Sunday, October 4, 2009

مستهلك

تعبت كثيرا حتى حصلت عليه

زارت عشرات الأمكنة حتى تجده

لكن لذة الحصول عليه أنستها الآلام التي لاقتها حتى حازته

فستانها الأبيض

ذاك الذي ستختال به أمام آلاف الأعين

فستانها الأثير

ذاك الذي سيخلد في مئات الصور

سيظل مقترنا بأجمل الذكريات

ستريه لبناتها وحفيداتها

تحكي لهم عن قصة حب عظيمة توجها ذلكم الفستان

تتذكر كيف سارت متباهية به بين صويحباتها .. أنه لم ولن ترتديه سواها

هو لها وحدها ... ما شاركت به أحد

ذاك فستانها .. فماذا عن قلبها

مفيش بنت مبتحلمش بفستانها . وبيوم فرحها .. بتحلم بضحكتها وابتسامتها يومها

بتحلم بمشيتها وسط الناس وهي ماسكة في ايد عريسها .. وحاسه انها أسعد انسانة فالوجود .. مش بعيد كمان تكون رسماه ومصمماه من قبل ما تتجوز

متحبش أبدا تلبس فستان واحدة صاحبتها .. او فستان لبسته قبلها بنات كتير

لانها بطبيعتها البشرية بتحب كل جديد ومميز .. تحب ان فساتينها تكون بتاعتها لوحدها

متكنش مستعملة قبل كده ومستهلكة

ده الفستان

طيب قلبها ؟؟

بسأل نفسي دايما .. ازاي القلب المستهلك بيعيش سعيد

ازاي وهو محفور جواه .. الف كلمة حب من مئة شخص مختلفين

ازاي بنت ترتبط بفلان وعلان .. وتعيش مع كل واحد فيهم قصة حب طويلة ترسم فيها كل الاحلام والتخيلات عن حياتهم المستقبليه سوا وعن بيتهم واسامي عيالهم وكل صغيرة وكبيرة

بعدين تسيبهم وترتبط بواحد جديد تعيد نفس التجربة معاه وممكن فالاخر تتجوزه

وفرضا اتجوزته .. هتقدر تعيش سعيدة .. هتنسى كل اللي حصل ده ؟

مش هتيجي في مرة تقوله مثلا بحبك .. وتفتكر قالت الكلمة دي لكام واحد قبله ؟؟

ازاي هتشعر بسعادة انها لاول مرة في حياتها بتحب ؟؟

وهي حبت قبل كده بتاع 10 مرات

ازاي هتحس بسعادة اكتشاف مشاعر بتكبر جواها لاول مرة .. وهي قبل كده كررتها كتير

ازاي هتمسح من ذاكرتها كل الذكريات عن أحبتها السابقين

لو مرة راحت النيل .. مش هتفتكر ان قبل كده في المركب اللي واقف بعيد ده

ركبته مع فلان ؟؟

او المطعم الشيك ده دخلته مع علان

وفرضا زوجها مكنش غني .. وحبيبها اللي قبله كان غني

مش هتيجي لما يبقى نفسها في حاجة وزوجها مش قادر يجيبها .. هتقارن بينه وبين التاني ؟؟

زحمة الذكريات والمشاعر اللي ساكنة جوا قلبها .. كلمات الحب والغزل المطبوعة فنفسها .. ازاي هتمسحها

ازاي هتقدر تمنحه قلبها كله

وقلبها اصلا مش كامل

لان في اجزاء كتير منه أخدها التانيين

وازاي هو هيرضى .. يرتبط بقلب مستهلك ؟؟

جربه قبله ناس كتير ورفضوه ؟؟!



7 comments:

صاحبة هدف said...

جزاكِ الله خيراً الأول

هو احنا بفضل الله كملتزمين..مش بنقع في المواضيع دي

لكن هي بمجرد التخيل مؤلمة

ومؤلمة جداً كمان

لأن بعثرة المشاعر..بيتؤدي لإعدامها في النهاية

كمان..رسم ألوان الحياة وارتباطها بشخص بعينه..لما يتهدم أكيد بيهدم حاجات كتير جوا صاحبه

والمقارنة دي السبب الرئيسي للتعاسة والحزن وعدم الرضا

حاجات كتير وكتير

لكن للأسف مش كل البنات بتحكم عقلها..وتقتنع إن ليها زوج محدش هياخده غيرها

بتحكم قلبها..وتطاوع نفسها..وتكتشف
في الآخر إنها أخطأت

يكفي إنها ترتبط بحد..وبعد كدا تسيبه

هيفقدها ثقتها في نفسها..ونظرتها المتنزنة لكيانها

وتبدأ معركة التناقض الداخلي

ربنا يعافينا ويهدي جميع بناتنا

ربنا يكرمك..أثرتي موضوع مهم جداً

بس سبحان الله..ستبقى رحمة الله في خلق الإنسان المفطور على النسيان

طوبه فضه وطوبه دهب said...

فعلا مش عارفه ازاى ممكن دا يحصل بس ليا صاحبتى اتخطبت اكتر من اربع مرات وفى كل مره وبسبب مشاكل عائليه كانت الخطوبه بتتفسخ غصب عنها بعد ما تكون ارتبطتت واتعلقت بكل شخص وهى دلوقتى متجوزه لما سئلتها قالت لى ان كل شخصيه ليها ظروفها وان كل مشكله كانت بتحصل كانت بتمسح معاها اجمل الذكريات وهى مقتنعه تماما ان كل حبائها ووفائها دلوقتى للشخص اللى اصبح جوزها مش عارفه هى قادره ازاى تكون كدا يمكن صعوبه الظروف وقسوتها هى اللى خلتها تقدر تفصل كدا لكن بقى اللى مش متخيلاه اللى كل يومين ترتبط بشخص دى ازاى فعلا بتقدر تنسى الله اعلم

well said...

هى الحياة كدة
لازم نقفل صفحة
ونفتح صفحة
...........
تحياتى

فلسطينية الهوى said...

صاحبة هدف

نورتي المدونة وشرفتينا بزيارتك بجد

عندك حق جدا في قصة فقدان الثقة

كل ماهتمر بتجربة فاشلة كل ماثقتها تنعدم واحاسيس كتير تموت جواها

ربنا يعافينا يارب

_______________

طوبة فضة ودهب :

يارب نعيش في الجنة في قصر لبنة من دهب ولبنه من فضة

صاحبتك دي اتخطبت يعني قدام الناس كلها
ارتبطت شرعيا بفلان .. وده لايعيبها في شيء أبدا

بس أكيد كان شيء ثقيل على نفسها

عشان كده انا متشددة جدا في آرائي بالنسبة للخطوبة

واني ابادل خطيبي كلمات الحب .. شيوخ كتير قالوا حرام .. لان البنت مش ضامنة انها هتتجوزه

ربنا يسعد صاحبتك ويسعدك في حياتك يارب

__________________

well :

وليه نعرض نفسنا لقفل صفحات

مانفتح صفحة واحدة طول العمر

سعدنا بزيارتك وتعليقك

هبة الله said...

و بالنسبه له:
هل قلبه ليس بمستهلك؟؟

متزوجة بحب و إخلاص said...

الفكرة في القدرة علي الإخلاص، الي بتتخطب و تسيب أو تتساب زيها زي الي بتحب في الضلمه المشاعر واحده، مع عدم موافقتنا علي الأخيرة. في مقوله بتقول
‏"دائما في البداية، النوايا حسنه" و عشان كده المشاعر واحده و لما بيقدر لها تنتهي بتاخد فتره نقاهة ترجع فيها حد جديد جدير بالحب الحقيقي. و فعلا الواحده مش بتلاقي الحب الحقيقي إلا مع الإنسان الي المشاعر معاه مش بتبقي مجرد كلام، يعني إلي بتتزوجه.
دا لو الإتنين عندهم فعلا حب و إخلاص و استمتاع ب و تقدير لنعمة "النسيان"
شكرا

Anonymous said...


كلام صحيح بجد وواقعى جدااا
بس انا عندى تعليق بسيط
من وجهة نظرى ان دى الحياة
مفيش حد مش بيغلط
و فى نفس الوقت محدش قاصد انه يغلط
يعنى لما الواحده تمر باكتر من تجربة ....هى طبعا مش ده كان قصدها اطلاقا فشل علاقة ما او منتهتش بالجواز ده غلط و الكل متفق على كده ...انما احنا برده بشر و مش مثاليين ومن الطبيعى اننا ممكن نغلط و من الطبيعى اننا نمر بتجارب الحياة و ممكن يكون فى اكتر من ارتباط فى حياة الواحدة و يفشل .... بس ده مش معناه اننا لا نخوض تجارب الحياة...لازم الواحده ترم بالمواقف دى عشان تتعلم و تنضج بجد عاطفيا
فتعليقى هنا كلامك مجرد سؤال ... ايه المطلوب ؟؟؟ نرفض اى خطوبة عشان ممكن العلاقه فى النهاية تفشل او الموضوع ميكلمش ؟؟؟انا مقنتعه تمام بالكلامك انها هتكون تجربة قاسية و زكرياتها مؤلمة جداااااا بس لابد منها فمن الفشل يولد النجاح فمفيش حد بينجح بدون ما يتعب شوية ....فحضرتك بتحضى على تجربة مثالية لشخصية كاملة..يصعب تحقيقها .... كلنا نفسنا ميبقاش فى حياتنا إلا شخص واحد فقط و هو اللى نكمل معاه حياتنا و تكون حياة سعيد ...بس الكلام ده مثالى ...بعيد عن المنغصات و مشاكل العائلات فى الخطوبات والارتباط و كده... و فى النهاية مش ذنبنا ... بس دى ارادة ربنا اننا منكلمش الطريق ده و نكلمل مع شخص اخر فى طريق اخر فمش معقول ان كل واحده تتجوز من اول خطوبة .....فلا تتحاملى على من وقفت الظروف فى وجهه و المته الحياة كثيرا.... ولا تحضينا على مثالية لا نجدها إلا ككلمات على ورق ولاتفترضى انه من المعقول ان كل واحده تتجوز و تعيش بسعاده مع اول واحد يتقدملها ...حتى لو اتجوزت و محصلش نصيب عادى ممكن تنفصل و ترتبط بشخص اخر .... ومن عدم الحكمة انك تسمى ده استهلاك للقلب....ابدا ده نضج للقلب و خبرة للعقل و الفكر و تصحيح من الله للطريق ...... فلا يمكن الحكم من الافلام و التجارب النظرية فى الروايات ....بس لو حضرتك مريتى بتجربة فعلية "مش بتحكمى على الناس من برج عاجى" ...هتعرفى انك فى الاخر انتى اللى استفدتى فى حياتك وان ربنا عاوزلك الخير ....مش استهلاك القلب