Monday, October 27, 2008

التحرش


( ولا تخضعن بالقول فيطمع الذي في قلبه مرض)


(ذلك أدنى أن يعرفن فلا يؤذين )


اد ايه الآيتين دول جمال جدا


وعظيمتين جدا


وبيعالجوا مشكلة كبيرة جدا


التحرش والمعاكسات


موضوع شائك جدا موضوع التحرش .. وللأسف بقى منتشر بشكل خطير في مصر


وبطريقة تدعو للقلق والخوف


ومفيش أسس معينة يقوم عليها


فسواء كانت كبيرة في السن او صغيرة


محجبة او غير محجبة


حاليا التحرش بيطول غالبية نساء مصر


وتأثيره النفسي سيء جدا على أي بنت حتى لو كانت هي نفسها مش كويسة


لانه تعدي صريح على خصوصيتها


تعدي على شيء هو ملكها وحدها


فشعورها ساعتها هو الغضب والقهر والقرف


هو بيحاول يوصلها إنك شيء رخيص


وإنك ضعيفه وأنا بعتدي عليك


فبالتالي حتى لو كانت قوية إلا انها هتشعر ان في شيء في داخلها حد حاول يكسره


ومع الواقع المؤلم ده


وإن الشاب المتحرش مش بيفرق بين حد


كان في آراء بتطلع متطرفة على الناحيتين


رأي أن البنت هي وحدها تتحمل الخطأ


ورأي أن المتحرش وحده يتحمل الخطأ .. وحتى لو كانت البنت لابسه مش لابس -عذرا في اللفظ - مش من حقه يعمل كده


وأنا رأيي يقف بين الاتنين


البنت ضحية في الحادثة دي وده شيء مفروغ منه


بس أحيانا الشاب أيضا يصبح ضحية


عشان كده إسلامنا العظيم حط لنا حل


ربنا خلقنا وهو أعلم بمناطق الضعف فينا


ففي مرة قالنا في شباب في قلوبهم مرض فلا تخضعن بالقول عشان المرض ده ميتحركش


يعني مش أضحك بمياعه وأتكلم برقة مبالغ فيها وأقول مش من حقه يعاكسني


آه مش من حقه يعاكسني وفي المقابل أنا أتوخى الحذر لادراكي وعلمي ان في ناس في قلوبهم مرض


مش كل الناس بس في ناس


فمن حرصي على نفسي أحرص على ده


وحل تاني


حتى يعرفن فلا يؤذين


بيقولوا المحترم الناس بتعرف انه محترم فبالتالي بتحترمه


ربنا بيقولك هيعرفوا إنك محترمة فمحدش هيؤذيكي


ربنا سبحانه وتعالى بيحبك ومش عايز قلبك يتكسر او تمري بتجربة سيئة


محدش يؤذيكي


فقالك الحل ... حتى يعرفن فلا يؤذين


وتعرفي بايه ؟


( ياأيها النبي قل لأزواجك وبناتك ونساء المؤمنين يدنين عليهن من جلابيبهن ذلك أدنى أن يعرفن فلا يؤذين وكان الله غفورا رحيما )

سورة الاحزاب ... الآية 59


قالك ارتدي حجابك الصحيح اللي يوصل رسالة لأي شخص ان مش من حقك تؤذيني


الرأي اللي كان شايف ان التحرش اهانة للجسد وإنه جسدها وهي حرة فيه


ربنا أعلمك إن احترامك لجسدك هو حجابك


مينفعش تطلبي من حد يحترم شيء انت مش بتحترميه


يعرفن فلا يؤذين


وزي ما ربنا أمر البنات بالحجاب


أمرهم بغض البصر .. وكان تشديد الامر للرجال اكثر من النساء بالرغم ان الامر للاثنين


لان ربنا خلق كل واحد وأعلم بما هو أصلح له


المرأة الطبيعية يغلبها الحياء .. وغرورها الانثوي في كونها مطلوبة لا طالبة


الرجل تثيره المناظر فربنا قاله يصرف بصره


ربنا سبحانه وتعالى قدم لنا الحل


بس احنا اللي رغم وضوح الحل قدامنا


بنحب دايما ندور على حلول تانية


يارب نقدر نطبق الحل الصح



____________________


على الهامش :


أنا لا أقصد أبدا أن غير المحجبة غير محترمة


أنا أحترمها وأدعو لها بالهداية
بعتذر للجميع عن أي لفظ خادش للحياء في البوست
بس هو موضوع خادش للحياء اصلا :)


______________


تحية للمخرجة نهى رشدي اللي رفعت قضية عاللي اتحرش بيها


وتهنئة لحصولها على الحكم بحبسه 3 سنوات


_____________
البوست لا ينفي أبدا مسئولية الفساد اللي بيعيشه المجتمع في ظهور هذا المرض الخطير
اكيد الفقر والعنوسة وتأخر سن الزواج والبطالة والاعلام الفاسد
أسباب رئيسية في المرض
وهي أسباب ان شاء الله ستحل وإن كان الحل بطيء
لكن هذه الأسباب لا تلغي السبب الأول في الظاهره وهو فساد النفس الانسانية
واللي علاجها هو العودة الى من خلقها


14 comments:

blue-wave said...

يا سلااااااااااااااااااام
والله لو ماكتبتيش غير الأيتين الأولنيين دول بس كان كفايه
بجد تسلم ايدك على البوست الرائع دا

mohamed ghalia said...

استدلال رائع بالأيتين
حقيقى ربنا يهدى شبابنا لأنى الموضوع كبر جداااااااااا
ومفيش فرق بين محجبة وغير حتى المنتقبات
إحنا محتاجين عودة حقيقية للإسلام
تحياتى

محمد شاكر said...

بالإضافة الى هذا الكلام احيانا يصبح المجني والمجني عليه في موقف البرائة والمتهم هي سياسة عامة مش بس زرعت التحرش بل وتجارة المخدرات والفساد والرشوة والخ الخ الخ...من الافضل ان ننظر للموضوع من زاوية اكثر عمقا ومن ارتفاع اكثر بعدا ...حالات الإكتئاب والكبت والخلل العقلي والنفسي لم تاتي من فراغ..إيه المطلوب من مجتمع سواء ذكر او انثى يفتقد ابسط الحقوق الحياتية

والحارة سد

TAFATEFO said...

يا ريت تغيري كلمة حتى في جملة "حتى يعرفن فلا يؤذين" التي تكررت أكثر من مره لأنها بخلاف معنى الآيه

ذلك أدنى ليست بمعنى حتى

TAFATEFO said...

بخصوص البوست فعلاً جميل

وبخصوص سؤال التعليق .. نفسك تعنس معانا؟

أنا قررت أكون عانس لأني لا أصلح للارتباط :D

مليش خلق على المسؤوليه ولا على الوش بصراحه

yoyo said...

اولا تحياتى للعرض الهايل للموضوع برغم انه شائك الا انى عرضته بصورة جميلة و الاجمل الاستدلال بالايات القرانية
بس موضوع محجبة او غير محجبة او حتى منتقبة خالص مش بقى بيفرق التحرش بقى مش بيفرق وقتها اعتقد انه سلوك خاطئ يهين المرأة والرجل على حد السواء ويجعل الرجل عبد لشهواته بصورة حيوانية

تحياتى مرة تانية على البوست الجميل
يويو

l7zatelsafa said...

كلام جميل وعميق جدا
انا على فكرة طالبة ، وبالرغم من أنى لا أخرج كثيرا وأفضل الجلوس بالمنزل سواء فى الأجازة أو الدراسة
إلا أننى حينما اخرج أكره اليوم الذى أنزل فيه من المنزل
وليس المفهوم من هذا الكلام أننى ألبس ملابس مش محترمة
ولكن على العكس أنا أرتدى الحجاب ولبسى فى قمة الأحترام مثلما يقال لى ولكن نفوس الناس أصبحت مريضة جدا ، وفى حاجة إلى الدخول إلى غرفة الأنعاش
ولعل من كلامك هذا ، وكلام وسائل الأعلام ان يكون بفائدة
ويفيق الناس أصحاب القلوب المريضة جدا من الغيبوبة التى تلاحقهم بأستمرار
وندعو الله أن يهدى أصحاب هذه النفوس المليئة بالشر

ABOALI said...

كلنا يتحرش بنا
فى اشكال مختلفه
جنسى
ثقافى
اعلامى
حزبى
ووووو
اما عن التحرش الجنسى
وهو موضوعك بوستك الجميل
لو وجدتى قطعة حلوى ملقاه فى الشارع وعليها ذباب
فلا تنزعجى يا سيدتى
فقيمة اللؤلؤ فى اعماق البحار غاليه
وسط صدفته الجميله التى بمثابة الحارس الامين له
فاءذا خرج من صدفته
كان غثاء تتلاطمه الامواج الكل يحاول التقاطه

ليس دافعا
ولا تبرير
ولكنه تقرير لحالنا


تقبلى عميق شكرى يا لؤلؤه

kochia said...

انتي لخصتي الموضوع وحلتيه في نفس الوقت
بس فعلا لا يحل سريعا
والمهم النية والقرار اننا نحاول

تحياتي

A long distance said...

موضوع جميل جدا
ويعتبر من اهم المواضيع اللي بتمنى
نلاقلها حل
وياريت البنات تفكر بعقلانيه
وتبطل نغمة الحرية الشخصيه
ونلبس على مزاجنا
لانك زي ما جتلك الجراه على انك تلبسي كده
هتلاقي الشباب اللي عنده الجراه في المعاكسه
والشباب برده
بلاش انتهاك حقوق الغير
وتاخد حاجه مش من حقك

ولاء الاسلام said...

ربنا يعزك ويكرمك
بجد اخترتي ابلغ الكلام للتعبير
لو ادركت كل بنت معنى الايتين وعملت بها
لساد الامان بيننا
وما ارتجفت منا واحدة وهي تسير في الشارع
ربنا يهدي بناتنا وشبابنا

هانى زينهم said...

ما فيش بعد كلام ربنا كلام وبجد كتبه الله فى ميزان حسناتك ونفع به من قرأه .

Anonymous said...

بوست رائع جدا يا ايه
وفي نقطة اضافية بس
مع الحجاب لازم حاجه تانية
في بنات محجبات بيسيئو للحجاب
ممكن مثلا تكون مبتغضش نظرها
او بتعمل اي حاجة تانية ملفتة للنظر وهي محجبة
وده برضه هيعرضها للمعاكسة

محمود عبد المجيد

فلسطينية الهوى said...

جزيتم خيرا جميعا

احنا فعلا محتاجين نغير نظرتنا لحاجات كتير

ونحاول رغم الفساد العام اللي احنافيه

اننا مش نخليه يتسرب لنفوسنا احنا كمان

شكرا ليكم جميعا :)