيبها
يقوم هوب يفركش
ويبقي عندها سبب للفركشة
وبالتالي تفضل عانس
شفتي ازاي انا فاهم سيكولوجيتكم
-حلوة سيكولوجية دي-
كلاكيت رابع مرة
خالص تحياتي

jessy88 said...

اولا توضيحا للامور يمنى لا عايزة تعنس ولا حاجة بالعكس دي بتنام تحلم عريس يا بوى اه حتى اسألوا ايه هى احيانا بتنام جنبها وبسمع الاصوات دى واحيانا بتقوم من النوم بتزغرط بدل ما تغسل وشها ولا تتاوب ..ثانيا انا ادعو يمنى انها تنزل البوست بتاع مصطلحات ايه ومتنساش(خريوتا) وانا بدورى هساعدها فى جمع تلك المصطلحات ولو فى فيديو يبقي احسن عشان في حركات بجانب المصطلحات عايزين ننقلها برضه وتحياتى لحارة العوانس الشر برة وبعيد عليا

شفـقــة و إحســــان said...

ايه الحب ده كله شكل يمنى تستحقه
ربنا يخليكم لبعض

wafaa said...

ربنا يحليكو لبعض ويديم المحبة بينكم

تقبلى مرورى
وفاء

Anonymous said...

بس يا ترى بعد ما البنزيين غلى لسه برضه نفسها تشترى عربيه انا بقول ماله العجل وهيرحمها برضه من دوشت وزحمة المواصلات ..بعدين انا افتكرت احلى حاجه فيها انها صحبتك زى ما احلى حاجه فيكى انك صاحبتها ...وبرضه هحضر فرحكوا ..سلام يا قمرات وكل رمضان وانتوا بألف خير ومش هفكركوا ب...

Zanooba (Zeinab sab9n) said...

و الله أنا لا عاوزة أعنس و لا عاوزة أتجوز معرفش بينلي عبيطة ولا يه :) ربنا يخليكي أنت و يمنى لبعض و تفضل بلعة الحنان طافحة على طول كده يا رب :) بس أنصحي يمنى أنها تعيد تفكيرها في موضوع العربية يعني كل كام يوم البنزين يغلى و مقولكيش على قانون المرور الجديد و الناس مش نقصه هم


مستنية جديدكم إنشاء الله

قررت أكون عانس said...

mostafa rayan

اهلا بيك فى المدونة

و ما غريب الا الشيطان و الدنيا مليانة عجايب:)

اما المرأة لا تستغنى عن الرجل ...اعتقدت انها بدأت تستغنى عنه



Rannona

هههههههههه

عشان احسسه ب....فكرى كده و انتى تعرفى
ربنا يثبتك يا بنتى مافيش حاجة جيبانا لورا غير المشاعر
دى...ربنا....يخليهالنا

ربنا يخليكوا لبعض ويخليكوا للمدونة :

امين وربنا يكرمك



Do not Press F1

و عليكم السلام ورحمة الله و بركاته

ربنا يخليكوا كدا يارب لبعض وتفضلوا اصحاب كدا على طول


ميرسى اوى وربنا يكرمك

اما بالنسبة للسؤال فليه الاحراج ده

و بالنسبىة للبوست اللى هتكلم على اية فيه هيبقى حصريا و اكسليسوف



عاشقه الاقصى

هههههههههه
اهلا بيكى يا عاشقة الاقصى

شوقتينى و خلتينى عايزة اعرف انتى مين
اكيد لو شوفتك هفتكرك ..اما لو قلتيلى اسمك والمواضيع دى فهبقى زى العبط تمام

انتى عارفة الزهايمر اللى منتشر

اما موضوع البراءة ده مش اول واحدة تتخدع فيه



هــــــــــــــايدي

و عليكم السلام ورحمة الله

اهلا يا هايدى ربنا يكرمك

فعلا اكبر نعمة ينعم بيها ربنا على الانسان انه يدليه صاحب كويس



Amgad

واضح انك بتاكل سيكولوجية كتيير

ههههههههههههه
بس انت قربت من الاجابة هى كفاية انى اتنطط عليه
لكن اتنطط ويفركش فده كتيير اوى
و بعدين مش انا اللى اتخطب و افركش انا بعنس على طول لحد ما يجى ابن الحلال



jessy88

ياسمين ايه اللى جابك هنا يا ماما ..اكيد غلطتى فى العنوان مش كده ولا ايه

و بعدين الحاجات انتى لسه صغيرة عليها يا روحى يلا روحى من هنا و كفاية فضايح



شفقة هانم واحسان بك

اهلا يا شفقة هانم و يا احسان بيك نورتو المدونة مع انها للمعنسين بس:)



wafaa

اميين و نورتى المدونة يا وفاء



عايزه اتطلق و

تصدقى نفسى يبقى عندى عجلة على الاقل رياضة
ان شاء الله تحضرى فرحنا
و كل رمضان وانتى بخير


Zanooba (Zeinab sab9n)
هههههههههههههههه
اهلا بيكى فى المدونة من ساعتها بفكر فى حل وسط بين انك مش عايزة تعنسى وبين انك مش عايزة تتجوزى مش لافية :)
اما موضوع العربية فربنا يسهل هبقى ارشح نفسى لمجلس الشعب و اخد حصانة منها يدفعو هما البنزين ومنها محدش يكلمنى

دعاء مواجهات said...

بااردو هتقوليلى قررت تكون عانس

هههههههههههههههههههه

شكلكوا كدة ميكس زى العسل بجد

ربنا يخليكو لبعض

ويحميكوا

ويرزقكم بالزوج الصالح

منورين مدونتى

البوست نزل

انسان وبس ! said...

لالالالالالالالالالالالالالالالالا طبعا مش نفسى